Joyele 1 - Bhibhiliya Nya Guage

I. TUNGU NYA KHABA Ndzala nya tshanisa yi vangidwego khu khaba ni gihala

¹ Aya khu magana ya Pfhumu Nungungulu ma nga rumedwago ga Joyele, mwamana wa Petuweli.

Tungu nya khaba

² Upwani esi enu madhota, yingisani, enu vathu vatshavbo mu vbanyago tigoni. Ina gu di nga girega silo nya esi guvbanyani gwanu, gani, mwendro matshiguni ya vakokwe vanu, gani?

³ Embeledzelani esi sanana sanu, ni sanana sanu niso si embeledzela sanana sawe; situgulwana si embeledzela simbe situgulwana.

⁴ Esi si tshidwego khu pungu, si hodzidwe khu khaba; iso si nga tshidwago khu khaba si hodzidwe khu mbasa niso si nga tshidwago khu mbasa, si hodzidwe khu sibukhwa.

⁵ Wugani mu lila, enu sidhakwa; wombani huwa mwatshavbo vaseli nya vbinyu, lilani khu kotani nya wadwa nya dosi nya diuvha, wu dusidwego maganani gwanu.

⁶ Kholu li dzude litigo nya tshivba li ta dhumela litigo langu, ni vathu nya vangi nyamba tidwa ni tengo wawe; magwaha yawe ma gu fanana ni magwaha nya nghala, na vari ni siwombo nya nghala nya ngadzi.

⁷ Va sasede marembwe yangu nya miuvha, va kuluwula ngwandzi nya kandzu wangu, va wu dzudzuga vbavbatshi wu tshala nyambana gilo; matamo yaye ma kwalala.

⁸ Lila nga nyamahegyane nya likendzi a ambadego gilendra a lilela mwama waye nya lidzaha.

⁹ Miningelo nya dzimbewu, niyo nya wadwa, yi mwalo gambe Nyumbani ga Pfhumu Nungungulu; vaphasi nya mhamba a gu sithumi sa Pfhumu Nungungulu, va swihade.

¹⁰ Va sasede lithembwe, litigo lomo gililoni, kholu va ghohetede tirigu, wadwa nya dosi nya dziuvha, mafura kha ma manegi gambe.

¹¹ Valimi va va vbede tshivba, va yali nya miuvha va womba huwa khu kotani nya tirigu ni mala, kholu dzimbewu dza mahangeni dzi fuvisidwe.

¹² Miuvha yi bangide, gu wu na ni kandzu; dimwa, ni ngindru ni manga; misimbo yatshavbo ya mahangeni yi bangide gu fuva litsako vbakari nya sanana nya vathu.

¹³ Enu vaphasi nya mhamba, ambalani silendra mu lila; wombani huwa enu mu thumelago vbagiluvelotunu; belani na mu ambade silendra, mu lila wutshigu watshavbo, enu mu thumelago Nungungulu wangu; kholu miningelo nya dzimbewu niyo nya wadwa, kha yi ningedwi gambe Nyumbani ga Nungungulu wanu.

¹⁴ Dzi agiseleni litshigu nya guhale, tivisani litshigu nya guloledziswe, mu tombanisa madhota ni vatshavbo vavbanyi va tigoni momu, Nyumbani ga Pfhumu Nungungulu wanu, mu lila ga Pfhumu Nungungulu.

¹⁵ Yowe! Litshigu lile! Kholu litshigu la Pfhumu Nungungulu lomo vbafuvbi.

¹⁶ Ina kha ha dzegedwa guhodza na hi gu si wona khu maho yathu, gani? Ina gutsaka ni gunengela kha ga fuviswa Nyumbani ga Nungungulu wathu, gani?

¹⁷ Mbewu yi hinide vbavbatshi nya mafu, sisangala si tshade nyambana gilo ni sithathe si pfhungumudwe, kholu tirigu yi bangide.

¹⁸ Sifuyo si ngu keta, mitshambi nya dzimombe yomo vbakari nya pfilupfilu, kholu wu mwalo wuhaviselo; ni mitshambi nya dzinvuta niyo yomo gutshanisekani.

¹⁹ Nyi ngu lila avbo gwago uwe Pfhumu Nungungulu, kholu nilo wu vbiside mahawo ya giwulani, ni malavbelavbe nya nilo ma khondriside misimbo yatshavbo ya khabini.

²⁰ Ni sirengo sa khabini niso si ngu lila gwago, kholu mitsongo yi bangide, ni nilo wu vbiside mahawo ya giwulani.