Luka 19 - Bhibhiliya Nya Guage

Zakewu muhengisi nya khupo

¹ Na bede tigoni ga Jeriko, Jesu a di tsemakanya lidhoropa.

² A di gu vbanya dhoropani ga Jeriko mwama moyo nya gitetema, nya gupwani khu Zakewu, a nga bani ari khongolo nya vahengisi nya mikhupo.

³ A di guvbweta gu wona Jesu, aholu kha nga dzi kodza khu kotani nya vathu, kholu a di rode ngudzu.

⁴ A di thanga khu mazambo a lita vbatshani nya nguyu, gasi a kodze gu wona Jesu, kholu a di gu dziti gukhuye a na vbindra khu vbale.

⁵ Na vbohide, Jesu a di khusa maho, a mu embela, khuye: “Zakewu, tshiga khu guvbiredza, kholu muhuno nya guvbweta guya khala nyumbani gwago.”

⁶ Uye a di tshiga khu guvbiredza, a mu hakha khu gunengela.

⁷ Na va wonide sile, vatshavbo va di ngurangura, khavo: “Hongode aya khala ndrangani nya gighohi.”

⁸ Zakewu a di khuga a ema a embela Pfhumu, khuye: “Pfhumu, nyi na kabanisela sisiwana gipandre nya thomba yangu, nya gu bani nyi kanganyiside muthuyo, nyi na mu livba nyondro dzina.”

⁹ Jesu a di mu embela, khuye: “Muhuno guvbanyiswa gu bede ndrangani momu, kholu muthu yoyu nuye mwamana wa Abrahama.

¹⁰ Kholu Mwamana wa Muthu tede guta vbweta ni gu vbanyisa avo va nga bani va dzimede.”

Gipimaniso nya likhumi dzipondro

¹¹ Na va gu pwa esi, Jesu a di engedzela gimbe gipimaniso, kholu a nga bani a romo vbafuvbi ni Jerusalema, nulo vathu va nga bani va gu hingigedza gukhavo Mufumo wa Nungungulu wu di guvbweta gu vboha khu guvbiredza.

¹² A di khuye: “Mwama moyo nya guthavisege a di phara liendro a gu hongola hwindzo, gasi guya phariswa ndronga nya wufumu, na si vbede isoso a wuya.

¹³ Na si gu hongoli a di rana likhumi nya sithumi saye, a si kabanisela pondro pondro, a si embela, khuye: ‘Indrani, tshalani mu velegisa dzitsapawu dzedzi kala nyi gu wuya.’

¹⁴ Aholu vathu va tigoni mule va di gu mu khalela lidiwo, khu kharato, va di rumela mwango, khavo: ‘Kha hi dzini gu fumedwa khu muthu yoyu.’

¹⁵ “Gikhati a nga wuyago, na fumisidwe, a dita ranisa sithumi sile a nga bani a si ningide dzitsapawu, gasi gu dziti i tengo muni muthu ni muthu a nga tshala a velegisa.

¹⁶ “Uye nya guphele a dita, khuye: ‘Pfhumu, pondro yago yi velegide likhumi dzipondro!’

¹⁷ Mufumeli a di mu hakha, khuye: ‘U giride gwadi githumi nya gyadi; kha nga olu u nga thembegago ga silo nya sidugwana, nyi na gu pharisa ndronga nya gufumele likhumi madhoropa.’

¹⁸ “Uye nya wuvili a dita, khuye: ‘Pfhumu, pondro yago yi velegide livbandre dzipondro.’

¹⁹ Ga oyu a di ganela, khuye: ‘Uwe nuwe nyi na gu pharisa ndronga nya gufumele livbandre madhoropa.’

²⁰ “A dita mumbe a ta, khuye: ‘Pfhumu, pondro yago khu yi woni eyi, nyi di yi fumbede khu mwendra nyi yi vegisa gwadi.

²¹ Kholu nyi di gu gu thava, kha nga olu u gu mwama nya wurena, u vbwetago gu dzega umo u ngamba vega ni gu vbwera umo u ngamba yala!’

²² Mufumeli wule a di mu hakha, khuye: ‘Githumi nya guvivbedwe khu monyo, nyi ngu gu kona khu magana yago. Gwadigo u di gu dziti nya gukhuwe nyi mwama nya wurena, nyi dzegago umo nyi ngamba vega ni gu vbwera umo nyi ngamba yala,

²³ khu ginani u ngamba vega bhakwa dzitsapawu dzangu? Olu nyi widego na nyi yide nyi ya dzega nidzo dzi nga vbweta gu velegela.’

