Luka 20 - Bhibhiliya Nya Guage

Tshivba ya Jesu

¹ Matshigu yale, Jesu na romo Nyumbani ga Nungungulu a hevbudza vathu ni gu tivisa Mahungu nya Yadi, a di yedwa khu vakhongolo nya vaphasi nya mhamba ni vahevbudzi nya Nayo ni madhota.

² Vaya, khavo: “Nga hi embela: Wa gu yi mana hayi tshivba nya gugire esi? Khu mani a nga gu ruma?”

³ A di va hakha, khuye: “Eni neni nyi na ni giwudziso gwanu. Nga nyi embelani:

⁴ Gubhapatisa ga Johane ga guta khu Ndzadzini, mwendro khu ga vathu?”

⁵ Va di phela gu ganedzisana khu gyawe, khavo: “Ha gukhethu: Khu Ndzadzini, a na khuye khu ginani mu ngamba khodwa khugo?

⁶ Aholu ha gukhethu khu ga vathu, hi na rinyedwa siwindri khu vathu, kholu vatshavbo va gu wona Johane kha nga muprofeti nya lisine.”

⁷ Khavbo avbo, va di khavo: “Ahati.”

⁸ Jesu a di va embela, khuye: “Basi. Eni neni kha nyi mi embeli umo nyi yi manago tshivba nya gu gira esi.”

Gipimaniso nya valimi nya sighevenga

⁹ Khavbo avbo, Jesu a di phela gu ganela vbakari nya vathu, a gu va ninga gipimaniso gegi, khuye: “Muthu nya gukari a di lima lithembwe nya miuvha, a li tshiyedza valimi, a gu endra nya guya vbedza matshigu nya gulaphe, vbavbandze nya mayigo.

¹⁰ Vbanangotunu, a di rumela githumi gyaye ga valimi vale, gasi guya hengisa wadwa wu nga bani wu mu lumba. Aholu valimi va diya gi veta va wuya va gi tutumisa nyamba gi ninga gilo.

¹¹ A di va rumela gimbe githumi, aholu va diya gi veta nigyo, va gi tutumisa, va gi yuyutela nyamba gi ninga gilo.

¹² A di rumela nya wuraru gimbe githumi. Va diya gi pandra phandza, va gi tutumisa.

¹³ Khavbo avbo, mune lithembwe a di khuye: ‘Olu nyi na gira kharini? Nyi na va rumela mwamana wangu nya gu mu haladze ngudzu, mwendro saye va naya mu ninga githawo.’

¹⁴ Aholu, na va mu wone, valimi va di khavo: ‘Khuye oyu a na tshalago ni thomba. Hongoleni hi mu songa, gasi hi tshale nayo ethu.’

¹⁵ Va di mu dusa vbavbandze nya lithembwe, vaya mu songa. Nga nyi embelani, a nata va rini mune lithembwe?

¹⁶ A nata va songa vatshavbo, a gu dzega lithembwe a tshiyedza vambe valimi.” Na va pwide esi, va di khavo: “Si nga tshuki si girega nya nga isoso!”

¹⁷ Jesu, na va khedziside gwadi, a di va wudzisa, khuye: “Gasi ma gu vbweta gu khayo ginani magana ma nga lowago, nya gukhayo: ‘Giwindri gi nga nyenywago khu vavbahi khigyo gi khadego gikoli nya nyumba?’

¹⁸ Watshavbo uye a thegelago vbatshani nya giwindri gegi a na vbadzuledwa; gasi uye a thegedwago khigyo a na pfarwa.”

Gukhupha ga Sezari

¹⁹ Avbovbo, vahevbudzi nya Nayo ni vakhongolo nya vaphasi nya mhamba va di vbweta gu mu mola, aholu va di thava gidzemo, kholu va di wona nya gukhavo gipimaniso gile gi di thula avo.

²⁰ Va di mu riya, va mu rumela vathu nya guya mu linga. Avo va di hongola kha nga vathu nya vadi, na va lindrela gukhavo a na hoheta likana, gasi gu mu ningela mandzani ga mufumo.

²¹ Ava va diya mu wudzisa, khavo: “Muhevbudzi, hi ngu dziti nya gukhethu u ngu hevbudza nya dzadi, khu hatheli vathu; wa gu hevbudza ndzila ya Nungungulu kha nga idzo li lombago khidzo lisine.

