Luka 21 - Bhibhiliya Nya Guage

Ningelo nya noni

¹ Jesu na khuside maho, a di wona sitetema na si gu gira miningelo yawe kwamani nya miningelo.

² A di wona gambe gisiwana gimwegyo nya noni na gi gu rinya nigyo kwamani sikinyetana sivili nyamba phasa gilo.

³ Khavbo avbo, a di khuye: “Khu lisine nyi ngu mi embelani: Noni yeyi nya gisiwana yi ningede guvbindra vatshavbo,

⁴ kholu avo va di ningela iso si nga va tshalelago, gasi iyo, wusiwanani gwaye, yi di ningela satshavbo iso yi si tumbago guvbanyani gwaye.”

Gupfhungumudwa nya Nyumba ya Nungungulu

⁵ Kha nga ulo vambe va nga bani va gu liwuga wumburi nya Nyumba ya Nungungulu, khavo: Yi vbahidwe khu siwindri nya gumbure, ni gu ndrani gwaye yi na ni silo nya gumbure. Jesu a di va hakha, khuye:

⁶ “Li nguta litshigu si na pfhungumudwago satshavbo sesi mu si wonago, nyamba tshala ni giwindri gimwegyo vbatshani nya giwindri gikwawe.”

⁷ Khavbo avbo, va di mu wudzisa, khavo: “Muhevbudzi, lini si na gu dugelelago satshavbo soso? Giwonegiso muni gi na yeyedzago pwani silo sesi somo vbafuvbi ni gu dugelela?”

Siwonegiso nya guphele

⁸ Jesu a di hakha, khuye: “Dzi woneleni, gasi mu si kanganyiswi khu vathu, kholu va na tumbuluga nya vangi va ganela khu lina langu, khavo: Kheni Kristo. Ni gukhavo: ‘Gi ngu vboha gikhati.’ Mu nga va landri.

⁹ Mwa gupwa na gu ganedwa khu dzinyimbi ni guwugelana, mu nga thurugini, kholu si na ni fanelo nya guphele khiso si girega, aholu khandri guhegisa.”

¹⁰ Khavbo avbo, a di va embela, khuye: “Mayigo ma na wugelana, ni mufumo yi na wugelana niyo.

¹¹ Si na manega sirevareva nya sikhongolo; malanga nya mangi gu na manega ndzala ni mitungu nya gutale; si na tumbuluga silo nya guthise mafuni ni siwonegiso nya sikhongolo Ndzadzini.

¹² “Aholu, guphela, si si gu wonegi satshavbo sesi, va na mi molani va mi sanisa, va mi yisa dzinyumbani nya nombelo ni gu mi khothelani mapasoni; mu na yiswa ga vafumeli khu kotani nya lina langu;

¹³ satshavbo soso si na dugelela gasi mu khale vakustumunyu.

¹⁴ Vegedzani gwadi myonyoni gwanu magana yaya: Mu nga dzi garadzini khu guti ginani mu no va hakhago,

¹⁵ kholu eni mune nyi na mi ningani magana nya guti, ayo valala va na gumba dzi kodzago gu ma bomba.

¹⁶ Gu na dzega ni vababe vanu, vandriyanu, valongo ni dzipari va mi ningelani. Vambe va na khu gu songwa.

¹⁷ Mu na nyenywa khu vathu vatshavbo khu kotani nya lina langu.

¹⁸ Aholu kha gu na luzega, ambari basi ndzudzu moyo wa hungoni gwanu.

¹⁹ Khu gu timisela gwanu, mu na vbanyisa mihefemulo yanu.

Gurandredwa ni gu pfhungumudwa ga Jerusalema

²⁰ “Aholu mwa gu wona Jerusalema na gu randredwe khu dzinyimbi, dzitini nya gukhenu gu vbohide gumbemba gwaye.

²¹ Gikhati gyogyo, avo va na gu bani va romo Judheya va na thavele sigomoni; avo va na gu bani va romo dhoropani va na duge vbavbandze, navo va na gu bani va romo mahangeni va na wuyi dhoropani,

²² kholu matshigu yoyo khya gu dzi phodzela, gasi gu tadzisega satshavbo iso si nga lowago.

²³ Libango li na bani liri ni va nya dzimimba navo va nya gu mamisa ga matshigu yoyo, kholu yi na bani yi romo tshanisa tigoni gwatshavbo, vathu vakone va na yi wona mihimbo.

²⁴ Nya vangi va na songwa khu matshari, vambe va na vbagedwa va gu yiswa mayigoni kha nga dzikhumbi; Jerusalema gu na gandredzedwa khu va nya mayigo kala gi vbela gikhati gyawe.

Guwuya gwa Mwamana wa Muthu

²⁵ “Gi na manega giwonegiso damboni, ngimani numo nya dzinyeledzi; mafuni gu na manega tshanisa vbakari nya mayigo, ma na thedwago rerema khu gudzuma nya mavimbi ya linene,

²⁶ va na dzima vathu khu hwanga nya iso si na gu dugelelago tigoni, kholu dzitshivba dza Ndzadzini dzi na dzudzwa.

²⁷ Khavbo avbo, va na wona Mwamana wa Muthu na gu tshiga khu vbakari nya lipfhi, na tade khu tshivba nya yikhongolo ni gidhumo.

²⁸ Gikhati si na gu phelago gu dugelela satshavbo sesi, tiyani longo mu khusedza dzithamo dzanu, kholu guvbanyiswa gwanu gu na bani gu vbohide.”

Gipimaniso nya nguyu

²⁹ A di va embela gipimaniso gegi, khuye: “Khedzani nguyu ni mimbe misimbo.

³⁰ Ya gu phela gu thela nyenvu, mwa gu dzegela gu dziti khenu maronga ma vbohide.

³¹ Kharati nugo, mwa gu wonani satshavbo sesi, mu na dzitini nya gukhenu Mufumo wa Nungungulu wu vbohide.

³² Khu lisine nyi ngu mi embelani: Kha wu na vbindra melana yoyu na si si dugeleli satshavbo sesi.

³³ Ndzadzi ni mafu si na vbindra, aholu magana yangu gima kha ma na vbindra.

Gukhala na hi dongide

³⁴ “Dzi woneleni, mu nga pfhali khu limidzo ni gu leva, gambe mu nga pfhadzwi khu sigaradzo nya guvbanye! Mu ngata manwa khu litshigu lolo na mu pfhade,

³⁵ kholu ilo li nata kha nga naphwi a riyidwego vbakari nya vathu vatshavbo, va mafuni.

³⁶ Khu kharato, khalani na mu dongide, na mu gu lombelela gikhati gyatshavbo, gasi mu mane tshivba nya guvbuluge ga satshavbo si na gu dugelelago, mu kodza guta manwa khu Mwamana wa Muthu na mu nga tsaramide.”

³⁷ Matshigu yatshavbo Jesu a di gu hevbudza Nyumbani ga Nungungulu; vbasilambotunu a di hongola Gigomoni nya Miolivha, aya lala iyo vbavbandze.

³⁸ Vathu vatshavbo va di gu vindrugela gu hongola Nyumbani ga Nungungulu gasi guya pwa Jesu.