Matewu 14 - Bhibhiliya Nya Guage

Gu songwa ga Johane mubhapatisi

¹ Khu gikhati gyogyo, ndruma ya Jesu yi di vboha dzindzeveni ga mufumeli Herodhi.

² Uye a di embela sithumi saye, khuye: “Muthu yoyo khu Johane mubhapatisi a nga wugago khu ga vafudego! Khu kharato a manago tshivba nya gugire khiyo siliwugiso satshavbo sesi!”

³ Khaguva khuye Herodhi a nga rumela gu modwa Johane a hungwa dzitshinga, a thedwa pasoni, khu kotani ya Herodhiya, mwangadzi wa ndriyaye, Filipi.

⁴ Kholu Johane a di gu mu embela, khuye: “U mwalo fanelo nya gu mu dzege a khala mwangadzi wago.”

⁵ A di dogorede gu mu songa, aholu a di thava vathu, va nga bani va gu muti kha nga muprofeti.

⁶ Litshigu Herodhi a nga enedzago myaga nya guvelegwe gwaye, a di gira buzo. Nyamahegyane wa Herodhiya a di hana vbakari nya vathu, a gu tsakisa Herodhi.

⁷ Herodhi a di sambanya khuye a na mu ninga ni gevbini igyo a na gu mu lombago.

⁸ Na phede gu khu laywa khu mayi waye, nyamahegyane wule a di mu embela, khuye: “Nyi ninge, mbiyani momu, hungo wa Johane mubhapatisi.”

⁹ Mufumeli a di garadzega aholu, khu kotani nya gisambanyo a nga girago ni vale a nga bani nari navo vbamezatunu, a di ruma gukhuye va mu resele.

¹⁰ A di ruma, gu pidwa hungo wa Johane mubhapatisi a nga bani a romo pasoni.

¹¹ Na va reside hungo khu mbiyani, va di wu ningela ga nyamahegyane, a wu yisa ga mayi waye.

¹² Vapizane va Johane, va dita dzega girumbi vaya dzinga. Khavbo avbo, va diya tivisa ga Jesu.

Jesu a ngu hodzisa livbandre magumi mazana vathu

¹³ Jesu, na pwide esi, a di bela ngalavani a khuga khu vbale a gu hongola wulangani nya giwula, gu nga bani guri hwindzwana; aholu vathu, na va dzitide, va di mu landra khu mawundru, gukhugela madhoropani gwawe.

¹⁴ Na gu tshiga khu ngalavani, Jesu a di wona gidzemo nya gingi. A di pwa gisiro, a gu hawulugisa vadwali vawe.

¹⁵ Ni silambwana, vapizane va di ya ga Jesu vaya, khavo: “Lidambo li hwide, nari gu wulanga wowu giwula; va bweledze, gasi va kodze gu gimbila va renga gilogyo nya guhodze mitalalani ya vbafuvbyana momu.”

¹⁶ Aholu Jesu a di va hakha, khuye: “Va nga hongoli; va ningeni kamwe enu guhodza.”

¹⁷ Aholu va di hakha, khavo: “Hi mwalo gilo, avba igyo hi gu nagyo livbandre sibaba ni dzindzandzi dzimbili basi.”

¹⁸ Jesu a di va embela, khuye: “Si reseni eno gwangu.”

¹⁹ Hwane nya gu bani a rumide gidzemo gu khala vbavbatshi, avbo wu nga bani wu romo mwasi, a di dzega sibaba sile nya livbandre ni dzindzandzi dzimbili, a gu khusedza maho, a si kategisa; a di pilela sibaba a gu si ningela ga vapizane, avo va si kabanisela gidzemo.

²⁰ Vatshavbo va di hodza, va khura. Khu sipandre si nga tshalago va di tadza likhumi na sivili situndru.

²¹ Avo va nga hodzago va diri tengo nya livbandre magumi mazana (5.000) vama, nyamba sayela vanyamayi ni sanana.

Jesu a ngu gimbila vbatshani nya mati

²² Khavbo avbo, Jesu a di ruma vapizane vaye gu bela ngalavani va bani va tshatuga, uye na nga gu vbanganana ni vathu.

²³ Na vbanganide gidzemo, a di gwela gigomoni, gasi guya lombelela enga. A di pfoledwa khu lidambo vbale, nari uye enga.

²⁴ Gikhati gyogyo, ngalava yi diromo vbakari nya mati, na yi gu vetwa khu mavimbi, kholu va di hambana ni phuvbo.

²⁵ Aholu ni marandra gugya Jesu a di va yela, na gu gimbila khu vbatshani nya mati.

²⁶ Na va mu wone na gu gimbila khu vbatshani nya mati, vapizane va di thuruga, va gulumela, khavo: “Gikono!”

²⁷ Khavbo avbo, Jesu a di va embela, khuye: “Rulani, mu nga thavi, kheni!”

²⁸ Pedro a di mu hakha, khuye: “Wa gu bani uri uwe, Pfhumu, nyi rane nyite iyoyo gwago khu vbatshani nya mati.”

²⁹ Jesu, khuye: “Delu.” Pedro, na tshigide khu ngalavani, a di khinga Jesu khu vbatshani nya mati.

³⁰ Aholu, na pwide tshivba nya phuvbo yi nga bani yi gu furugedza ngudzu, a di khala hwanga, a gu phela gurika. Khavbo avbo, a di womba huwa, khuye: “Nyi vbanyise, Pfhumu!”

³¹ Khavbo avbo, Jesu a di mu phara khu libogo, a mu embela, khuye: “Muthu nya gukhodwe vbadugwana, khu ginani u nga kanakanago?”

³² Na va bede ngalavani, phuvbo yi di degula.

³³ Vatshavbo va nga bani varomo ngalavani, va di khidzima migondroni ga Jesu, va gu mu embela, khavo: “Khu lisine u Mwamana wa Nungungulu!”

Jesu a ngu hawulugisa vadwali tigoni ga Genezare

³⁴ Na va tshatugide, va di tshigela tigoni ga Genezare.

³⁵ Na va mu tide khavo khuye, vathu va tigoni mule, va di tivisana vatshavbo. Khavbo avbo, va di mu resela vadwali vawe vatshavbo.

³⁶ Vata mu lomba gukhavo a va dzumedzise gu kuha tshoka nya libhadzi laye. Vatshavbo avo va nga yi kuhago, va di hawulugiswa madwali yawe yatshavbo.