Malakiya 4 - Bhibhiliya Nya Guage

Litshigu la Pfhumu

¹ Kholu wonani nya gukhenu nya guvbise kha nga nilo nya magala; vatshavbo va nya matshandza, ni vatshavbo va girago guvivba va na gira kha nga mwasi nya gubange; litshigu lolo li na vbohago, li na va vbisa nyamba tshiya gilo gwawe, ambari khamba mwendro matamo, a ngu ganela Pfhumu Nungungulu nya Tshivba Yatshavbo.

² Aholu gwanu enu mu ningago githawo lina langu, gu na ngangamela lidambo nya wululamo li na resago guvbanyisa dzimbapini gwaye; enu mu na duga na mu gu ndragandraga kha nga simombyana si dugago khu phandroni.

³ Mu na gandredzela sighohi, kholu va na fanana ni nguma vbavbatshi nya migondro yanu ga litshigu lile nyi li dongisedego; a ngu ganela Pfhumu Nungungulu nya Tshivba Yatshavbo.

Guwuya ga Eliya

⁴ Dundrugani Nayo wa githumi gyangu Mosi, uwo nyi mi ningidego gigomoni gya Horebhi, wu na khalago nayo ni sileletelo ga vathu vatshavbo va na Israyeli.

⁵ Wonani, nyi ngu mi rumelani muprofeti Eliya, na li si gu vbohi litshigu nya likhongolo ni guthisa la Pfhumu Nungungulu.

⁶ “Uye a na wuyisa myonyo ya vavelegi ga sanana sawe, ni myonyo nya sanana ga vavelegi vawe, gasi nyi siti nyi ta tsayisa litigo khu givalo.”