Mavingu 1 - Bhibhiliya Nya Guage

I. GIPANDRE NYA GUPHELE: GINANI GUTI? Magana nya gutule

¹ Aya khu mavingu ya Solomoni, mwamana wa Dhavhidhe, mufumeli wa Israyeli,

² gasi gu hevbula guti ni wugengeli ni gu pima magana nya guete,

³ ma ngu ninga vathu sileletelo nya mavbanyelo nya yadi, mavbanyelo ma lulamidego ni makhalelo nya yadi;

⁴ mavingu ma ngu gengedzisa avo nyambana mano, ma ninga madzaha wugengeli ni gupimisa.

⁵ Muthu nya guti a gu mapwa, a gu engedzela mapimo, ni muthu nya guti a na mana milayo nya wuhevbudzi nya wadi,

⁶ nya gupime mavingu ni guti sipimaniso; gumogo ni magana nya guti ni misihalo ya va nya guti.

⁷ Gu thava Nungungulu khilo litshina nya guti, sipumbu sa gu nyenya guti ni sihevbudzo.

Siluleko nya guti

⁸ Mwanangu, yingisa sileletelo sa babe wago, u nga kanyisi sihevbudzo sa mayi wago,

⁹ isoso si na khala nari gihugu nya wumburi hungoni gwago ni wulungu nya gumburise thamoni gwago.

¹⁰ Mwanangu, u nga dzumeli gu sengwa khu sighohi.

¹¹ Va gu gu embela, khavo: “Hongole. Hi ya sihalela vathu va gumwalo nandru gasi hi vbaladza novba wawe,

¹² hongoleni hi va midza na va nga gu vbanya, kha nga lithowo; khwatshi khu vale va relelago phalani.

¹³ Hi na mana satshavbo nya sadi hi si vbwetago, hi tadza dzinyumba dzathu khiso nya guphangwe,

¹⁴ bela tsawani gwathu, kholu kwama wathu wu na bani wuri moyo.”

¹⁵ Mwanangu, u nga tshuki u longoloka ni vathu nya nga avovo, ndreya ga ndzila va gimbilago khiyo.

¹⁶ Kholu avo va gu tutumela umo nya guvivbe, va vbiredzela gu vbaladza novba.

¹⁷ Khu lisine kha si phasi gilo gu demba naphwi sinyoni na si gu wona.

¹⁸ Vathu vovo navo, kha va dziti gukhavo va gu dzi dembela vabune naphwi wu na gu vbaladzago novba wawe va dzi kambula vabune.

¹⁹ Aya khu mahegiso nya vatshavbo va nya lidiwo ni wuphangi, va gufa khu wuphangi wawe.

Magana nya guti

²⁰ Guti gwa gu khusa lito li pwala mudzindzilani ni mitendrelani nya madhoropa.

²¹ Gwa gu laledza khu mahandzakanyani nya dzindzila, gupwala ni dzinyangwani nya madhoropa, khugo:

²² “Enu sipumbu, kala lini na mu nga gu hamuga mano? Ni enu vatseketseli, kala lini na mu nga gu gola gutseketsela? Enu sipumbu, kala lini na mu gu bomba gu nyi yingisa?

²³ Vbindrugedzani mu yingisa gu kawuka gwangu, nyi na mi thela liphuvbo langu ndrani gwanu, nyi na mi gira muti magana yangu.

²⁴ Kholu nyi mi ranide, aholu mwalo a nyi hakhidego, nyi thawuludzide mandza yangu, aholu mwalo a nga khathalago.

²⁵ Kha nga olu, mu bombidego sileletelo sangu, mu si yingisi gukawuka gwangu,

²⁶ khu guralo, eni neni nyi na mi hega litshigu mu na dugedwago khu mhango, gikhati mu ndrendremelago, eni nyi na mi tsorodzela;

²⁷ khu gu mi wona na mu gu tedwa khu hwanga nya nga gingulu ni mhango nya nga gipupwane, ni avbo mu na gu vbohedwago khu miketo ni wuvi.

²⁸ Khu guralo, mu na nyi rana, aholu kha nyi na mi hakha, mu na nyi vbweta, aholu kha mu na nyi mana.

²⁹ Kholu mu di bomba guti, mu si dzumeli guthava Pfhumu Nungungulu;

³⁰ mu di nyenya gu landrisa sileletelo sangu satshavbo, mu kanyisa gukawuka gwangu gwatshavbo.

³¹ Khu guralo, va na hodza handro nya mithumo yawe, va khura khu gupimisa gwawe.

³² Kholu sipumbu si nafa khu gumba yingisa gwawe, ni va nyambana mapimo, va na dzi kembela liphala khu gumba dzi garadza khu gilo.

³³ Aholu uye a nyi yingisago, a na vbanya gurulani na tiyide nyambana hwanga, a si thavi gilo.”