Mavingu 19 - Bhibhiliya Nya Guage

¹ Muthu nya gisiwana a gimbilago khu ndzila nya gululame, a ngu vbindra muthu nya gipumbu a dusago magana nya wukanganyisi khu kanani gwaye.

² Mahingigedzo nyamba phela khu gupimisa kha ma phasi gilo, gututuma guvbindrwa khu gu gimbila khu gwadi.

³ Wupumbu nya muthu wu ngu ghoha guvbanya gwaye, monyo waye wa gu wugela Pfhumu Nungungulu.

⁴ Dzithomba dzi ngu rana dzipari nya dzingi, aholu gisiwana, ambari dzipari dzaye dza gu mu diga.

⁵ Fakazi nya malipha gima kha yi na hamuga tsayiso, ni wule a ganelago malipha kha na vbuluga.

⁶ Vathu nya vangi va gu tsakela vathu nya guthavisege, muthu ni muthu pari ya wule a ningelago dzisagwati.

⁷ Gisiwana gya gu nyenywa khu vandriyaye vatshavbo, dzipari dzaye nidzo dzi na gimbilela hwindzo gwaye; ambari gya gu lomba guphaswa khavo, avo va gu hambana nagyo.

⁸ Uye a vbwetago wugengeli, a gu gola hefemulo waye, ni uye a gu na ni mapimo, a na mana makategwa.

⁹ Fakazi nya malipha yi na mana tsayiso, ni uye a ganelago malipha kha na vbuluga.

¹⁰ Kha gu yeli gu gipumbu gi mana mavbanyelo nya yadi, ambari githumi gu fumela muthangeli waye!

¹¹ Muthu nya mapimo kha vbiredzeli gu goroga, wuzundzo waye, khu gutsetselela sihoso.

¹² Likhulo la mufumeli la gu fanana ni gubhonga nya nghala, gutsakedwa khuye gu fanana ni thondrwane mwasini.

¹³ Gyanana nyamba yingisa gikhunguvanyiso ga nyehe waye, ni gu dzega nyamayi nya siregera, gufanane ni gu khala nyumbani nya gurute matshigu yatshavbo.

¹⁴ Nyumba ni gutala nya silo, thomba hi tshiyedwago khu vavelegi, gasi gu mana nyamayi nya mapimo giningwa gya Pfhumu Nungungulu.

¹⁵ Muthu nya ngara gu khala na lade, ni muthu nyambana lipindru, a nafa khu ndzala.

¹⁶ Uye a vegedzago milayo a gu sayisa womi waye; aholu uye a gumba dzumela sileletelo, a gu dzi vangela lufu.

¹⁷ Uye a phasago gisiwana a gu fiyarisa Pfhumu Nungungulu, Uye a na mu bweledzela wuwadi waye.

¹⁸ Tsayisa mwanago gikhati gi nga gu dzumela, aholu u nga mu tsayiseli gu mu songa.

¹⁹ Muthu nya gihafane fanede gulivba abune nandru waye, kholu wa gu mu phasa, a gu engedzela gu gira gigaha.

²⁰ Yingisa gulaywa u dzumela sileletelo, u na hegisa khu gu khala muthu nya guti matshiguni matago.

²¹ Monyoni ga muthu momo makungo nya mangi, aholu iso si tiyidego, khiso Pfhumu Nungungulu a fungidego.

²² Igyo gi mburisago muthu khu wuhindzi, I tshukwana gu khala gisiwana guvbindra gu khala muthu nya malipha.

²³ Guthava Pfhumu Nungungulu ndzila yiyago guvbanyani, uye a mu ningago githawo a na khala na tsakide nyamba mana dzimhango.

²⁴ Muthu nya ngara a gu thela libogo mbiyani, a gu tandrega ni gu li yisa kanani gwaye!

²⁵ Tsayisa mutshanisi gasi gipumbu gi kodza gu mana gihevbulo, laya muthu nya guti a kodza gu engedzela mapimo.

²⁶ Muthu a tshanisago babe waye ni gututumisa mayi waye, gyanana gi thesago dzitshoni ni gihegiso.

²⁷ Mwanangu, wa gu diga gu yingisa guhevbudzwa, dziti nya gukhuwe u na hambana ni magana nya guti u hevbudzidwego.

²⁸ Fakazi nya malipha ya gu ghoha malamulelo nya yadi, ni maganani ga vathu nya guvivbedwe khu myonyo gwa gu duga silo nya gunyenyeze basi.

²⁹ Vathu nya dzihanyi va emedwe khu tsayiso, ni gisephu gi emede gu kwamula mihwambo ya sipumbu.