Luka 9 - Bhibhiliya Nya Guage

Jesu a ngu rumela vapostoli

¹ Jesu a di tshanganisa vale nya likhumi na vavili, a va ninga tshivba nya guduse maphuvbo yatshavbo nya guvivbe ni gu hawulugisa vadwali.

² A di va ruma gu gimbila va tivisa Mufumo wa Nungungulu ni gu hawulugisa vadwali.

³ A di va ninga sileletelo, khuye: “Mu nga dongi gilo, nya nga ndronga, kwama, dzimbuva, dzitsapawu, guambala.

⁴ Ndrangani mu na gu belago khalani avbo kala mu khuga tigoni momo.

⁵ Gasi vale va na gumba mi hakha, gikhati mu dugago tigoni gwawe, phuphuthani kudzudzwane migondroni gwanu, kha nga wufakazi vbakari gwawe.”

⁶ Khavbo avbo, va di phara dzindzila, va gu gimbila va hevbudza Mahungu nya Yadi khu ndranga ni ndranga ni gu hawulugisa vadwali malangani yatshavbo.

Maalakanyo ya Herodhi

⁷ Mufumeli Herodhi, na pwide satshavbo si nga bani si dugelela, a di hamuga ni gilo nya gugire, kholu vambe va di gukhavo: Khu Johane Mubhapatisi a nga wugago khu ga vafudego!

⁸ Vambe, khavo khu Eliya a nga wuyago; gasi vambe va di gu tiyisa gukhavo: Moyo nya vaprofeti va gale a nga wugago.

⁹ Aholu, Herodhi a di khuye: “A gu bani ari Johane, nyi rumede gu a pidwe ngolo. Ahati oyu a gupwani a ngu gira satshavbo sesi, khu mani?” Herodhi a di vbweta gu mu wona.

Jesu a na ni tshivba nya guhodzise avo va pwago ndzala

¹⁰ Na va wide, vapostoli va dita tshamusela ga Jesu satshavbo iso va nga gimbila va gu gira. Khavbo avbo, a di va dzega a hongola navo giwulani, kha guya Bhetisayidha.

¹¹ Gidzemo na gi tugude, gi di mu landra. Jesu a di gi hakha, a gu gi hevbudza mahungu nya Mufumo wa Nungungulu, gumogo ni gu hawulugisa vadwali.

¹² Kha nga ulo li nga bani liphela gupfola, vapostoli va diya ga Jesu vaya, khavo: “Diga vathu va hongole, gasi va kodze gu gimbila va renga gilogyo nya guhodze mitalalani ni dzindrangani dza vbafuvbyana momu, gumogo ni gu mana wulanga nya gulale, kholu avba hi gomo mugiwulani.”

¹³ Jesu a di va hakha, khuye: “Va ningeni kamwe enu guhodza!” Gasi avo va di khavo: “Avba livbandre sibaba ni dzindzandzi dzimbili basi hi gu nadzo. Ginani gyogyo ha gu pima khu vathu vava. Mwendro hi naya renga guhodza gu ninganago gu va hodzisa vatshavbo!”

¹⁴ Va di ganela kharati kholu va diromo gipimo nya livbandre magumi mazana (5000) nya vama. Khavbo avbo, Jesu a di embela vapizane, khuye: “Rumani vathu va khale khu sikwata nya livbandre magumi (50).”

¹⁵ Avo va di gira iso va nga rumwa, va gu khadzisa vathu vbavbatshi.

¹⁶ Khavbo avbo, Jesu a di dzega sibaba sile nya livbandre ni dzindzandzi dza dzimbili, a gu khusedza maho a khedza vbatshani, gumogo ni gu bonga Nungungulu khu guhodza gule. Khu vbale, a di si pilela, a ninga vapizane va kabanisela gidzemo.

¹⁷ Vatshavbo va di hodza, va kura; bwelo khavbo va gu tadza likhumi na sivili situndru khu sipandre si nga tshalago.

Wufakazi wa Pedro

¹⁸ Tshigu mwedo, Jesu nari vbakari nya nombelo ni vapizane vaye basi, a di va wudzisa, khuye: “Vathu vari khavo kheni mani?”

¹⁹ Va di mu hakha, khavo: “Vomo va gukhavo khuwe Johane Mubhapatisi, vambe vari khavo khuwe Eliya, gasi vambe vari khavo u moyo nya vaprofeti va gale a nga wugago.”

²⁰ Jesu a di khuye: “Ahati enu, mwari khenu kheni mani?” Pedro a di khusa lito, khuye: “Khuwe Kristo, u nga rumedwa khu Nungungulu.”

