Luka 23 - Bhibhiliya Nya Guage

Jesu mahoni ga Pilato

¹ Vatshavbo va di khuga, va mu yisa ga Pilato.

² Va di phela gu mu ketsari, khavo: “Hi mane oyu mwama na gu kutsedzela vathu gu wugela mufumo, khuye: Mu nga livbini khupho ga Sezari, ni gukhuye uye kamwe khuye mufumeli Kristo.”

³ Pilato a di mu wudzisa, khuye: “Ina kamwe uwe khuwe Mufumeli wa Vajudha, gani?” Jesu a di mu hakha, khuye: “Khidzo uwe u ganelago.”

⁴ Khavbo avbo, Pilato a di embela vakhongolo nya vaphasi ni gidzemo, khuye: “Gimwalo gihoso nyi gi manago ga muthu yoyu.”

⁵ Aholu avo va di simamisa, khavo: “Uye a ngu kutsedzela vathu Judheya gwatshavbo khiso a hevbudzago gukhugela Galileya kala omu.”

⁶ Na pwide esi, Pilato a di va wudzisa, khuye: “Khandri Mugalilewu muthu yoyu, gani?”

⁷ Na dzitide nya gukhuye a gu dugela tigoni ga Herodhi, a di mu rumela ga Herodhi, a nga bani a romo nuye Jerusalema matshigu yale.

Jesu mahoni ga Herodhi

⁸ Herodhi, na wonide Jesu, a di tala khu gutsaka, kholu matshigu nya gulaphe na guvbweta gu mu wona, khu kotani nya ndruma a nga yipwago. A di khuye mwendro a na gira giliwugiso nya gukari mahoni gwaye.

⁹ A di mu wudzisela silo nya singi, aholu Jesu kha nga mu phindrula gilo.

¹⁰ Vakhongolo nya vaphasi nya mhamba ni vahevbudzi nya Nayo va nga bani va romo avbovbo, va di simamisa gu mu ketsari.

¹¹ Herodhi ni masotshwa yaye, na mu kasuwaride ni gu mu hembulula, a di ruma gu mu bweledza ga Pilato na ambagisidwe libhadzi nya gumbure ngudzu.

¹² Litshigu lolo, Herodhi ni Pilato va di khala va na pari ni pari, kholu va di si pwanani.

Nyaluphye mahoni ga Pilato

¹³ Pilato a di tshanganisa vakhongolo nya vaphasi nya mhamba, vafumeli ni vathu vatshavbo, a va embela, khuye:

¹⁴ “Mu nyi resede muthu yoyu kha nga moyo a gimbilago a kutsedzela vathu. Nyi mu wudziside mbeli gwanu, kha nya mana gwaye ni gihoso gimwegyo mu gukhenu giride.

¹⁵ Herodhi nuye, kha mu mana ni gihoso, kha nga olu a mu bweledzidego avba. Kha nga mu wonago, uye mwalo nandru nya guyele gu songwa.

¹⁶ Khu kharato, nyi na mu tsayisa, nyi mu diga a hongola.”

¹⁷ [Myaga yatshavbo khu gikhati nya Phasika, Pilato a diri ni giolovedzo nya gu va tshulele gibotshwa gimwegyo.]

¹⁸ Vatshavbo va di gulumela, khavo: “Songa mwama yoyo, u hi tshulele Bharabhasi!”

¹⁹ Bharabhasi yoyu, a di khothedwe khu litunga a nga wusago dhoropani, ni kotani a nga songa muthu.

²⁰ Pilato a di ganela navo nyaluphye, na gu zama gu vbanyisa Jesu.

²¹ Aholu avo va di gulumela, khavo: “Mu khokhothele! Mu khokhothele!”

²² Pilato a di va wudzisa nya wuraru, khuye: “Gighoho muni a gu nagyo? Gi mwalo nyi gi manidego gwaye gi lombago gu a songwe. Khu kharato, nyi na mu tsayisa, nyi mu diga a hongola.”

²³ Aholu avo va di simamisa gu lomba, na va gulumela, khavo: “A na khokhothedwe!” Ligwaha lawe li diya na li gu engedzelana khu tshivba ni tshivba.

²⁴ Khavbo avbo, Pilato a di ruma khuye gu girege gugola gwawe.

²⁵ Kha nga gu lomba gwawe, a di tshula wule a nga bani a khothedwe khu mayunga ni wughevenga, a va ningedza Jesu va gira gugola gwawe khu uye.

Gukhokhothedwa ga Jesu

²⁶ Na va gu hongola naye, va di gurumedza mwama moyo nya gupwani khu Simoni wa Sirene, a nga bani a gu wuya khu gundze, va mu rwega gihambano, a gu landra khu hwane ga Jesu.

²⁷ A di landrwa khu mwandra nya vathu ni vanyamayi nya gukari va nga bani va gu lila khu gu mu pwela wusiwana.

²⁸ Jesu a di thendregedza, a va embela, khuye: “Sagadzyana sa Jerusalema, mu nga lilini khu kotani yangu; dzi lileleni wutumbu wanu ni gu lilela sanana sanu;

²⁹ kholu ma nguta matshigu va na gu ganelago, khavo: Va kategide vanyamayi va ngamba velega sanana, ni vale va ngamba mamisa.

