Levhi 19 - Bhibhiliya Nya Guage

Milayo nya wukhodwa, nya tumbunugo ni mavbanyelo

¹ Pfhumu Nungungulu a di embela gambe Mosi, khuye:

² “Ganela ga tshangano watshavbo nya sanana sa Israyeli, u va embela, khuwe: Agani, kholu Eni Pfhumu Nungungulu wanu nyi agide.

³ Moyo ni moyo nya enu a na ninge githawo mayi waye, ni babe waye, mu vegedza matshigu nya Sabhadho yanu. Eni kheni Pfhumu Nungungulu wanu.

⁴ Mu nga khozelini vanungungulu nya malipha, gambe mu nga dzi gireleni vanungungulu nya gupfhudwe khu sikete. Eni kheni Pfhumu Nungungulu wanu.

⁵ Mwa guta ningelani ga Pfhumu Nungungulu phaso nya pwanano, ningelani khu gugola gwanu, gasi mu kodza guhakhwa.

⁶ Nyama nya miphaso gu vbwetega yi hodzwa kamwe litshigu lolo nya phaso, mwendro khu litshigu li landrelago; eyi yi na tshalago kala litshigu nya wuraru, yi na vbiswa niloni.

⁷ Aholu, muthu a gu yi hodza khu litshigu nya wuraru, yi na bani yiri nyama nya gughoheke, kha yi na hakhwa.

⁸ Ni wevbini a na yi hodzago, a na rwala nandru nya guvivbe gwaye, kholu kanyiside esi si phasedwego Pfhumu Nungungulu. Khu guralo, a na fuviswa vbakari nya vathu vaye.

⁹ Mwa gu vbwera mihandro marembweni gwanu, mu nga vbweri kala mahegiso nya lithembwe, gambe mu nga roleli ni esi si thegidego mwendro gutshaledzela.

¹⁰ Thembweni gwago nya miuvha, u nga bweleli hwane u ya havedzela esi si tshaledzedego, mwendro gu roledzela dziuvha dzi thegidego vbavbatshi. U na tshiyela sisiwana ni valuveli. Eni kheni Pfhumu Nungungulu wanu.

¹¹ Mu nga bi, mu nga liphi, mu nga pfhadzi muthu kwanu;

¹² mu nga sambanyi malipha khu lina Langu, kholu mwa gu gira kharato, mu na nyenyezisa lina la Nungungulu wanu. Eni kheni Pfhumu Nungungulu.

¹³ U nga bi mwendro gudzega gilo gya muthu kwanu. U nga hweli gulivba githumi gyago u khala ni hakhelo yaye kala limbe litshigu.

¹⁴ U nga vali muthu nya givbwiri, gambe u nga vegi gitshunganiso mbeli ga gikhumu. Thava Nungungulu wago. Eni kheni Pfhumu Nungungulu.

¹⁵ Vbamahungutunu u nga hambanisi nayo, u lamula khu ndzila nyamba lulama. U nga khedzi khu khovbe, u kalavela gisiwana mwendro gu emela oyu nya gumanele. U na lamula muakelane wago khu nayo ni lisine.

¹⁶ U nga gimbili u ganelela guvivba khu vathu va na gyanu, mwendro gusambanya malipha u songisa muthu kwanu. Eni kheni Pfhumu Nungungulu.

¹⁷ U nga vengeli muthu kwanu monyoni gwago. Aholu u nga digi gu kawuka muthu wa na gyanu, gasi u si ghohi khu kotani yaye.

¹⁸ U nga dzi phodzeli mwendro gu girela likhulo wa na gyanu, aholu u na haladza muthu kwanu kha nga idzo u dzi golago khidzo uwe mune. Eni kheni Pfhumu Nungungulu.

