Josuwa 19 - Bhibhiliya Nya Guage

Thomba ya na Simiyoni

¹ Solo nya wuvili yi di thegela Simiyoni, Lihundzu la sanana sa Simiyoni, gukhedza khu dzindranga dzawe, thomba yawe, yi di manega vbakari nya thomba ya sanana sa Judha.

² Avbo nya thomba yawe va di mana madhoropa yaya: Bherisebha, Sebha, Moladha,

³ Hazari-Suwali, Bhala, Ezemi,

⁴ Elitoladi, Bhetuli, Horima,

⁵ Zikalagi, Bhate-Marikabhoti, Hazari-Susa,

⁶ Bheti-Lebhawoti ni Saruwemi; yatshavbo ma diri likhumi na mararu madhoropa gumogo mitalala yawe.

⁷ Ayimi, Rimoni, Eteri ni Asani; yatshavbo madhoropa mana gumogo ni mitalala yaye.

⁸ Mitalala yatshavbo yi nga bani yiri khu wubambe nya madhoropa yaya, kala Bhahalati-Bheri; a gu Rama wa Negebhi; eyi yi diri thomba ya sanana sa Simiyoni, gukhedza khu dzindranga dzawe.

⁹ Thomba ya sanana sa Simiyoni yi dusidwe khumo ga sanana sa Judha, kholu thomba ya sanana sa Judha yi diri yingi ngudzu guvbindra; khu guralo, thomba ya sanana sa Simiyoni yi nga dugelago vbakari ga na Judha.

Thomba ya sanana sa Zebhuloni

¹⁰ Solo nya wuraru yi di thegela ga sanana sa Zebhuloni, gukhedza khu dzindranga dzawe. Vbingano wawe wu diya kala Saridi.

¹¹ Vbingano wawe wu di gimbilela Pfoladambo, khu phuvbo ga Marala, wu vboha kala Dhabheseti, wu vbindra kala gitsongwanani gi nga khedzanago ni Jokineyamu.

¹² Khu Saridi wu di ndreya wuya Khugadambo, gibugatunu nya lidambo, kala vbinganoni wa Kisiloti-Tabori, wu khuga khu Dhabherati, wu gwela kala Jafiya,

¹³ wu vbindra khu Khugadambo ga Gati-Heteri, wu bela Eti-Kazimi, wuya Rimoni, wu ladzidego kala Neya,

¹⁴ wu dzundruluga khu Wuronga khu phuvbo ga Hanatoni, wuya vbelela kovani ga Ifita-Eli.

¹⁵ Gupata ni Katati, Nahalali, Siniromi, Idhala ni Bhetlehema, gu tshanganisa likhumi na mavili madhoropa ni mitalala yaye.

¹⁶ Eyi khiyo yi nga bani yiri thomba ya sanana sa Zebhuloni, gukhedza khu dzindranga dzawe; madhoropa yaya ni mitalala yaye.

Thomba ya na Isakari

¹⁷ Solo nya wu na yi di thegela ga Isakari; avbo ga sanana sa Isakari, gukhedza khu dzindranga dzawe.

¹⁸ Litigo lawe li di khugela Jezireyeli, Kesuloti, Sunemi,

¹⁹ Hafarayimi, Seyoni, Anakarati,

²⁰ Rabhiti, Khisiyamu, Ebhesi,

²¹ Remeti, Eni-Ganimi, Eni-Hadha ni Bheti-Pasesi.

²² Vbingano wawe wu di vboha kala Tabhori, Sahazima ni Bheti-Semesi, wu ladza kala Joridhani; yatshavbo ma diri likhumi na livbandre na limwedo madhoropa, gumogo ni mitalala yaye.

²³ Madhoropa yaya ni mitalala yaye, si diri thomba ya sanana sa Isakari, gukhedza khu dzindranga dzawe.

Thomba ya na Aseri

²⁴ Solo nya livbandre yi di thegela ga lihundzu nya sanana sa Aseri, gukhedza khu dzindranga dzawe.

²⁵ Litigo lawe li diri ni madhoropa yaya: Helikati, Hali, Bheteni, Akisafi,

²⁶ Alameleki, Amadhi ni Misali; vbingano wawe wu di vboha kala Karimelo khu Pfoladambo, ni Seyori-Libinati;

²⁷ wu bwelo khavbo wu wuya khu Khugadambo, wu bela Bheti-Dhagoni, wu vbindra kala Zebhuloni ni kovani ga Ifita-Eli, khu Wuronga ga Bheti-Emeki ni ga Neyeli, wu ladza kala nyambade ga Kabhuli,

²⁸ ni Hebroni, Reyobhi, Hamoni ni Khanani, wu vboha kala Sidhoni nya khongolo.