³⁰ Gikhati gyogyo va na embela sigomo, khavo: ‘Hi thegeleni.’ Va na embela sigomwana, khavo: ‘Hi sihaledzeni!’

³¹ Kholu, ambari nya gukhuwe simbo nya gunagane va wu girago kharati, a hati uwo nya gubange wu na girwa kharini?”

³² Va di gu yisa niso sighevenga sivili, gasi guya songwa naye.

³³ Na va vbohide wulanga wu ranwago wulanga nya girwarwa, va di mu khokhothela vbagihambanotunu uye ni sighevenga sile sa sivili, gimwegyo khu nyamudye, gimbe khu nyambade.

³⁴ Jesu a di khuye: “Baba, va tsetselele, kholu kha va giti igyo va girago.” Khavbo avbo, va di kabana dzingandzu dzaye, khu gu gira nyatumbatumbane.

³⁵ Vathu va di khala vbale va wona; gasi vakhongolo vakone va di mu vala, khavo: “Vbanyiside vakwawe; a na dzi vbanyise abune, a gu bani ari uye Kristo, Gihathwa gya Nungungulu!”

³⁶ Masotshwa nayo ma di mu kasuwari, ma mu yela, gasi guya mu ninga ginageri.

³⁷ Ma di khayo: “Wa gu bani uri uwe Mufumeli wa Vajudha, nga dzi vbanyisa wabune!”

³⁸ Khu vbatshani gwaye gu di lovidwe milowo khu gigereki ni Gihebheru, pwani: “OYU KHU MUFUMELI WA VAJUDHA.”

³⁹ Gimwegyo nya sighevenga sile si nga bani si khokhothedwe naye gi di mu vala, khigyo: “Gasi khandruwe Kristo, uwe, gani? Ina ka, dzi vbanyise wabune, gumogo ni gu hi vbanyisa nethu.”

⁴⁰ Aholu gimbe, na gi khuside lito, gi di mu kawuka, khigyo: “Ina uwe khu thavi Nungungulu. Olu u nga lamuledwa gu songwa naye, gani?

⁴¹ Nari nya nga ethu, ha gu tshanisekela gilo nya gu giti kholu ha gu hakha tsayiso nya mithumo yathu. Gasi uye gi mwalo gighoho a giridego.”

⁴² A di engedza, khuye: “Jesu, nyi dundruge gikhati u na gu belago mufumoni wago.”

⁴³ Uye a di mu hakha, khuye: “Muhuno olu u na bani uri ni eni Ndzadzini.”

Gufa ga Jesu

⁴⁴ Khumo nya midiya, gi di manega gidema tigoni gwatshavbo, kala ni silambo khu 15 wora kholu lidambo li di tshiredzidwe.

⁴⁵ Mwendra nya makhuvi nya Nyumba ya Nungungulu wu di pferuga khu vbakari.

⁴⁶ Jesu a di khusedza lito khu tshivba ni tshivba, khuye: “Baba, mandzani gwago nyi ngu ningela hefemulo wangu.” Na ganede esi, a difa.

⁴⁷ Muthangeli nya lizana masotshwa a nga bani a romo vbale, na wonide iso si nga bani si dugelela, a di dhumisa Nungungulu, khuye: “Khu lisine oyu a diri muthu nya gululame!”

⁴⁸ Vathu vatshavbo va nga wonago gusaniseka gwatshavbo ga Jesu, na va wona iso si nga bani si dugelela, va di hongola gaya na va gu dzi laya.

⁴⁹ Vatshavbo vale va nga bani va tivana naye, gumogo ni vanyamayi vale va nga mu landrelago gukhugela Galileya, va di khala khu hwindzo, va khedzisela satshavbo.

Gudzingwa ga Jesu

⁵⁰ A diromo mwama moyo nya gupwani khu Josefe, a nga bani ari moyo nya madhota, a nga bani ari muthu nya ndruda ni gululama.

⁵¹ Kha nga nengela khiso si nga hungwago ni gu girwa khu vakwawe. Adiri givelegwa gya Arimateya, lidhoropa nya Vajudha, a di gu lindrela Mufumo wa Nungungulu.

⁵² A di hongola ga Pilato aya lomba girumbi gya Jesu;

⁵³ na gi tsheside khu vbagihambanotunu, a di gi fumbela khu mwendra, a gi dzinga thowoni li nga bani li kedwe giwindrini, umo gu nga bani gu si gu dzingwi muthu.

⁵⁴ Gu diri litshigu nya gudongisele, ni wutshigu wakone nya gupile Sabhadho.

⁵⁵ Vanyamayi va nga bani va dzude ni Jesu khu Galileya va di landrisela Josefe, va guti lithowo ni gu wona idzo gi nga bani gi ladzisidwe khidzo girumbi gyaye.

⁵⁶ Na va wide gaya, va dita dongisela mafura. Khu Sabhadho va di hefemula, kha nga guruma nya Nayo.