²² Nga hi embela, na. Hi na ni fanelo mwendro hi mwalo nya gulivbe khupho ga Sezari, gani?”

²³ Jesu, na gu mati makungo yawe, a di va hakha, khuye:

²⁴ “Nga nyi yeyedzani dzitsapawu dzakone. Gasi mufananiso yoyu ni lina leli khya mani?” Va di khavo: “Khya Sezari.”

²⁵ Khavbo avbo, a di va embela, khuye: “Ina ka, ningelani ga Sezari iso si gu sa Sezari, ni ga Nungungulu iso si gu sa Nungungulu.”

²⁶ Kha va dzi kodza gu mana magana nya gu mu mole khayo vbakari nya vathu, aholu va di liwuga khu phindrulo yaye, va gu hamuga nigyo nya guganele.

Guwuga nya vafi

²⁷ Va dita vasadhusi nya gukari, va ganedzago gu wuga nya vafi, vata mu wudzisa, khavo:

²⁸ “Muhevbudzi, Mosi a hi tshiyede nayo nya gukhuye a gufa mwama, a tshiya noni nyambana sanana, ndriyaye a na hambele namu waye, gasi gu wusa ndranga ya mufi.

²⁹ Va diromo livbandre na vavili vandruye. Koma wakone a di koka ndranga, a fa nyamba tshiya sanana.

³⁰ Uye nya wuvili nuye nya wuraru va di hambela namu wawe,

³¹ kala gu vbela vatshavbo nya livbandre na vavili, aholu kha va velega naye.

³² Khu guhegisa a difa nuye nyamayi wule.

³³ Guwugani nya vafi, nyamayi yoyu a na lumba wevbini wakone, ulo vatshavbo va mu dzegidego kha nga mwangadzi wawe?”

³⁴ Jesu a di va hakha, khuye: “Vathu va mafuni momu khavo va dzegago ni gu dzegwa.

³⁵ Aholu vale va na manwago vari ni fanelo nya guya vbanya ga limbe litigo gumogo ni gu wuga khu gufani, avovo kha va dzegi gambe kha va dzegwi.

³⁶ Kha va na ngafa gambe. Va gu fanana ni dzingilozi dza Nungungulu. Va vbindrugedzide va gu khala sanana sa Nungungulu. Kholu va na wuswa khu gufani.

³⁷ A gu bani ari khu mahungu nya guwuge nya vafi, ambari Mosi nuye fakazide mahungu yaya vbagipopwanatunu gile nya gu dzure, avbo a nga ranago Pfhumu khuye Nungungulu wa Abrahama, Nungungulu wa Isaki ni Nungungulu wa Jakobe.

³⁸ Khu kharato, khandri Nungungulu nya vafi, aholu, nya vathu va vbanyago. Kholu ga Nungungulu vatshavbo va ngu vbanya.”

³⁹ Vambe vahevbudzi nya Nayo va di khusa lito, khavo: “Muhevbudzi, u ganede gwadi.”

⁴⁰ Kha va nga tiyela gambe gu mu wudzisa gilo.

Kristo gyanana gya mani?

⁴¹ Jesu a di va wudzisa, khuye: “Khu ginani mu gukhenu Mesiya gyanana gya Dhavhidhe?

⁴² Olu Dhavhidhe abune a ganelago umo nya libhuku nya Dzindzimo, khuye: ‘Pfhumu a di embela Pfhumu yangu, khuye: Khala khu nyamudye gwangu,

⁴³ kala nyi gu thesa valala vago vbavbatshi nya migondro yago’

⁴⁴ Kha nga olu Dhavhidhe abune a mu ranago Pfhumu, gu ngu kodzega kharini Mesiya gu khala gambe mwamana waye?”

Jesu a ngu gengedza vathu

⁴⁵ Khavbo avbo, a di embela vapizane vaye, na gu pwidwa khu vathu vatshavbo, khuye:

⁴⁶ “Dzi woneleni ni vahevbudzi nya Nayo. Avo va gu gola gu ambala dzingandzu nya gulaphe ni gu loswa khu githawo mu vathuni, ni gu khala malangani nya guthange dzinyumbani nya nombelo numo nya sipfhitsha.

⁴⁷ Avo va gu phanga dzinyumbani nya dzinoni, na va pfhadza gu gira nombelo nya gulaphe. Va na hakha tsayiso nya guvbindrise.”