Mavingu 20 - Bhibhiliya Nya Guage

¹ Vbinyu yi ngu dhadhavadzisa muthu; ni wadwa wu ngu vanga ligwaha, ni wevbini a dzi ningelago avbo gwaye, mwalo mapimo.

² Likhulo la mufumeli la gu fanana ni gubhonga nya nghala, ni wevbini a yi khuthago a gu dzi vangela lufu.

³ A ngu zundzega muthu a si dzi bedzigo mayungani, aholu sipumbu sa gu dzi ningela ga ayo.

⁴ Ngara kha limi a gu bani nari vbagirametunu, aholu gikhati nya guvbwere a na si vbweta a si hanuga.

⁵ Makungo ya monyoni ga muthu, ma gu fanana ni nondrwa nya guete nya mati, aholu muthu a gu ni mapimo a ngu ma rega.

⁶ Vathu nya vangi va gu dzi zundza gukhavo khavo nya vadi, aholu khu mani a na manago muthu nya gutumbege?

⁷ Muthu nya wadi a gu gimbila gululamani gwaye, si kategide sanana si na mu landrelago.

⁸ Mufumeli a gu khala phathani nya gulamule, maho yaye ma ngu vbiredza gu wona uye a gu na ni nandru.

⁹ Khu mani a kodzago gu ganela, khuye: “Monyo wangu wu agide, sighoho sangu si handzidwe?”

¹⁰ Gu rengisela vathu khu mipimo nya wukanganyisi, silo nya gunyenyeze mahoni ga Pfhumu Nungungulu.

¹¹ Ambari gyanana gi ngu dzi yeyedza khu mithumo yaye, mavbanyelo yaye ma gu bani ma agide ni gululama.

¹² Ndzeve khiyo yipwago, liso li wona, satshavbo si di girwa khu Pfhumu Nungungulu.

¹³ U nga khali pari nya ligovbe, gasi u si khali gisiwana, tula maho u wona, gasi u kodza gu mana guhodza u khura.

¹⁴ Murengi a gu ganela, khuye: “Kha si phasi gilo esi!” Gambe gikhati a pfhurarago a gu phela gu bhuma.

¹⁵ Yomo ndralama ni siwindri nya singi nya lisima, aholu igyo nya lisima guvbindra satshavbo, khu magana nya guti.

¹⁶ A na tshuledwe dzingandzu muthu a seketelago nandru wa muthu a si mutigo; a gu dzi gira fakazi nya gulivbele muthu a si mutigo, a na moledwe gilo.

¹⁷ Guhodza nya gu gu mane khu gu kanganyisa gu ngu tshamba, aholu, khu hwane, kanani gwaye gu na khera, gukhwatshi mafu ni siwindri a hodzidego.

¹⁸ Makungo yatshavbo ma gu dugelela khu gu mana wusingalagadzi; ni dzinyimbi dza gu gimbidziswa khu wugengeli.

¹⁹ Muthu nya milembo a gu tugudzisa misihalo, khu guralo, u nga dzi tshanganisi ni muthu nya mapongowongo.

²⁰ Uye a valago babe mwendro mayi waye, a na tshimegedwa khu mwenge waye a khala mugidemani nya guthise.

²¹ Wa gu phela khu guvbiredzela gu mana thomba, khu guhegisani kha yi na gu ninga makategwa.

²² Wa gu giredwa guvivba khu muthu u nga ganeli, khuwe: “Nyi na phodza!” Tumba Nungungulu, uye a na gu phasa.

²³ Guthumisa mipimo mivili wudambane, silo nya gunyenyeze mbeli ga Pfhumu Nungungulu ni sikalo nya wukanganyisi, silo nya gunyenyeze.

²⁴ Pfhumu Nungungulu khuye a yeyedzago muthu ndzila nya gugimbile khiyo. A na dzi kodza kharini muthu guti ndzila yaye abune?

²⁵ Libango ga muthu a gu tutumela gu ganela, khuye: “Nyi dzi agisede Pfhumu Nungungulu!” Nasi siti ginani gi na guta mu dugelela khu hwane nya gu bani na giride gifungo.

²⁶ Mufumeli a gengedego a gu fuvisa va nya guvivbedwa khu monyo, bwelo khavbo a va tshindra khu giwindri nya guvbule.

²⁷ Hefemulo wa muthu mwenge wa Pfhumu Nungungulu, wu wenengedzago satshavbo si guromo ndrani gwaye.

²⁸ Mufumeli a gu ni wuhigo ni gutumbega, a ngu khadzisega gwadi, mufumo waye wu na tiyiswa gwadi khu gululama.

²⁹ Wuzundzo wa madzaha khu tshivba yawe, gasi wudhumo wa sikhosane khu dzinvi.

³⁰ Dzimbanga dza guhandza guvivba, ni dzipama dza gululamisa mapimo.