¹⁹ U na vegisa milayo yangu. U nga dzumeli sifuyo sago nya mafumbu nya guhambane si patane dangamwedo, si landrana. U nga yali dzimbewu nya mafumbu nya guhambane ga lithembwe la limwedo; gambe u nga ambali dzingandzu nya gulugwe khu dzikhindra nya mafumbu nya guhambane.

²⁰ Mwama a gu lala ni nyamayi nya khumbi a wutidwego khu mumbe mwama aholu a ngamba dzegiswa mwendro gu tshudwa, va vavili va na tsayiswa; aholu kha va na songwa, kholu nyamayi a di si gu tshudwi wugumbini.

²¹ Mwama a na resa nvuta nyangwatunu nya Tshatsha nya Tshangano, a ta ningela phaso nya gulivbe milandru ga Pfhumu Nungungulu.

²² Khu nvuta nya phaso nya ditshedzo, muphasi nya mhamba a na mu girela nayo nya guagiswe, mbeli ga Pfhumu Nungungulu; a na tsetseledwa gighoho a giridego.

²³ Avbo mu na guya belago tigoni nya sisambanyo, mu naya yala misimbo yatshavbo nya mihandro, mihandro yakone yi woneni na yi nyenyezide; mu na vbedza myaga miraru nyamba hodzani mihandro.

²⁴ Khu mwaga nya wu na, mihandro yakone yatshavbo yi na phasedwa Pfhumu Nungungulu, gu girwa buzo nya rungudzo.

²⁵ Khu mwaga nya livbandre, mu na hodzani enu mihandro yakone, gasi misimbo yi mi velegela mihandro nya gutale. Eni kheni Nungungulu wanu.

²⁶ Mu nga hodzi gilo gi gu ni novba, mu nga giri wutumbe mwendro gulola dzisolo.

²⁷ Mu nga vili tshiba mahegiso nya hungo wanu, mwendro guvila giledzu sihayani.

²⁸ Mu nga hatshedwi milini gwanu khu kotani nya vafi, mwendro gu hatshedwa dzindrova milini gwanu. Eni kheni Pfhumu Nungungulu.

²⁹ Mu nga nyenyezisi sanana sanu nya sagadzyana khu gu si kutsedzela wubhayi, gasi litigo li si dzi ningedzeli wubhayini, li fenengedzwa khu wuvivbi.

³⁰ Mu na vegisa matshigu yangu nya dzisabhadho, mu ninga githawo Wulanga wangu nya Guage. Eni kheni Pfhumu Nungungulu.

³¹ Mu nga khidzimeli maphuvbo nya vafi, mu ngayi ga vanyamandriki, mwendro ga va nya gulola dzisolo mu ya wudzisa gilo. Mu nga dzi nyenyezisi khisoso. Eni kheni Pfhumu Nungungulu wanu.

³² U na khuga u ema u ninga githawo vathu nya dzinvi; mu ninga githawo vathu vakhongolo. Thava Nungungulu wago. Eni kheni Pfhumu Nungungulu.

³³ Mu nga tshanisi muluveli a ta vbanyago vbakari gwanu.

³⁴ Muluveli a vbanyago vbakari gwanu, mu na mu phara kha nga wa na gyanu; mu na mu haladza gukhwatshi khu edzi mu dzi haladzago khidzo, kholu enu nenu, mu diri valuveli tigoni ga Egipito. Eni kheni pfhumu Nungungulu wanu.

³⁵ U nga hambanisi nayo vbamahungutunu; mu nga kalaveli vathu khu guvbungulela mipimo nya gulaphe, mwendro gulemela, mwendro khu pimo wa ndrani.

³⁶ Guvbwetega na muri ni sikalo nya lisine, ni efa nya lisine, ni hini nya lisine. Eni kheni Pfhumu Nungungulu wanu, nyi mi dusidego khu tigoni ga Egipito.

³⁷ Mu na sayisa sileletelo sangu satshavbo, mu landrisani milayo yangu yatshavbo. Eni kheni Pfhumu Nungungulu.”