Mavingu 10 - Bhibhiliya Nya Guage

II. Mavingu ya Solomoni

¹ Gyanana nya guti, gya gu tsakisa babe wagyo, aholu igyo nya gipumbu gya gu swihadza mayi waye.

² Thomba nya gu yi mane khu wudambane, kha yi phasi gilo, aholu, gululama gu ngu vbulugisa muthu lufuni.

³ Pfhumu Nungungulu kha digi hefemulo wa muthu nya gululame wupwa ndzala, aholu a ngu thindregisa misuwo ya va nya guvivbedwa khu monyo.

⁴ Uye a gu ni mandza nya wugara a na khala gisiwana, aholu mandza ya wule a thumago, ma gu mu resela gufuma.

⁵ Uye a vbwerago vbamarongatunu, gyanana nya gugengele, aholu uye a lalago vbaguvbweratunu, gyanana gi thelago dzitshoni.

⁶ Makategwa ma gu thegela vbatshani ga va nya gululama, aholu kanani ga muthu nya guvivbedwe khu monyo, gwa gufundra dzihanyi.

⁷ Mapimo ma tshidwego khu muthu nya gululame, ma gu resa gikategiso, aholu lina la muthu nya guvivbedwe khu monyo, la gu vbiredza gufuva,

⁸ Muthu a gu ni monyo nya guti, a gu yingisa milayo, aholu uye nya mapongowongo, a gu thegela gumbembani.

⁹ Uye a lulamidego a gu gimbila na tiyide, aholu uye a gimbilago khu dzindzila nya guwegele, a na tugudwa.

¹⁰ Uye a runyago khu liso, a gu pwisa wuvi, aholu uye a ganelago mapongowongo, ma gu mu yisa gumbembani.

¹¹ Likana la muthu nya gululame, nambo nya womi, aholu eli la muthu nya guvivbedwe khu monyo, la gu siha wughevenga.

¹² Livengo la gu wusa mayunga, aholu lihaladzo la gu siha sighoho satshavbo.

¹³ Guti, gomo kanani ga avo va gengedego, aholu lipitso, la gu kwamula hwambo wa vathu nya sipumbo.

¹⁴ Vathu nya gugengele va gu siha guti gwawe, aholu khu kanani ga muthu nya gipumbu, gu duga gumbembisa.

¹⁵ Thomba likhokhola la va nya gughanya, aholu wumbwa gumbembiswa nya sisiwana.

¹⁶ Tshatshazelo wa muthu nya gululame wa gu mu resela guvbanya, aholu gughanya ga muthu nya guvivbedwe khu monyo, wa gu mu resela tsayiso.

¹⁷ Uye a dzumelago gu kawukwa, a gu bela khu ndzila nya guvbanyise, aholu uye a bombago gu kawukwa, a gu ndreya ndzilani, a ghoha.

¹⁸ Uye a sihago livengo a na ni likana nya wudambane, ni wule a lembago vakwawe, gipumbu.

¹⁹ Muthu nya guganele ngudzu, kha vhiki gighoho, aholu uye a vegedzago likana laye, muthu nya mapimo.

²⁰ Lidimi la muthu nya gululame, parata yi hutidwego, aholu monyo wa muthu nya guvivbedwe khu monyo, kha wuphasi gilo.

²¹ Magana ma dugago khu kanani ga muthu nya gululame, ma ngu hodzisa vathu nya vangi, aholu sipumbu sa gufa khu gumbana mapimo.

²² Gikategiso gya Pfhumu Nungungulu gya gu resa gufuma, gambe gu dzi garadza gwathu kha gu engedzeli gilo avbo.

²³ Gipumbu gya gu gira silo nya guvivbe khwatshi guhagana, aholu muthu nya gutale khu mapimo, a gu vbweta guti.

²⁴ Muthu nya guvivbedwe khu monyo a na thegela ga igyo a gi thavago, aholu muthu nya gululame, Nungungulu a na mu ninga iso a si vbwetago.

²⁵ Va nya guvivbedwa khu monyo va guvbindra kha nga gipupwane, aholu muthu nya gululame, a na simama a tiya kala gupindruga.

²⁶ Kha nga ginageri gi tsavelago magwahani, ni wutshi wu vbandzago mahoni, kharato nuye muthu nya wugara, ga vale va mu rumago.

²⁷ Githawo ga Pfhumu Nungungulu, gi ngu engedzela matshigu nya guvbanye, aholu matshigu ya sighohi, ma na vbungudwa.

²⁸ Gitumbo gya vathu va lulamidego gya gu hegisa khu litsako, aholu gya va nya guvivbedwa khu monyo, khu gumbemba.

²⁹ Ndzila ya Pfhumu Nungungulu, likhokhola la va nya gululama, aholu gumbembiswa ga vale va girago guvivba.

³⁰ Muthu nya gululame gima kha na kutsungwa khu gilo, aholu avo nya guvivbedwe khu monyo, kha va na khala mafuni momu.

³¹ Khu kanani ga muthu nya mapimo, gu duga wugengeli, aholu lidimi nya gipumbu li na pidwa.

³² Khu maganani ga vathu va lulamidego gu duga lisine, aholu, khumo sighohi gu duga wudambane.