Jesu a ngu tivisa gufa gwaye

²¹ Khavbo avbo, Jesu a di va laya gu va si embeli muthu.

²² A di engedza gambe, khuye: “Mwamana wa Muthu a na ni fanelo nya gusaniseke ngudzu ni gu nyenywa khu madhota, ni vakhongolo nya vaphasi ni vahevbudzi nya Nayo. A na songwa, aholu khu litshigu nya wuraru a na wuga.”

²³ Khavbo avbo, a di embela vatshavbo, khuye: “Uye a vbwetago gu nyi landrela, a na dzi nyenye uye wurumba waye, a vbagara gihambano gyaye a nyi landre.

²⁴ Kholu uye a vbwetago gu vbanyisa womi waye, a na wu luza; gasi uye a luzago womi waye khu kotani yangu, a na wu vbanyisa.

²⁵ Giphaso muni a na gu gi manago wule a fumelago litigo rumba, a gu hegisa khu gu mbemba ni hungo waye, mwendro saye gu dzi dzimedza?

²⁶ Kholu, uye a na khalago dzitshoni khu kotani yangu mwendro khu kotani nya mahungu yangu, Mwamana wa Muthu a na mu khalela nuye dzitshoni litshigu a na tago na tade khu gidhumo gyaye ni gya Babe, nigyo nya sihathwa nya guage ni dzingilozi!

Mufumo wu vbohide

²⁷ “Nyi ngu mi embelani, khu lisine, kheni: Vbakari gwanu vomo va na gumba linga lufu, kala va wona Mufumo wa Nungungulu.”

Jesu a ngu vbindrugedza giemo

²⁸ Na gu vbindride gipimo nya livbandre na mararu matshigu hwane nya gu Jesu na ganede esi, a di dzega Pedro, Johane ni Jakobe a gwela navo gigomoni, gasi guya lombelela.

²⁹ Vbakari nya nombelo, khovbe yaye yi di vbindrugedza; dzingandzu dzaye dzi di aga ngudzu, dzi ngangamela.

³⁰ Va di tumbuluga vama vavili va nga bani va bhula naye: Adiri Mosi ni Eliya.

³¹ Ava, na va tade khu gidhumo, va di gu ganela khu gufa gwaye gu nga bani guvbweta gu dugelela Jerusalema.

³² Pedro ni vangana vaye va di wongomedwa khu ligovbe. Aholu, na va khendzugide, va di wona gungangamela ga Jesu ni madhota yale ya mavili ma nga bani mari naye.

³³ Gikhati ma nga vbweta gu hongola madhota yale, Pedro a di embela Jesu, khuye: “Muhevbudzi, gwadi gu hi khale avba! Hi na gira mitshatsha miraru: Moyo wago, mumbe wa Mosi, mumbe wa Eliya.” Uye kha nga gi ti ni gilo a nga bani a gu ganela.

³⁴ Na nga guganela, li dita lipfhi li ngata va fenengedza. Na va bede ndrani nya lipfhi, va di khala hwanga.

³⁵ Khu vbakari nya lipfhi li di pwala lito li nga, khilo: “Oyu khu Mwamana wangu nya gu mu haladze. Mu yingiseni.”

³⁶ Hwane nya lito lile, Jesu a di tshala enga. Vapizane va di degula naso, va si embeli muthu matshiguni yale iso va nga bani va si wone.

Guhawulugiswa nya gikhwathana gi nga bani giri ni liphuvbo nya guvivbe

³⁷ Gandra ni dzimindru, na va gu tshiga khu gigomoni, a di khingwa khu gidzemo nya gingi.

³⁸ Vbakari gwawe a di duga mwama a nga khusedza lito, a lomba na gulumela, khuye: “Muhevbudzi, nyi ngu gu lomba gu, uta wona mwamana wangu, a gu uye wa moyo basi nyi gu naye.

³⁹ A na ni liphuvbo nya guvivbe. La gu mu dugela, la gu mu dzudza khu tshivba ni tshivba, li mu thesa vbavbatshi na gu ndrendremela gumogo ni gu womba dzihuwa ni gu pupuma liguvi khu kanani. Hwane nya gu mu khuyusele sivbango khavbo li mu digago.

⁴⁰ Nyi di lomba vapizane vago gu li tutumisa, aholu kha va li kodza.”

⁴¹ Jesu a di mu hakha, khuye: “Mela nya vathu nyamba khodwa, mu si gitigo nigyo mu girago! Nyi na khala nanu kala lini? Nyi na timisela mavbanyelo yanu kala lini?” Khavbo avbo, a di embela babe wule, khuye: “Mu rese eno.”