²⁴ A di embela avo va nga bani va romo vbale, khuye: ‘Mu dzegeleni pondro yoyo mu yi ningela ga wule a gu ni likhumi.’

²⁵ Va di mu hakha, khavo: ‘Eh! Pfhumu, uyoyo a na ni likhumi dzipondro!’

²⁶ Uye a di khuye: ‘Nyi ngu mi embelani, khu lisine, kheni: Watshavbo wule a gu naso, a na ningwa, gasi wule a gu mwalo gilo, ambari esi a gu naso a na dzegedwa.

²⁷ Gasi khu kotani ya valala vava vangu, va ngamba dzina gu fumedwa kheni, va reseni avba muta va pila migolo na nyi gu va wona.’ ”

²⁸ Na vbedzide gu ganela esi, Jesu a di hongola kha guya Jerusalema.

Jesu a ngu bela Jerusalema kha nga Mufumeli

²⁹ Na va gu vboha Bhetifage ni Bhetaniya, vbafuvbi ni gigomo gi ranwago Gigomo nya Miolivha, Jesu a di ruma vapizane vavili,

³⁰ khuye: “Indrani dzindranganani mule, na mu gu bela, mu naya mana giburwana na gi hungidwe, igyo nya gu gima gi si gu khiledwi khu muthu. Gi tshuleni mu nyi resela.

³¹ Mwa gu wudziswa pwani mwa gu gi tshulela ginani, hakhani khenu khu Pfhumu yi gi vbwetago.”

³² Vapizane vale va di phara ndzila, va gu hongola. Va diya mana satshavbo kha nga idzo a nga bani a va embede khidzo.

³³ Na va gu tshula giburwana, vamune vakone va di khavo: “Mwa gu gi tshulela ginani giburwana gyogyo?”

³⁴ Va di hakha, khavo: “Khu Pfhumu a gi vbwetago.”

³⁵ Na va vbohide nagyo ga Jesu, va diya gi ladzedzela mabhadzi yawe, va gu mu khiledza.

³⁶ Ndzilani va di ladza mabhadzi, gasi Jesu a vbindra khavbo.

³⁷ Gikhati va nga vbohago releloni nya gigomo nya Miolivha, vapizane vaye vatshavbo va di phela gu womba mikulungwane, va rungudza Nungungulu khu siliwugiso satshavbo va nga si wonago,

³⁸ khavo: “A na rungudzwe Mufumeli atago khu lina la Pfhumu! Gurula Ndzadzini, ni gidhumo ga Nungungulu!”

³⁹ Vafarisi nya gukari va nga bani varomo vbakari nya vathu, va di khavo: “Muhevbudzi, degudza vapizane vago.”

⁴⁰ Jesu a di va hakha, khuye: “Va gu degula, siwindri si na gulumela.”

Jesu a ngu lilela Jerusalema

⁴¹ Gikhati a nga vbohago dhoropani ga Jerusalema, a li khedza gwadi, a di lila, khuye:

⁴² “Oh! Nari pwani sago, litshigu la muhuno u di gu mati nuwe mahungu ma dzi kodzago gu gu resela gurula! Aholu isoso si nga sihalegide mahoni gwago.

⁴³ Ma na vboha matshigu u na gu randredwago khu valala vago, va gu randrela khu maphuvbo yatshavbo.

⁴⁴ Va na gu tshigira mafuni, uwe ni sanana sago, kha va na tshiya giwindri vbatshani nya giwindri gikwawe, kholu u ngamba liti litshigu u nga holedwago khilo!”

Guagiswa nya Nyumba ya Nungungulu

⁴⁵ Khavbo avbo, Jesu na bede Nyumbani ga Nungungulu, a di tutumisa varengisi ni varengi,

⁴⁶ khuye: “Gu lovidwe, pwani: ‘Nyumba yangu yi na bani yiri nyumba nya nombelo.’ Aholu enu mu yi vbindrugedzide mu yi gira liphala nya gusihale umo dzimbafa.”

⁴⁷ Jesu a di gu hevbudza matshigu yatshavbo Nyumbani ga Nungungulu. Aholu vakhongolo nya vaphasi nya mhamba ni vahevbudzi nya Nayo ni madhota, va di gu zama ndzila nya gu mu songe;

⁴⁸ ambari ulo kha va nga dziti va na gira kharini, kholu vathu vatshavbo va di gu mu yingisa khu gunengela.