Luka 1 - Bhibhiliya Nya Guage

Magana nya gutule khayo

¹ Kha nga olu vathu nya vangi va dzi garadzidego khu gu lova, va gu sasamedzela silo si dugeledego vbakari gwathu,

² kha nga idzo va hi hevbudzidego khidzo vale va nga si wonago khu maho, gukhugela guhegulani nya silo sesi; a gu avo va nga khalago vahevbudzi nya Mahungu yaya;

³ eni neni, hwane nya gu bani nyi si hevbude gwadi, gasi guti idzo si nga dugelelago khidzo guphelani, nyi wonide nya gukheni a diri gwadi gu gu lovela nuwe, Teyofilo, gigodwa gyangu, na nyi si sasamedzela khu dzindrima dzakone,

⁴ gasi u wuti gwadi longoloko nya lisine u hevbudzidwego.

Gutiviswa nya guvelegwe ga Johane

⁵ Gikhatini gya Herodhi a nga bani ari mufumeli wa Judheya, a di romo muphasi moyo nya mhamba nya gupwani khu Zakariya, a nga bani a gu lumba gikwata gya Abhiya. Mwangadzi waye a diri Elizabheta. Uye nuye a di gu dugela nyumbani ga Aroni.

⁶ Vatshavbo va vavili va di lulamide mahoni ga Nungungulu; va di gu landrisa milayo ni siguruvedzo sa Pfhumu khu ndruda yatshavbo, guvbanyani gwawe, gima kha va manwa vari ni gihoso.

⁷ Aholu va diri mwalo sanana, kholu Elizabheta a diri gyumba, narigu gambe, va vavili va di gumbide.

⁸ Zakariya a di gu thuma thumo waye nya wuphasi nya mhamba ya Nungungulu. Kha nga gi nga bani gi vbohide gikhati nya gulumbe tsawa waye,

⁹ kha nga giolovedzo gi landrwago khu vaphasi, Zakariya a di hathwa khu vaphasi vakwawe guya bela makhuvini nya Nyumba ya Pfhumu a gu vbisa libani.

¹⁰ Vathu vatshavbo va di tshala vbavbandze va lombelela khu gikhati nya guvbiswe libani.

¹¹ Khavbo avbo, a di tumbulugedwa khu ngilozi ya Pfhumu, yi nga ya emago khu nyamudye nya giluvelo nya libani.

¹² Zakariya, na yi wone, kha nga giti ni gilo nya gugire khu hwanga.

¹³ Aholu ngilozi yi di mu embela, khiyo: “Zakariya, u nga thavi, kholu nombelo wago wu yingisidwe. Mwangadzi wago, Elizabheta, a na velega gyanana nya gikhwathana u na gi thangisago lina la Johane.

¹⁴ Uwe u na tsaka ni gu nengela. Nya vangi va na tsaka khu guvelegwa gwaye,

¹⁵ Kholu gi na bani giri muthu khongolo mahoni ga Pfhumu. Kha gi na sela vhinya mwendro wadwa nya gulevise; gi na tala khu Liphuvbo nya Guage gukhugela ndrani ga mayime waye.

¹⁶ Khu kotani nya igyo, sanana nya singi sa na Israyeli si na wuya ga Pfhumu Nungungulu wawe.

¹⁷ Igyo gi na rumedwa mbeli nya liendro la Pfhumu khu liphuvbo nya tshivba nya nga ya muprofeti Eliya, gasi a rudzise myonyo ya vavelegi ni sanana sawe, ni gu hevbudza guyingisa sanana nyamba yingisa. Gi na dongisela kharati vathu, gasi va hakha Pfhumu khu ndruda.”

¹⁸ Zakariya a di phindrula ngilozi, khuye: “Gu na girega kharini kharato, olu hi gumbidego, eni ni mwangadzi wangu?”

¹⁹ Ngilozi yi di mu phindrula, khiyo: “Eni kheni Gabriyeli, wule a guromo mbeli ga Nungungulu; nyi di rumedwa gasi guta gu tivisa mahungu yaya nya gutsakise.

²⁰ U na khala gidudu; nyamba ganela, kala si gu girega satshavbo sesi, kholu khwa khodwa khu magana yangu, ayo ma na giregago khu gikhati gyakone.”

²¹ Gasi vathu vatshavbo va di gu lindrela Zakariya, gumogo ni gu liwuga khu guhwela gwaye gu duga khu makhuvini nya Nyumba ya Nungungulu.

²² Na dugide, kha nga kodza gu ganela navo; avo va di dzegela gu dziti khavo gyomo gi mu dugeledego makhuvini mule. A di ganela navo khu gunonedzela, kholu a di khade gidudu.

