Marko 4 - Bhibhiliya Nya Guage

Gipimaniso nya muyali

¹ Jesu na gu hevbudza nyaluphye siwoni a diya khala a randredwa khu gidzemo nya gingi. Khu kharato, a di bela ngalavani yi nga bani yiri matini, gasi gidzemo gi di khala siwoni.

² A di va hevbudza silo nya singi ngudzu khu sipimaniso. Musihevbudzoni gwaye a di va embela, khuye:

³ “Nga yingisani! Muyali nya gukari a di hongola aya yala mbewu yaye.

⁴ Na gu yala, yimbe mbewu yi di thegela bambe nya ndzila, si guta sinyoni sita yi rothela.

⁵ Yimbe yi di thegela musiwindrini, umo ma nga bani mari mwalo mafu nya mangi; mbewu yi di vbiredza gu buga, kholu mafu yakone kha ma nga eta ngudzu.

⁶ Aholu, na li vbiside lihani, yi divbya yi banga, khu gumbana mikhamba.

⁷ Yimbe yi di thegela mibani; miba yi di dandra yi gu midza mbewu yeyi. Khu kharato kha ya thela mihandro.

⁸ Gasi yimbe yi di thegela muwulimeni nya wadi, yi thela mihandro nya yadi dzimbe dzimbewu dzi di thela magumararu mihandro, dzimbe, livbandre na limwedo magumi, dzimbe lizana.”

⁹ Khavbo avbo, a di khuye: “Uye a gu ni dzindzeve nya guyingise a napwe.”

Tshamuselo nya sipimaniso

¹⁰ Na va tshade venga, ava va nga bani va mu randrede gumogo ni vale nya likhumi na vavili, va di wudzisa Jesu tshamuselo nya sipimaniso sesi.

¹¹ A di va hakha, khuye: Ga enu, mu ngu tiviswa misihalo nya Mufumo waye, gasi vale va guromo khu vbavbandze, satshavbo silo sesi, va gu embedwa khu sipimaniso,

¹² gasi: Va khedzisa va wona, aholu va si woni gilo; va yingisa, aholu va si si mani; kholu, va nga vbindrugedza mavbanyelo va gu tsetseledwa sighoho sawe.

Tshamuselo nya gipimaniso nya muyali

¹³ Khavbo avbo, Jesu a di va wudzisa, khuye: “Ina kha mu wuti tshamuselo nya gipimaniso gegi, gani? Mu na wuti kharini tshamuselo nya simbe sipimaniso?

¹⁴ Muyali a gu yala Mahungu.

¹⁵ Dzimbewu dzi nga thegelago bambe nya ndzila, khu vale va nga hevbudzwa mahungu. Aholu, na va ma pwide, khu gu vbiredza a di vboha Sathane a ta dusa mahungu ma nga yadwago myonyoni gwawe.

¹⁶ Kharato nugo, mbewu yi thegelago siwindrini, khu vale va pwago mahungu, va vbiredza gu ma hakha khu gutsaka.

¹⁷ Aholu avo va mwalo mikhamba, khu kharato, kha va tiya. Va gu mana silingo ni sigaradzo khu kotani nya Mahungu, va gu dzegela gu ma diga.

¹⁸ Mbewu yi thegelago vbakari nya miba khu vale va hakhago mahungu,

¹⁹ aholu, va gu dzi garadza khu silo nya mafu, va gu padwa khu dzithomba ni gudogorela mafumbo yatshavbo nya silo; satshavbo esi si ngu midza mahungu ma si theli mihandro myonyoni gwawe.

²⁰ Mbewu yi thegedego wulimeni nya wadi khu vale va pwago mahungu va gu ma hakha, va gu thela mihandro, yimbe yi gu ninga magumararu, yimbe livbandre na limwedo ni yimbe lizana dzimbewu mweyo khu mweyo.”