²⁹ Vbingano wu di bwelela wuya Rama, wu vboha kala likhokholani la Tiro, wu vbindra wuya Hosa, wuya vbelela Phwani, gukhugela Kalebi kala Akizibi.

³⁰ Va di ningwa gambe ni Uma, Afeka ni Reyobhi, gu enedza magumavili na mavili madhoropa ni mitalala yaye.

³¹ Madhoropa yaya ni mitalala yaye, khayo ma nga bani mari thomba ya sanana sa Aseri, gukhedza khu dzindranga dzawe.

Thomba ya na Nafitali

³² Solo nya livbandre na mweyo, yi di thegela ga sanana sa Nafitali, gukhedza khu dzindranga dzawe.

³³ Vbingano wawe wu di khugela Helefi, wuta khu nguhutunu wa Zahananimi, Adhami-Nekebi, Jabineyeli kala Lakumi, wuya vbelela tsongoni wa Joridhani.

³⁴ Vbingano, wu bwelela khu Pfoladambo ga Azinoti-Tabori, wu simama wuya Hukoki, khu Marandzi wu vbindra khu Zebhuloni, wu bela Aseri khu Pfoladambo, Judha khu Khugadambo, vbafuvbi ni Joridhani.

³⁵ Madhoropa yawe nya makhokhola ma diri aya: Zidhimi, Zeri, Hamati, Rakati, Kinereti

³⁶ Adhama, Rama, Hazori,

³⁷ Kedhesi, Edhereyi, Eni-Hazori,

³⁸ Iromi, Migidhali-Eli, Horemi, Bheti-Anati ni Bheti-Semesi; yatshavbo ma diri likhumi na livbandre na mana ni mitalala yaye

³⁹ Madhoropa yaya ni mitalala yaye, ma diri thomba ya lihundzu nya sanana sa Nafitali gukhedza khu dzindranga dzawe.

Thomba ya na Dhani

⁴⁰ Solo nya livbandre na wuvili yi di thegela lihundzu nya sanana sa Dhani, gukhedza khu dzindranga dzawe.

⁴¹ Litigo nya thomba yawe, li diri ni madhoropa yaya: Zora, Esitawoli, Iri-Semesi,

⁴² Sahalabimi, Ayijalomi, Itila,

⁴³ Elomi, Timina, Ekoroni,

⁴⁴ Eliteki, Gibhetoni, Bhalati,

⁴⁵ Jewudhi, Bheni-Bheraki, Gati-Rimoni,

⁴⁶ Me-Jarikomi ni Rakomi, ni gitigwana gi nga khedzana ni Jope.

⁴⁷ Litigo la na Dhani, li di ladzide liya vbavbandze nya mivbingano yawe kholu va na Dhani, va di dugide va ya dhumela lidhoropa la Lesemi, va li phanga va sasela vathu vakone, va khala umo avo, va li thangisa lina la babe wawe khavo; khilo Dhani.

⁴⁸ Madhoropa yaya ni mitalala yaye, ma diri thomba nya lihundzu la Dhani, gukhedza khu dzindranga dzawe.

Thomba ya Josuwa

⁴⁹ Avbo a nga vbedzago gu kabanisela litigo li khala thomba gukhedza khu mivbingano yaye, va na Israyeli, va di ninga Josuwa, mwamana wa Nuni, giavelo nya thomba ya vbakari gwawe.

⁵⁰ Va di mu ninga, kha nga guleletela ga Pfhumu Nungungulu, lidhoropa a nga li hathago la Timinati-Sera, gipandre gya mugigomoni gya Efrayimi; a vbahedza lidhoropa a khala umo.

⁵¹ Edzi khidzo dzithomba dzi nga kavedzedwago khu muphasi nya mhamba Eliyazari, ni Josuwa, mwamana wa Nuni, ni vathangeli nya dzindranga nya mahundzu ya Israyeli, va ya khu gulola khu solo na vari dhoropani ga Silo, na vari mbeli ga Pfhumu Nungungulu, nyangwani nya Tshatsha nya Tshangano.