Matewu 13 - Bhibhiliya Nya Guage

Gipimaniso nya muyali

¹ Litshigu lile, Jesu a di khuga khu ndrangani a hongola siwoni aya khala.

² A di ya randredwa khu vathu nya vangi ngudzu, gu nga mu girago a bela ngalavani a khala, gidzemo gi ema khu funguni.

³ Khu vbale, a di va hevbudza silo nya singi khu sipimaniso, a va embela, khuye: “Nga wonani, muyali a di duga gasi guya yala mbewu yaye.

⁴ Na gu swaya, yimbe mbewu, yi di thegela bambe nya ndzila; si dita sinyoni sita yi rothela.

⁵ Yimbe yi di thegela musiwindrini, umo ma nga bani mari mwalo mafu nya mangi; mbewu yi di vbiredzela gu buga, kholu mafu yakone kha ma nga bani ma etide ngudzu.

⁶ Aholu, na li vbiside lihani, yi divbya. Kholu yi nga bani yiri mwalo mikhamba, yi di banga.

⁷ Yimbe yi di thegela mibani; miba yi di dandra yi midza mbewu yile.

⁸ Gasi khu guhegisa, yimbe yi thegela wulimeni nya wadi, yi di thela mihandro: Dzomo dzi nga thela lizana; dzimbe, livbandre na limwedo magumi; dzimbe, magumararu dzimbewu.

⁹ Uye a gu ni dzindzeve nya guyingise, a napwe!”

Khu ginani a ganelago khu sipimaniso

¹⁰ Khavbo avbo, vapizane va di mu yela vaya mu wudzisa, khavo: “Khu ginani u ganelago navo khu sipimaniso?”

¹¹ A di va hakha, khuye: “Kholu enu, mu ningidwe guti misihalo nya Mufumo wa Ndzadzini, gasi avo va mwalo giningwa gyogyo.

¹² Kholu uye a gu naso a na engedzedwa, a gu mana nya singi; gasi uye a gu mwalo gilo ambari iso a gu naso, a na dzegedwa.

¹³ Khiso isoso si nyi girago gu eni nyi ganela navo khu sipimaniso, kholu va ngu ronoga nyamba wona gilo; ni gu yingisa nyamba pwisisa.

¹⁴ Ma ngu tadzisega gwawe mahungu ya muprofeti Isaya, ma gukhayo: ‘Gupwa mu na pwa, aholu kha mu na pima gilo; na mu khedzide, mu na ronoga, aholu kha mu na wona gilo.

¹⁵ Kholu myonyo ya vathu vava yi bangide, va segide dzindzeve ni maho yawe, gasi va si woni khu maho, va si yingisi khu dzindzeve, ni gu mana gwadi tshamuselo wakone, va vbindrugedze mavbanyelo, gasi eni nyi va vbanyise.’

¹⁶ “Gasi enu sanu, ma kategide maho yanu, kholu ma ngu wona; ni dzindzeve dzanu, kholu dzi ngupwa.

¹⁷ Khu lisine nyi ngu mi embelani nya gukheni: Vaprofeti nya vangi ni va nya ndruda va vbwetide gu wona iso mu si wonago, aholu kha va si wona; ni gupwa iso mu si pwago, aholu kha va si pwa gilo.

Tshamuselo nya gipimaniso

¹⁸ “Yingisani, nyi mi embele tshamuselo nya gipimaniso nya muyali.

¹⁹ Muthu a gupwa mahungu nya Mufumo a si ma pimi ma gu thula ginani, a nata Sathane ata fugula iso si nga bani na si yadwe monyoni gwaye. Egi khu gipimaniso nya mbewu nya guthegele bambe nya ndzila.

²⁰ Mbewu yi nga thegela musiwindrini, khu wule apwago mahungu, a ma hakha khu gunengela gikhatinyana gyogyo.

