Matewu 23 - Bhibhiliya Nya Guage

Jesu a ngu ninga nandru Vafarisi ni vahevbudzi nya Nayo

¹ Khavbo avbo, Jesu a di ganela vbakari nya gidzemo ni vapizane, khuye:

² Vahevbudzi nya nayo ni Vafarisi va tshikedzide wulanga wa Mosi thumoni nya gutshamusele Nayo.

³ Khu kharato, girani ni gu landrisa satshavbo iso va mi embelago, aholu mu nga landri mithumo yawe, kholu va gu ganela, va si si vbanyi.

⁴ Va gu hunga dzinyandra nya gulemele ngudzu, va rwega vakwawe, narigu avo kha va dzi kuhi, ambari khu nyala yinene.

⁵ Satshavbo va girago, va gufela gu wonwa khu vathu. Khu kharato va gu gudzisela mikeka nya milayo va hungago vbagiwombotunu ni mawogoni va laphisa matshakafula nya dzingandzu dzawe.

⁶ Va gola gu khala malangani nya guphele umo nya sipfhitsha numo nya dzinyumba nya nombelo.

⁷ Va gu gola gu loswa khu githawo vathuni ni gu ranwa khu vathu, pwani Muhevbudzi!

⁸ Gasi enu mu nga dzumelini gu ranwa Muhevbudzi khu muthu, kholu muhevbudzi wanu moyo basi; enu mwatshavbo mu vandruye.

⁹ Tigoni momu mu nga rani muthu, khenu: “Baba,” kholu Babe wanu moyo basi. Khu wule a guromo Ndzadzini.

¹⁰ Mu nga dzumelini gu ranwa pwani muthangeli, kholu muthangeli vbakari gwanu moyo basi, khu Kristo.

¹¹ Uye a gu khongolo vbakari gwanu a na bani ari uye githumi gyanu.

¹² Uye a dzi khusedzago a na sodziswa; gasi uye a dzi sodzisago a na khusedzwa.

¹³ Libango gwanu, enu vapfhadzi, vahevbudzi nya Nayo ni Vafarisi, kholu mu ngu segela vathu malimba nya Mufumo wa Ndzadzini; kha mu beli enu, gambe kha mu digi va bela avo va dzinago.

¹⁴ Libango gwanu, enu vapfhadzi, vahevbudzi nya Nayo ni Vafarisi, mu phangago sifurugadzi mudzindrangani dzawe, na mu gu pfhadza gu gira milombelo nya gulaphe ngudzu. Khu kharato gulamudwa gwanu gu na bani guri gwa gulemela.

¹⁵ Libango gwanu, enu vapfhadzi, vahevbudzi nya Nayo ni Vafarisi, mu legalegago ni mayigo, mu khilela mataro mu gimbila mu vbweta mupizane moyo basi. Na mu mu mane, mwa gu mu nyenyezisa nyondro mbili guvbindra enu, a gu fanedwa khu gu rinywa phalani nya nilo.

¹⁶ Libango gwanu, sikhumunu, mu vbwetago gu phara kunga sikhumu sikwanu, na mu gukhenu: “Uye a sambanyago khu lina nya Nyumba ya Nungungulu mwalo giguruvedzo gya gilo, aholu uye a sambanyago khu ndralama yi gomo Nyumbani ga Nungungulu a na ni giguruvedzo nya gulandrise gisambanyo gyaye.”

¹⁷ Sipumbunu nya gupate ni wukhumu gumogo! Khu gevbi gi gu gikhongolo guvbindra gikwawe? Khu ndralama, mwendro khu Nyumba ya Nungungulu yi gu iyo yi agisago ndralama?

¹⁸ Gambe khenu mu hevbudzago, khenu: “Uye a sambanyago khu giluvelo mwalo giguruvedzo gya gilo; aholu a gu sambanya khu ningelo wu guromo vbagiluvelotunu a na ni giguruvedzo nya gulandrise gisambanyo gyaye.”

¹⁹ Sikhumunu! Khu gevbini gi gu gikhongolo guvbindra gikwawe? Khu ningelo, mwendro khu giluvelo, gi gu igyo gi agisago ningelo?