⁴² Na gi hidzimela ga Jesu, gikhwathana gi di dugedwa khu liphuvbo nya guvivbe, li nga gi dzudza khu tshivba ni tshivba, li gi thesa vbavbatshi. Aholu Jesu a di li kawuka, a gu hawulugisa gikhwathana, a gi ningela ga babe waye.

⁴³ Vatshavbo vathu va di liwuga khu gu wona tshivba nya yikhongolo ya Nungungulu. Kha nga ulo vatshavbo va nga bani va liwuga khiso a nga gira, Jesu a di embela vapizane vaye, khuye:

Jesu a ngu tivisa nyaluphye gufa gwaye

⁴⁴ “Yingisani gwadi iso nyi vbwetago gu mi embela: Mwamana wa Muthu a ngu vbweta gu ningedwa ga va nya mayigo.”

⁴⁵ Aholu avo kha va nga dziti khavo a gu vbweta khuye ginani, kholu a diri sihalo gwawe. Ambari ulo kha va mu wudzisa, kholu va di gu mu thava.

Uye a gu khongolo Mufumoni wa Ndzadzini

⁴⁶ Tshigu mwedo vapizane va di ganedzisana, khu gu vbweta guti khu mani a gu khongolo vbakari gwawe.

⁴⁷ Jesu, na tugude mapimo yawe, a di dzega gyanana, a gi emisa vbakari gwawe, khuye:

⁴⁸ “Muthu watshavbo a na hakhago gyanana nya nga egi khu lina langu, kheni a nyi hakhago. Gasi uye a nyi hakhago, a gu hakha wule a nga nyi rumelago. Kholu wule a dzi sodzisago ngudzu vbakari gwanu, uyoyo khuye a gu khongolo.”

Uye a si hi wugeligo khwana gyathu

⁴⁹ Johane a di khusa lito, khuye: “Muhevbudzi, womo hi nga mu manago na gu tutumisa maphuvbo nya guvivbe khu lina lago, hi mu himbedzela, kholu kha gimbili ni ethu.”

⁵⁰ Aholu Jesu a di khuye: “Mu nga mu himbedzeli, kholu uye a si mi wugeligo khwana gyanu.”

Jesu kha hakhwi gwadi tigoni ga Samariya

⁵¹ Kha nga ulo ma nga bani ma gu vboha matshigu yaye nya gurure tigoni momu, Jesu a di hunga monyo a gu hongola Jerusalema.

⁵² A di thangisa myango yi hongola talalani nya gukari wa tigoni ga Vasamariya, gasi guya mu dongisela wulanga nya guhefemule.

⁵³ Aholu vamune tigo kha va mu hakha kholu khovbe yaye yi di nonedza guhongola Jerusalema.

⁵⁴ Khavbo avbo, vapizane va Jesu, Jakobe ni Johane, na va wonide esi, va di khavo: “Pfhumu, u ngu dzina gukhuwe hi ranise nilo wa Ndzadzini gasi vata dagarela, gani?”

⁵⁵ Aholu Jesu a di va kawuka, khuye: Liphuvbo mu gu nalo kha mu liti.

⁵⁶ Kholu Mwamana wa Muthu kha tela guta pfhungumula mihefemulo ya vathu, aholu guta yi vbanyisa. Va di vbindra vaya ga wumbe talala.

Avo va vbwetago gu landra Jesu

⁵⁷ Na va romo vbakari nya ndzila, gu di manega moyo a nga khuye: “Nyi na gu landrela ni hayini avbo u na gu hongolago.”

⁵⁸ Jesu a di mu hakha, khuye: “Migehe yi na ni mavbala yawe; sinyoni si na ni sihaga sawe. Aholu Mwamana wa Muthu mwalo avbo nya gukhihimele hungo waye.”

⁵⁹ Aholu a di embela mumbe, khuye: “Nyi landre.” Oyu a di hakha, khuye: “Pfhumu, nyi dige guphela nyi ya dzinga babe wangu.”

⁶⁰ Jesu a di mu embela, khuye: “Va dige vafi va dzingane khu gyawe. Gasi uwe indra u gimbila u tivisa Mufumo wa Nungungulu.”

⁶¹ A di manega mumbe a nga khuye: “Pfhumu, eni nya guvbweta gu gu landrela neni, aholu nyi dige guphela nyi ya vbangana gaya.”

⁶² Jesu a di mu hakha, khuye: “Watshavbo uye a pharago liphadza, bwelo khavbo a khedza hwane, kha yedwi khu Mufumo wa Nungungulu.”