²¹ Kha nga ulo a gu mwalo mikhamba, kha tiya: Sa gu vboha sigaradzo ni sisaniseko khu kotani nya mahungu, a gu dzegela gu ma diga.

²² Mbewu yi nga thegela mibani, khu wule a pwago mahungu; aholu sigaradzo nya guvbanye ni dzithomba nya mafu si midza mahungu, ma hegisago khu gumba thela gilo.

²³ Aholu mbewu yi nga yadwago wulimeni nya wadi, khu wule a pwago mahungu a ma ti ma gu thula ginani: Oyu a ngu thela mihandro nya yingi: Lizana, livbandre na limwedo magumi, magumararu.”

Gipimaniso nya nyasavare

²⁴ Jesu a di va ninga gimbe gipimaniso, khuye: “Mufumo wa Ndzadzini wu ngu fanana ni muthu a nga yalago mbewu nya yadi thembweni gwaye.

²⁵ Ni wutshigu, vathu na va lade, a di ta nala waye a ta yala nyasavare vbakari nya mavbila, a gu hongola.

²⁶ Na ma dandride mavbila, ma thela mihandro, wu di manega nuwo nyasavare.

²⁷ Sithumi sakone si diya ga mune ndranga si ya, khiso: ‘Pfhumu, khandri u di yala basi mbewu nya yadi thembweni gwago, gani? Nyasavare wa guta khu hayi?’

²⁸ A di va hakha, khuye: ‘Nala wangu khuye a giridego isoso.’ Sithumi si di mu wudzisa, khiso: ‘U ngu dzina gukhuwe hi ya wu kulela, gani?’

²⁹ A di va hakha, khuye: Ahihi, kholu mu nga phazamani avbo mu kulago nyasavare, mu kula gumogo ni mavbila.

³⁰ Si digeni si dandre satshavbo kala gu vboha nango nya guvbwere; gikhati gyogyo nyi na embela vavbweri, kheni: Dusani guphela nyasavare, mu wu hunga khu dzinyandra mu vbisa; gasi mavbila, ma pileni, mu ma thela gisangalani gwangu.”

Mbewu nya ginapi

³¹ Jesu a di va ninga gimbe gipimaniso, khuye: “Mufumo wa Ndzadzini wu ngu fanana ni mbewu nya ginapi, muthu a nga yi dzegago a yala thembweni gwaye.

³² Iyo yi dugwana guvbindra dzimbewu dzatshavbo, aholu, na yi dandride, yi ngu vbindra mitongwe yatshavbo ya thembweni, yi gu khala simbo nya khongolo, wu thela matamo, sinyoni sa damboni si tago sita vbahela umo sihaga sawe.”

³³ Jesu a di va ninga gambe gimbe gipimaniso, khuye: “Mufumo wa Ndzadzini wu ngu fanana ni mela wu nga dzegwago khu nyamayi moyo a wu pfanga ni ndrengo tharu nya wuguvbi, kala wu gugumugisa wuguvbi watshavbo.”

Jesu a ngu thumisa sipimaniso

³⁴ Jesu a di ganela satshavbo sesi khu sipimaniso vbakari nya gidzemo; gimwalo a nga ganela vbakari gwawe nyamba va embela khu sipimaniso.

³⁵ Gasi gutadzisega kharati, magana ya muprofeti, a nga khuye: “Nyi na ganela khu sipimaniso, gasi gu tivisa silo si nga bani si sihalegide gukhugela guvangwa nya litigo.”

Tshamuselo nya gipimaniso nya nyasavare

³⁶ Khavbo avbo, a di diga gidzemo a gu hongola gaya; vapizane va di mu yela vaya, khavo: “Hi tshamusele gipimaniso nya nyasavare thembweni.”

³⁷ Uye a di va hakha, khuye: “Wule a yalago mbewu nya yadi, khu Mwamana wa Muthu.

³⁸ Lithembwe khu litigo; mbewu nya yadi khu sanana nya Mufumo; nyasavare khu sanana sa Sathane;

³⁹ nala a nga yalago nyasavare khu Sathane. Gu vbwera khu guhegisa nya litigo; vavbweri khu dzingilozi.