²⁰ Khu kharato, gusambanya khu giluvelo khidzosaye ni gusambanya khu lina nya giluvelo ni satshavbo si guromo vbatshani nya giluvelo;

²¹ gu sambanya khu Nyumba ya Nungungulu khidzosaye ni gu sambanya khu lina la Nungungulu a vbanyago umo.

²² Gusambanya khu ndzadzi khidzosaye ni gu sambanya khu gikhalo nya Mufumo wa Nungungulu ni wule a khalago khavbo.

²³ Libango gwanu, vapfhadzi nenu, vahevbudzi nya Nayo ni Vafarisi, mu hengago gikhaba nya mitongwe yatshavbo, nesi nya gupitele kiso guhodza, aholu mu si theli kota khu litshina nya milayo yatshavbo, a gu: Gululama, wuhindzi, ni gutumbega. Esi khiso mu nga vbweta gu phela khiso mu gira, nyamba diga sile simbe.

²⁴ Vaphari nya kunga wa sikhumu mu hutago tshuna mu midza ngameriya!

²⁵ “Libango gwanu, vahevbudzi nya Nayo ni Vafarisi, kholu mwa gu handza mbiya ni khokho khu vbavbandze, narigu ndrani gakone si tade khu wuvafa ni ndrwadza.”

²⁶ Gikhumuwe, mufarisi, guphela handza ndrani nya mbiya ni khokho, gasi vbavbandze gakone gu kodza nugo guaga.

²⁷ Yuyu va nya libangonu, vapfhadzi, vahevbudzi nya Nayo ni Vafarisi, kholu mu ngu fanana ni marowo ma gu ni phembe nya guage, ma mburisedwa gwadi khu vbavbandze, nari gu khu ndrani ma tade khu marambo ni mahine.

²⁸ Kharato nenu, khu vbavbandze, mwa gu khala nga vathu vathu; gasilo, khu ndrani, mu tade khu malipha ni ndrwadza.

²⁹ Libango gwanu, vapfhadzi, vahevbudzi nya Nayo ni Vafarisi, mu girago siwindri marowoni ya vaprofeti, bwelo khavbo mu mburisela marowo ya va nya ndruda, na mu gukhenu:

³⁰ “Nari pwani hi di vbanyide gikhati gya vababe vathu na ha sa hengela navo gu songa vaprofeti.”

³¹ Kharati mu ngu dzi thuledza gukhenu mu sanana sa vale va nga songago vaprofeti.

³² Tadziselani mwabune gipimo gya vababe vanu!

³³ Enu livelego nya dzinyoga! Mu na vbulugisa gu wani gu rinywa phalani nya nilo?

³⁴ Khu kharato, nyi ngu mi rumelani vaprofeti, va nya guti ni vahevbudzi. Vambe mu na va songa, vambe mu va khokhothela; gasi vambe mu na va kwamula umo nya dzinyumba nya milombelo ni gu va tutumisani madhoropani gwanu gwatshavbo,

³⁵ gasi gu novba watshavbo wa va nya ndruda wu vbalagele vbatshani gwanu, nya nga uwo wu nga vbaladzwago gukhugela gu songwa gwa Abheli, mululami, kala ugo gwa Zakariya, mwamana wa Bherekiya, mu nga mu songago vbakari nya makhuvi nya guagiswe nya Nyumba ya Nungungulu ni giluvelo.

³⁶ Khu lisine nyi ngu mi embelani nya gukheni khu kota nya silo sesi satshavbo gu nata tsayiso ga mela yoyu!

Jesu a ngu lilela Jerusalema

³⁷ “Jerusalema, u songago vaprofeti ni gu pfara khu siwindri avo u rumedwago! Dzinyondro dzingani nyi vbwetidego gu tshanganisa sanana sago kha nga mbaha nya khugu wu fundramelago sitshondryana saye vbavbatshi nya mambapi yaye, u si dzumeli!”

³⁸ Khu kharato, ndranga yanu yi na tshala giwula,

³⁹ kholu nyi ngu mi embelani, kheni: Kha mu na nyi wona gambe kala litshigu mu na gu ganelago, khenu: “Kategide uye a tago khu lina la Pfhumu.”