Mavingu 13 - Bhibhiliya Nya Guage

Guti ni wupumbu

¹ Gyanana nya guti gya gu yingisa sihevbudzo sa babe waye, aholu uye nya muhembululi, kha khathali khu gu kawukwa.

² Muthu nya wadi a gu havela mihandro nya iso a ganelago khu kanani gwaye, aholu va nya guvivbedwa khu myonyo va gu gola mayunga.

³ Uye a si ganeligo ngudzu a gu sayisa womi waye, aholu uye nya mapongowongo, a gu dzi vangela lufu.

⁴ Ngara a gufa khu gunavela, aholu kha mani gilo; gasi, misuwo ya vale va dzi garadzago khu guthuma, va na mana iso va si dilelago.

⁵ Muthu nya gululame a ngu vengana ni magana nya malipha, aholu uye nya guvivbedwe khu monyo kha thavi manyala ni dzitshoni.

⁶ Gululama gu ngu hetedza muthu a gu ni mavbanyelo nya yadi, aholu gighohi gi ngu mbemba khu mithumo yaye.

⁷ Vomo va dzi girago sitetema, na vari mwalo gilo, ni avo va dzi girago sisiwana, na vari ni dzithomba nya dzingi.

⁸ Muthu a ngu kodza gu dzi dzegisa khu thomba yaye, aholu gisiwana kha gi thavi gu thurugiswa khu gilo.

⁹ Mwenge wa va nya gululama wa gu nengedzisa gikhati gyatshavbo, aholu kandriya ya va nya guvivbedwa khu monyo, yi na tshimega.

¹⁰ Matshandza ma gu vanga mazondra, aholu wugengeli wa gu manwa khu vale va dzumelago gulaywa.

¹¹ Thomba nya gu yi mane khu gu kanganyisa, kha yi hweli gu vbela, aholu iyo nya gu yi mane khu guthuma ya gu engedzelana.

¹² Muthu a gumba mana igyo a gi dilelago, a guvbisega monyo, aholu gu tadzisega nya misuwo, simbo nya womi.

¹³ Uye a venganago ni guhevbudzwa a gu dzi vangela lufu; aholu uye a landrisago nayo, a na mana tshatshazelo.

¹⁴ Sihevbudzo sa wule a gengedego, nambo nya womi gasi gu ndreyisa muthu naphwini nya lufu.

¹⁵ Khu mapimo nya yadi gu mana wuhigo, aholu ndzila nya sighohi yi lemede.

¹⁶ Muthu nya mapimo a gu thumisa guti, aholu gipumbu gya gulaledza guhandruga gwaye.

¹⁷ Mwango nyamba wadi wa gu pengisa vathu, aholu uye a resago guvbanya, khu wule a tumbegidego.

¹⁸ Uye a nyenyago gulaywa a na thegedwa khu dzitshoni ni wusiwana, gasi uye a dzumelago gukawukwa a na zundzega.

¹⁹ Muthu a gu mana iso a si dilelago, a gu tsakisa hefemulo waye, aholu gipumbu kha gi dzumeli guhambana ni silo nya guvivbe.

²⁰ Wule a gimbilago ni va nya mapimo, a na mana mapimo, aholu wule a gimbilago ni sipumbu a na thegedwa khu libango.

²¹ Wuvivbi wa gu landrisela sighohi, gasi wuwadi tshatshazelo wa va nya gululama.

²² Muthu nya wadi a gu tshiyela thomba vatugulu vaye, gasi iyo nya sighohi, ya gu tshalela va nya gululama.

²³ Mahange nya sisiwana ma gu dusa mihandro nya yingi, aholu va gu yi luza khu gu hamugega milayo nya gululame.

²⁴ Uye a gumba pitsa gyanana gyaye kha gi goli, gasi uye a gi golago, a gu gi tsayisa.

²⁵ Muthu nya gululame a gu hodza a khura, gasi mirumbu ya sighohi yi na khala ni ndzala.