⁴⁰ Khu kharato, kha nga nyasavare wu kokedwago wu vbiswa niloni, kharato nugo gu na girega guhegisani nya litigo:

⁴¹ Mwamana wa Muthu a na rumela dzingilozi dzaye dzi dusela Mufumoni gwaye satshavbo sikhunguvanyiso ni ava va girago guvivba,

⁴² si va rinya niloni, umo va na guya lilago ni gu ketsa magwaha.

⁴³ Gasi va nya ndruda va na ngangamela kha nga lidambo, mufumoni wa Babe wawe. Uye a gu ni dzindzeve a na yingise.

Gipimaniso nya thomba ni ndralama

⁴⁴ “Mufumo wa Ndzadzini wu ngu fanana ni thomba yi nga sihwago mahangeni yi gu tugudwa khu muthu, a yi fulusa a yi siha wumbe wulanga. Na tade khu gunengela, a di ya rengisa satshavbo a nga bani ari naso, gasi gu renga mahange yale.

⁴⁵ Mufumo wa Ndzadzini wu ngu fanana gambe ni muthu nya wugwewo, a vbwetago dzindralama nya dzadi.

⁴⁶ Na mane ndralama mweyo nya gurengwe khu dzitsapawu nya dzingi, a di hongola aya rengisa satshavbo a gu naso, gasi gu renga ndralama yile.

Gipimaniso nya dzikhoga

⁴⁷ “Mufumo wa Ndzadzini wu ngu fanana gambe ni dzikhoga dzi theswago matini dzi mola mafumbu yatshavbo nya dzindzandzi.

⁴⁸ Na dzi tade, dzi ngu ndrindredwa dzi duswa funguni, avbo vagogi va hathelago dzindzandzi, idzo nya dzadi va thela lisengweni, idzo nyamba dzadi va dzi dzudzuga.

⁴⁹ Khidzo kharati gu na giregago guhegisani nya litigo: Dzi na duga dzingilozi dzi ta hambanisa avo nyamba vadi vbakari nya va nya ndruda,

⁵⁰ dzi va rinya niloni, umo va na gu lilago ni gu khukhurusa magwaha.

Silo nya siphya niso sa gale

⁵¹ “Mu si mane satshavbo sesi nyi mi embedego, gani?” Va di hakha, khavo: “Ina.”

⁵² Khavbo avbo, a di va embela, khuye: “Khu kharato, muhevbudzi watshavbo nya Nayo a hevbudego iso si lumbago Mufumo wa Ndzadzini a ngu fanana ni mune ndranga a dusago khumo nya thomba yaye silo nya siphya niso sa gale.”

⁵³ Hwane nya gu na vbedzide gu va ninga sipimaniso sesi, Jesu a di khuga khu vbale.

Jesu kha hakhwi tigoni gwa Nazareta

⁵⁴ Na vbohide tigoni gwawe, a di va hevbudza nyumbani nya nombelo. Vatshavbo va di tala khu guliwuga, va gu wudzisana, khavo: “A gu gu mana hayi guti gogu ni tshivba nya gugire siliwugiso?

⁵⁵ Ina khandruye oyu mwamana wa muvati, gani? Ina mayi waye khandri Mariya? Vandriyaye khandri Jakobe, ni Josefe, ni Simoni ni Judha?

⁵⁶ Vandriyaye nya vanyamayi khandravo hi vbanyago navo tigoni momu? A gu si mana hayi satshavbo sesi?”

⁵⁷ Khu kharato, va di hiwa khuye. Aholu, Jesu a di va embela, khuye: “Muprofeti a gu nyenywa basi tigoni ni ndrangani gwawe.”

⁵⁸ Kha dzi kodza gu gira vbale siliwugiso nya singi khu kotani nya gumba khodwa nya vathu vale.