Judha 1 - Bhibhiliya Nya Guage

Gulosa

¹ Eni, Judha, githumi gya Jesu Kristo nyi gu ndruye wa Jakobe, nyi ngu lovela ava va ranidwego ni gugolega ga Nungungulu Babe ni gu vhikedwa khu Jesu Kristo.

² Wuhindzi, ni gurula ni lihaladzo si na tale ngudzungudzu ga enu.

Vahevbudzi nya malipha

³ Sigodwa sangu, eni nyi di gira tshivba nya gu mi loveleni khu mahungu nya guvbanyiswe hi gu nago gumogo nanu. Nyi di dzipwa gukheni i tshukwana nyi mi lovela olu gasi gu mi tiyiselani litungani mu li dwanago khu kotani nya gukhodwe gu ningidwego sihathwa saye kala gupindruga.

⁴ Kholu vambe vathu nyamba khodwa va bede vbakari gwathu nyamba tidwa. Avo va gu vbindrugedza mahungu ma ganelago khu wuhigo wa Nungungulu wathu, va fela gu vhikela mavbanyelo yawe nya guvivbe. Va nyenyide gambe Jesu Kristo a gu uye basi Muhevbudzi ni Pfhumu yathu. Gale ngudzu Milowo nya Guage yi tivisidego gumbembiswa va gu hakhidego.

⁵ Ambari ulo mu matigo gwadi mahungu yaya, nya gu vbweta gu mi dundrugisa gukheni Pfhumu, hwane nya gu na tshude vathu va na Israyeli, a va dusa tigoni ga Egipito, a di mbembisa vatshavbo ava va ngamba khodwa.

⁶ Ni dzingilozi dzi ngamba kodza gu sayisa wurendra wawe, dzi hungidwe khu makhetshe nya gupindruge, phalani nya gidema, omu Nungungulu a dzi vegidego dzi virela Litshigu nya likhongolo nya gulamudwe.

⁷ Gufanana ni Sodhoma ni Ghomora ni mambe madhoropa ya vbafuvbyana mule, avbo va nga dzi ningelago wubhayini ni ga gighoho nya gubhayane khu wama wawe, madhoropa yoyo, ma khade giwonelo ga vathu vatshavbo, ma gu mana tsayiso nya nilo nya gupindruge.

⁸ Avo va gu na ni mavbanyelo yoyo, khandri va gu ghohela sivili sawe basi, va gu yeyisa ni Mufumo wa Nungungulu, va gu vala sivangwa nya guage sa Ndzadzini.

⁹ Ambari ngilozi nya yikhongolo, Migeli, kha ya gira isoso nya guvale, gikhati yi nga ganedzisana ni Sathane khu gu vbweta guti khu mani a na khalago ni girumbi gya Mosi. Migeli gima kha tiya gulamula Sathane khu gu mu vala. Aholu, a di mu embela, khuye: “Pfhumu a na gu kawuke.”

¹⁰ Khu guralo, vathu vovo va gu poyila esi va si si pimigo. Silo va sitigo khu tumbunugo nya mavbanyelo nga sirengo nyambana mapimo khiso si va pfhungumulago.

¹¹ Libango lawe! Kholu va bede khu ndzila ya Kayimi. Khu kotani nya lidora ni dzitsapawu va dzi ningede gighohoni nya guvivbegya Bhalahama; va dzi mbembisa khu gu ganedza nya nga ogu ga Kora.

¹² Vathu vava, khavo va gu gikhuvekiso mitshanganoni gwanu nya wundruye, va gu hodza ni gu leva malevelo nya dzitshoni, nya gukhunguvanyise. Avo va gu dzi havisa vabune wurumba wawe. Va gu khala nga mapfhi nyambana ndzadzi ma pengiswago khu phuvbo; va gu khala nga misimbo yile nya gu, ambari vbamatshigatunu yi si velegigo mihandro; va khade nga misimbo yi sigudwago ni mikhamba yaye, yifa yi banga;

¹³ mavimbi nya guvbenye ya linene, ma gugumugago ma pupuma liguvi nya siguro sawe nya dzitshoni; nga dzinyeledzi dzi legalegago, dzi vegedwego wulanga gidemani nya guthise ngudzu, kala gupindruga.

¹⁴ Khu kotani yawe, Enoki nuye, gitugulwana nya livbandre na sivili ga Adhamu, profetide khu kotani yawe, khuye: “Wonani, Pfhumu a nguta gumogo ni mabutho nya mazanazana nya sihathwa saye, gasi,

¹⁵ guta lamula vatshavbo, ni gu tsayisa vatshavbo va si thavigo Nungungulu, khu kotani nya mithumo yawe yatshavbo nya guvivbe, ni magana yawe yatshavbo nya guthise ma ganedwego khu sighohi si ngamba khodwa va nga bani na gu yuyutela khayo.”

¹⁶ Vathu vovo va gu ngurangura gikhati gyatshavbo ni gu singedzela vakwawe, va gu landrisela gudogorela nya myonyo yawe, va dzi khusedza, va pfhadza vakwawe.

Sitiviso ni milayo

¹⁷ Aholu enu, sigodwa sangu, dundrugani esi si nga ganedwa guhegulani khu vapostoli va Pfhumu yathu Jesu Kristo.

¹⁸ Avo va nga, khavo: “Gikhati gu na vbohago matshigu nya guhegise, va na manega vathu va na gu mi poyilago; vathu va landrago gudogorela gwawe nyamba khodwa.”

¹⁹ Khavo avo va girisago mihambano kholu va fumedwe khu gudogorela nya iso nya guvivbe nya nyama, va si fumwigo khu Liphuvbo.

²⁰ Aholu, enu sigodwa sangu, simamani mu andra ni gu tiya gukhodwani gwanu nya guage ngudzu, mu lombelela khu tshivba nya Liphuvbo nya Guage.

²¹ Dzi vegeni lihaladzoni la Nungungulu, na mu gu lirela gukhenu, Pfhumu yathu Jesu Kristo, khu wuhindzi waye a mi ninge guvbanya nya gupindruge.

²² Pwelani wusiwana ava va kanakanago,

²³ vambe va vbanyiseni, mu va dusa niloni; gasi ava vambe, dzi woneleni, vengani ambari guambala gwawe gu kunedego khu gunavela gwawe nya gunyenyeze.

Nombelo nya wudhumo

²⁴ Aholu, wule a gu na ni tshivba nya gu mi vhikele, gasi mu si dhedhereki; ni gu mi vbwelegedza a mi vbohisa na mu tsakide, na mu agide nyambana giwono mbeli nya wudhumo waye;

²⁵ uye a gu Nungungulu moyo basi, Muvbanyisi wathu, a ngu yela gu hakha khu ga Pfhumu yathu Jesu Kristo: Wudhumo, wuzundzo, wugulu, tshivba, wufumu gukhugela guhegulani ga mimela yatshavbo ni olu, kala gupindruga! Amen.