Luka 15 - Bhibhiliya Nya Guage

Sipimaniso siraru nya wuhindzi wa Nungungulu

¹ A di yedwa khu vahengisi vatshavbo nya mikhupo ni sighohi, gasi guya mu pwa.

² Vafarisi ni vahevbudzi nya Nayo va di ngurangura, khavo: “Oyu mwama a gu hakha sighohi, a hodza naso.”

Nvuta nya gudzimele

³ Khavbo avbo, Jesu a di va ninga gipimaniso gegi, khuye:

⁴ “Khu wevbi, vbakari gwanu uye nya gu nari ni lizana (100) dzinvuta, a gu dzimeledwa khu mweyo, a si digigo idzo nya livbandre na mana magumi ni livbandre na dzina (99) panini, a gu hongola a gimbila a vbweta iyo yi nga dzimela, kala a yi mana?

⁵ Na yi mane, a ngu yi vbagara na tsakide;

⁶ na vbohide gaya, a ngu rana dzipari ni vaakelane, a va embela, khuye: ‘Nyi phaseni gu tsaka, kholu nyi manide nvuta yangu yi nga bani yi dzimede.’

⁷ Nyi ngu mi embelani, kheni: Gu na manega gunengela nya gukhongolo Ndzadzini khu kotani nya gighohi gimwegyo basi, gi dzi layago guvbindra avo nya livbandre na mana magumi ni livbandre na vana vathu nya ndruda va si vbwetigo gu dzi laya.”

Ndralama nya gudzimele

⁸ A di engedza gambe, khuye: “Khu wevbini nyamayi, nya gu, nari ni likhumi dziphera nya ndralama a dzimedza mweyo, a si rothigo kandriya, a vbiyela ndrangani gwatshavbo, na gu khedzisa gwadi, kala a yi mana?

⁹ Na yi mane, a ngu rana dzipari ni vaakelane, a va embela, khuye: ‘Nyi phaseni gu tsaka, kholu nyi yi mane phera yangu yi nga bani yi dzimede.’

¹⁰ Nyi ngu mi embelani, kheni: Kharati nugo, gomo gunengela vbakari nya dzingilozi dza Nungungulu khu kotani nya gighohi gimwegyo basi gi vbindrugedzago mavbanyelo.”

Guwuya nya gyanana nya gudzimele

¹¹ A di engedza gambe, khuye: “Babe nya gukari a diri ni sanana sivili nya madzaha.”

¹² Uye nya nandra a di embela babe waye, khuye: Baba, nyi ninge thomba yi nyi lumbago. Babe wule a di va kabanisa thomba va vavili.

¹³ Na ma vbindride matshigwana, mwama nya nandra a di donga lipfhumba, a gu dzega silo saye satshavbo, a pepetega ni mayigo, aya phalalegisa thomba yaye yatshavbo ni mibhedzwa.

¹⁴ Na vbedzide thomba yaye yatshavbo, gu di manega ndzala nya yikhongolo tigoni mule, a gu phela gu saniseka.

¹⁵ A diya khoza ga moyo wa tigoni mule, a nga mu rumela guya havisa dzikhumba petoni gwaye.

¹⁶ A di dogorela gu tadza girumbu khu iso si nga bani si gu hodzwa khu dzikhumba, aholu kha nga ningwa khu muthu.

¹⁷ Khavbo avbo, a di wuyisa mapimo, a gu hingigedza, khuye: Olu gaya, sithumi sa babe wangu si ngu hodza si khura, eni avba nyi ngu fa khu ndzala!

¹⁸ Nyi na bwelela ga babe wangu nyiya, kheni: Baba, nyi ghohide mahoni ga Nungungulu ni mahoni gwago.

¹⁹ Nyi mwalo gambe fanelo nya guranwe gyanana gyago, nyi phare kha nga moyo nya sithumi sago!

²⁰ A di phara ndzila aya ga babe waye. “Na nga guta khu hwindzo, a di wonwa khu babe waye, a nga pwago gisiro, a mu khinga khu mazambo, aya mu wugarela ni gu mu bhejari.

²¹ Mwamana wule a di khuye: ‘Baba, nyi ghohide mahoni gwa Nungungulu ni mahoni gwago, nyi mwalo gambe fanelo nya guranwe gyanana gyago.’

²² Aholu babe wule a di ruma sithumi saye, khuye: ‘Resani khu guvbiredza ngandzu yile nya gumbure ngudzu muta mu ambagisa; mu ambagiseni phera nyalani ni silato migondroni gwaye.

²³ Resani gimombyana nya gunone muta gi songa, hi hodza, hi nengela,

²⁴ kholu mwamana yoyu wangu a di fude, olu a ngu vbanya; a di dzimede, olu manegide.’ Khavbo avbo, buzo wu di phela.

²⁵ “Mwama nya koma a di romo mahangeni. Na gu wuya, nari vbafuvbi ni gu vboha gaya, a di pwa vathu na va gu embelela ni gu hana ndrangani.

²⁶ A di rana githumi gimwegyo a gi wudzisa, khuye: ‘Gasi mahungu muni?’

²⁷ Gi di mu embela, khigyo: ‘Khu ndriyago a widego. Babe wago a di songa gimombyana nya gunone, gasi gu mu wuyedza khigyo, kholu wide khu mawundru ni mawogo.’

²⁸ Mwama nya koma a di goroga, a si dzini ni gu bela. Aholu, babe waye a diya mu khongotela gu bela.

²⁹ A di embela babe waye, khuye: ‘Nyi na ni myaga nya gulaphe na nyi gu gu thumela nyamba hosisa ni nayo moyo wago; gima u si nyi ningi giphongwana, nyi hodza ni dzipari dzangu.

³⁰ Olu gi nga vboha gyanana gegi gyago gi nga phalalegisa thomba yago ni mibhedzwa, u gi songede gimombyana nya gunone.’

³¹ Babe wule a di khuye: ‘Mwanangu, uwe nyi nago matshigu yatshavbo; satshavbo si gu sangu khyago nuwe.

³² Aholu hi na ni fanelo nya gugire buzo, hi tsaka, kholu ndriyago a di fude, olu a ngu vbanya; a di dzimede, olu manegide.’ ”