²³ Na ma vbede matshigu nya thumo waye, a di bwelela gaya.

²⁴ Hwane nya matshigu, mwangadzi waye, Elizabheta, a di khura mimba, a si dzi wonegisi vbakari nya vathu gipimo nya livbandre migima.

²⁵ A di ganela, khuye: “Khu gudzina gwaye Pfhumu a nyi girede silo sesi, gasi gu nyi tshula dzitshoni muvathuni.”

Gutiviswa nya guvelegwe ga Jesu

²⁶ Khu ngima nya livbandre na moyo, ngilozi Gabriyeli yi di rumedwa khu Nungungulu dhoropani ga Galileya nya gupwani Nazareta,

²⁷ ga gyagadzyana nya likendzi nya gupwani khu Mariya, gi nga bani gi tumbisidwe khu mwama nya gupwani khu Josefe, wa nyumbani ga Dhavhidhe.

²⁸ Na yi vbohide avbo a nga bani a romo, ngilozi yi di, khiyo: “Sewe, uwe nya gutale khu wuhigo, Pfhumu yi na ni uwe.”

²⁹ Na pwide magana yaya, Mariya a di thuruga, a gu dzi wudzisa, khuye: “Ma gu tshamusela ginani maloselo yaya?”

³⁰ Ngilozi yi di, khiyo: “Mariya, u nga thavi, kholu u manide wuhigo mahoni ga Nungungulu.

³¹ U na khura mimba u velega gyanana nya gikhwathana u na gi thangisago lina la Jesu.

³² A na bani ari muthu khongolo, a na ranwa pwani Mwamana wa Nungungulu a guromo Vbatshani Ngudzu. Pfhumu Nungungulu a na mu pharisa ndronga nya wufumu wa babe waye Dhavhidhe.

³³ A na fuma ndranga ya Jakobe kala gupindruga; mufumo waye gima kha wu na nga vbela.”

³⁴ Mariya a di embela ngilozi, khuye: “Si na girega kharini isoso ulo nyi si mu tigo mwama?”

³⁵ Ngilozi yi di mu hakha, khiyo: “Liphuvbo nya Guage li na gu tshigela; tshivba ya Uye a guromo vbatshani ngudzu yi na gu fenengedza. Khu kharato, Gyanana nya gukatege gi na velegwago gi na ranwa Mwamana wa Nungungulu.

³⁶ Wona, nongo wago Elizabheta khuride nuye mimba wukhosaneni gwaye. Oyu khu ngima nya livbandre na moyo na khuride mimba, wule a nga bani a ranwa pwani gyumba,

³⁷ kholu ga Nungungulu gi mwalo gi si kodzegigo.”

³⁸ Khavbo avbo, Mariya, a di khuye “Eni nyi githumi gya Pfhumu, gu na girege gwangu kha nga idzo u ganedego khidzo.” Khavbo avbo, ngilozi yi di khuga yi mu tshiya.

Mariya a ngu holela ndriyaye Elizabheta

³⁹ Khu matshigu yale, Mariya a di donga lipfhumba a hongola khu guvbiredza dhoropani ga Judha, gu nga bani gu khalela mugigomoni.

⁴⁰ Na bede nyumbani ga Zakariya, a di losa Elizabheta.

⁴¹ Elizabheta, na pwide gulosa ga Mariya, gyanana gi di ndragandraga khu gunengela ndrani gwaye. Khavbo avbo, Elizabheta, na tade khu Liphuvbo nya Guage,

⁴² a di khusedza lito, a gu ganela, khuye: “U kategide, uwe, vbakari nya vanyamayi; kategide melego wa ndrani gwago.

⁴³ Wuhigo wangu wukhongolo! Kheni mani, eni, nya guta holedwe khu mayi wa Pfhumu yangu?

⁴⁴ Kholu, me ni gupwa gulosa gwago, gyanana gi di ndragandraga khu gutsaka ndrani gwangu.

⁴⁵ Kategide uye saye a na khodwago kholu ma na tadzisega magana a nga embedwago na ma guta khiyo ga Pfhumu.”

Mariya a ngu thula ndzimo nya gudhumise Pfhumu

⁴⁶ Khavbo avbo, Mariya a di khuye: “Hefemulo wangu wu ngu rungudza Pfhumu,

⁴⁷ ni monyo wangu wu ngu nengela ga Nungungulu, Muvbanyisi wangu,

⁴⁸ kholu wonide gusolega ga githumi gyaye. Khu lisine, gukhugela muhuno mimela ni mimela yi na khiyo nyi kategide,

⁴⁹ khaguva Nyadzitshivbe a nyi girede silo sikhongolo. Li kategide lina laye.