Gipimaniso nya kandriya

²¹ A di engedza gambe, khuye: “Ina gu ngu kodzega gu rothwa kandriya yi fenengedzwa khu gitundru, mwendro gu vegwa khwitshini, gani? Khandri ya gu vegwa wulangani yi dzi kodzago gu wenengedza nyumbani gatshavbo, gani?

²² Kholu gi mwalo gi sihadego gi na gumba wonegiswa; kha nga gambe gi mwalo gi girwago khu gisihaledza gi na gumba tugudwa.

²³ Oyu a gu ni dzindzeve nya guyingise a napwe.”

²⁴ A di engedza gambe, khuye: “Gengelani gwadi khu iso mu si pwago: Ndrengo mu na gu pimago khiyo mu na pimedwa nenu khiyo khu Nungungulu bwelo khavbo mu gu tadzisedwa.

²⁵ Kholu oyu a gu naso a na engedzedwa, gasi uye a gu mwalo gilo, ambari iso nya sidugwana a gu naso, a na dzegedwa.”

²⁶ A di ganela gambe, khuye: “Mufumo wa Nungungulu wu ngu fanana ni muthu a yalago mbewu mafuni.”

²⁷ Gani lade, gani a ngu wuga, gani wutshigu gani mihani, iyo mbewu ya gu buga yi dandra na si dziti magirelo muni.

²⁸ Mafu khayo ma gu ni tshivba nya gu bugise, guhegula ya gu buga litshina, gu handzamedza mahongwe, gu landrela makonva a gu ayo ma thelago dzimbewu.

²⁹ Na dzi vidzidwe dzimbewu dza gu vbwerwa, kholu nango nya guvbwere gu bani yi vbohide.

Gipimaniso nya mbewu nya ginapi

³⁰ A di engedza gambe, khuye: “Hi na wu fananisa ni ginani Mufumo wa Nungungulu? Gipimaniso muni hi na wu fananisago khigyo?

³¹ Wu ngu fanana ni thanga nya ginapi yi yadwago thembweni na yiri yidugwana ga dzimbewu dzatshavbo dza tigoni.

³² Aholu, na yi yadwe, yi ngu buga yi gu dandra guvbindra mitongwe yatshavbo, yi gu thela matamo nya makhongolo, ma girago mutsa, sinyoni sa Ndzadzini si dzi kodza guta girela umo sihaga sawe.”

³³ Khu sipimaniso nya singi nya nga esi, Jesu a di va hevbudza Mahungu ya Nungungulu, kha nga idzo mapimo yawe ma nga bani ma gu kodza gupwa khidzo.

³⁴ Vbakari nya vathu a di ganela khu sipimaniso, aholu, khu phuvbo a di tshamusela satshavbo vapizane vaye.

Jesu a ngu rudzisa phuvbo

³⁵ Khu litshigu lile, na li hwide, a di embela vapizane vaye, khuye: “Hongoleni hi tshatuga hiya khisikheyi.”

³⁶ Khavbo avbo, va di tshiya gidzemo, va tshatuga ni Jesu khu ngalava a nga bani nari umo. Dzimbe dzingalava dzi di mu bangaladza.

³⁷ Yi di duga phuvbo nya yikhongolo; mavimbi nya mangi ma di bela ngalavani, avbo ngalava yi nga phela gutala khu mati.

³⁸ Jesu a di lade gisaloni a gu khighela vbagikhuledzotunu; va di mu wusa, khavo: “Muhevbudzi, ina khu theli kota khu ethu hi mbembago, gani?”

³⁹ Khavbo avbo, na wugide, a di kawuka phuvbo, a embela yiphwa, khuye: “Degula! Rula!” Phuvbo yi di dzegela gu degula, gu manega malenga nya makhongolo.

⁴⁰ Khavbo avbo, a di va embela, khuye: “Khu ginani mu thavago ngudzu? Ina mu si gu khodwi, gani?”

⁴¹ Avo va di ndrendremela ngudzu va gu wudzisana khu gyawe, khavo: “Gasi khu mani oyu nya gu ambari phuvbo ni mavimbi si mu yingela?”