Mavingu 12 - Bhibhiliya Nya Guage

Avo nya vadi ni avo nyambasi vadi

¹ Uye a golago gu kawukwa, a gu gola guti, aholu uye a si dzumeligo gu kawukwa, mwalo mapimo.

² Muthu nya wadi a gu tsakisa Pfhumu Nungungulu, aholu Uye a ngu tsayisa uye nya guvivbedwe khu monyo.

³ Muthu nya guvivbedwe khu monyo, kha hweli gu thega, aholu uye a lulamidego kha khuyugi, kholu a na ni mikhamba yi tiyidego.

⁴ Nyamayi nya ndruda, gihugu nya wufumu hungoni ga mwama waye, aholu uye a thelago dzitshoni mwama waye, madwali ma hinisago sikongolo saye.

⁵ Makungo ya vathu nya gululame khyadi, aholu wusingalagadzi wa va nya guvivbedwa khu monyo, khwa gu kanganyisa.

⁶ Magana ya vathu nyambasi vadi i naphwi nya gusonge, aholu ya va nya gululama maganelelo yawe khya guvbanyisa.

⁷ Va nya guvivbedwa khu myonyo va na mbembiswa va fuva, aholu nyumba ya avo va lulamidego yi na simama yi tiya.

⁸ Muthu a gu zundzwa khu kotani nya guti gwaye, aholu muthu nya guvivbedwe khu monyo, va na hembuludwa.

⁹ Tshukwana gu khala muthu nya nyalidede tigoni nuri ni vathu va gu thumelago, guvbindra gu dzi khusedza, nuri mwalo guhodza.

¹⁰ Muthu nya gululame a ngu sayisa gwadi sifuyo saye, aholu makungo ya muthu nya guvivbedwe khu monyo, khya tshanisa.

¹¹ Uye a dzi limelago lithembwe a na hodza a khura, aholu uye a landrelago silo nyamba phasa gilo, mwalo mapimo.

¹² Muthu nya guvivbedwe khu monyo, a gu dogorela phango wa va nya guvivbedwa khu monyo, aholu mikhamba ya valulamidego ya gu velega mihandro.

¹³ Muthu nya guvivbedwe khu monyo, a gu dzi modzisa khu magana yaye nya guwegele, aholu uye a lulamidego a na vbuluga musigaradzoni.

¹⁴ Muthu ni muthu a gu hakha handro nya iso a si dusago khu kanani gwaye, ni gu mana tshatshazelo nya sile a girago khu mandza yaye.

¹⁵ Muthu nya guvivbedwe khu monyo, a gu pimisa gukhuye satshavbo a girago khyadi, aholu uye a lulamidego a gu laywa, a gu yingisa.

¹⁶ Gipumbu gya gu dzegela gu yeyedza likhulo laye, aholu muthu nya mapimo a ngu dzi phara, a gu vadwa.

¹⁷ Uye a ganelago lisine i fakazi nya yadi, aholu fakazi nya malipha, mukanganyisi.

¹⁸ Vomo va dusago magana nya gupaye kha nga litshari, aholu lidimi la va nya guti, la gu ninga womi.

¹⁹ Magana nya lisine ma gu simama kala gupindruga, aholu lidimi li ganelago malipha, kha li vbohi hwindzo.

²⁰ Monyoni ga vathu nyambasi vadi, gu tade khu wukanganyisi, aholu gutsaka gomo myonyoni ga vale va vbwetago gurula.

²¹ Muthu nya gululame kha thegedwi khu libango, gasi uye nya guvivbedwe khu monyo, a na taledwa khu sigaradzo.

²² Pfhumu Nungungulu a ngu vengana ni va nya malipha, aholu a gu tsakiswa khu avo va ganelago lisine.

²³ Muthu nya mapimo a gu siha guti gwaye, aholu gipumbu gya gu laledza wupumbu wagyo.

²⁴ Uye a dzi garadzago khu guthuma a na fuma, aholu ngara a na rwegwa dzinyandra nya gulemele.

²⁵ Uye a vbisegago a ngu vbela tshivba, aholu magana nya yadi ma gu mu tiyisedza

²⁶ Muthu nya gululame a gu yeyedza ndzila dzipari dzaye, aholu ndzila ya va nya guvivbedwa khu monyo, ya gu va yisa gumbembani.

²⁷ Ngara kha wuyi ni gilo khu gusotatunu, aholu gu dzi garadza khu guthuma, khiyo a gu thomba nya muthu.

²⁸ Guvbanya gomo ndzilani nya gululame, uye a yi landrisago gima kha mani lufu.