⁵⁰ Wuhindzi waye wu ngu thaphela mimela ni mimela ya vale va mu ningago githawo.

⁵¹ Giride silo sikhongolo khu mandza yaye, phalalegiside va nya matshandza.

⁵² Tshiside vafumeli musikhaloni gwawe nya wufumu a gu khusedza va nya gusolega;

⁵³ khuriside vandzale, a gu phalalegisa ni ndzala sitetema.

⁵⁴ Endredzide Israyeli, githumi gyaye, khu gudundruga wuhindzi waye.

⁵⁵ Kha nga idzo a nga bani a tumbiside khidzo ga vababe vathu, ga Abrahama ni livelego laye kala gupindruga.”

⁵⁶ Mariya a di khala ni Elizabheta gipimo nya migima miraru. Hwane nya isoso a di bwelela gaya.

Guvelegwa ga Johane

⁵⁷ Na ma vbohide matshigu yaye nya guhefemule, Elizabheta a di velega gyanana nya gikhwathana.

⁵⁸ Valongo ni vaakelane, na va wonide nya gukhavo Pfhumu yi mu tshude dzitshoni, va di tsaka naye.

⁵⁹ Na ma vbindride livbandre na mavili matshigu, khilo nya livbandre na mararu va dita hanisa wugwera gyanana; va di vbweta gu gi ninga lina la Zakariya, babe waye.

⁶⁰ Aholu mayi wakone a di ganedza, khuye: “Ahihi, gi na ranwa pwani khigyo Johane.”

⁶¹ Gasi avo va di khavo: “Mwalo nongo wago a gu ni lina lolo!”

⁶² Khavbo avbo, va di wudzisa babe wakone, khu gu nonedzela, khavo: “Lina muni u vbwetago gu thangisa gyanana?”

⁶³ Uye, na lombide gipulanguana a di lova khuye “Johane khilo lina laye.” Vatshavbo va di liwuga.

⁶⁴ Khavbo avbo, likana laye li di tulega, ni lidimi laye, li nga bani li tsharamede, li di tshulega nilo, a gu phela gu ganela a rungudza Nungungulu.

⁶⁵ Vaakelane vatshavbo va di tala khu githawo, ni ndruma yakone yi di pwala mugigomoni gwatshavbo gwa Judheya.

⁶⁶ Vatshavbo va nga pwago silo sesi, va di si vegedza myonyoni gwawe, khavo: “Gu na bani ari muthu muni gyanana gegi?” Ni tshivba ya Pfhumu yi diri ni uye.

Ndzimo ya Zakariya

⁶⁷ Khavbo avbo, Zakariya, babe wakone, a di tala khu Liphuvbo nya Guage a ganela, khuye:

⁶⁸ “A na rungudzwe Pfhumu Nungungulu wa Israyeli, kholu endrede vathu vaye ni guta va vbulugisa.

⁶⁹ A hi resede Muvbanyisi nya tshivba, a dugelago nyumbani ya githumi gyaye Dhavhidhe.

⁷⁰ Kha nga idzo a nga ganelago khidzo galegaleyo, khu magana ya vaprofeti vaye nya gukatege,

⁷¹ khuye a na hi vbulugisa ga valala vathu ni ga vatshavbo va hi zondrago:

⁷² A fela gu yeyedza wuhindzi a giredego vababe vathu, khu gu alakanya gidzumeledzwano gyaye nya gukatege,

⁷³ ni gu alakanya gisambanyo a nga girago ga babe wathu Abrahama,

⁷⁴ nya gu hi vbulugise ga valala vathu, hi mu thumela nyamba thava gilo,

⁷⁵ na hi agisidwe hi gu lulama mahoni gwaye matshigu yatshavbo nya guvbanye gwathu.

⁷⁶ Gasi uwe, gyananawe, u na ranwa pwani u muprofeti wa Nungungulu a khusegidego ngudzu, kholu u na thanga mbeli ga Pfhumu, gasi gu dongisela dzindzila dzaye.

⁷⁷ Gufela gu tivisa guvbanyiswa ga vathu vaye, a gu gutsetseledwa nya sighoho,

⁷⁸ khu wuhindzi nya wukhongolo wa Nungungulu wathu, hi ngu mana gu endredwa khu guwonegela gutago khu Ndzadzini,

⁷⁹ gasi guta wenengedza avo va vbanyelago gidemani ni gusivbalani nya lufu, gumogo ni gu hi gimbidzisa khu ndzila nya gurule.”

⁸⁰ Gasi igyo gyanana gi di gu dandra khu tanga ni wuhigo wa Nungungulu. Aholu gi di vbanyela mugiwulani kala litshigu gi nga dzi wonegisago ga na Israyeli.