Josuwa 10 - Bhibhiliya Nya Guage

Gidheyoni a ngu randredwa khu livbandre vafumeli

¹ Avbo Adhoni-Zedheki, mufumeli wa Jerusalema, a nga pwago gupwani Josuwa phangide lidhoropa la Ayi bwelo khavbo a li khungumula kha nga idzo a giridego Jeriko ni ga mufumeli waye, ni gupwane vathu va Gibheyoni va lombide gurula ga va na Israyeli, olu va gu vbanya vbakari gwawe,

² a di thava a khala ngudzu hwanga; kholu Gibheyoni a diri lidhoropa nya likhongolo nya gufanane ni mambe madhoropa nya mitsindza gambe li diri likhongolo gu vbindra Ayi, ni vama vaye vatshavbo va diri dzindrena.

³ Adhoni-Zedheki, mufumeli wa Jerusalema, a di rumela myango ga Howamu, mufumeli wa Hebroni, ni ga Pirani, mufumeli wa Jarimuti, ga Jafiya, mufumeli wa Lakisi, ni ga Dhebhiri, mufumeli wa Egilomi, a va embela, khuye:

⁴ “Deluni eno gwangu mu ta nyi phasedzela, hi hengela gu dwanisa Gibheyoni, kholu giride gurula ni Josuwa gumogo ni sanana sa Israyeli.”

⁵ Khavbo avbo, va di tombana vafumeli vale nya livbandre nya Vaamori, mufumeli wa Jerusalema, wa Hebroni, wa Jarimuti, wa Lakisi, ni Egilomi, va tshangana va gimbila gumogo, dzinyimbi dzawe dziya ghova tigoni ga Gibheyoni va dwana navo.

Josuwa a ngu phasedzela Gibheyoni

⁶ Vathu va Gibheyoni va di hongola lizumboni la Giligali, vaya embela Josuwa, khavo: “U nga digi sithumi sago, delu khu guvbiredza u ta hi phasedzela; hi vbulugise kholu vafumeli vatshavbo nya Vaamori, va khalago gigomoni va patanide gasi gu hi dwanisa.

⁷ Khavbo avbo, Josuwa a di khuga khu Giligali, uye gumogo ni vathu vaye vatshavbo nya dzindrena nya nyimbi.

⁸ Pfhumu Nungungulu a di embela Josuwa, khuye: “U nga khali hwanga kholu vatshavbo nyi na va ningela mandzani gwago; mwalo na moyo wawe a na tiyago guta mbeli gwago.”

⁹ Josuwa a dita va mana na va pfhade kholu uye a di khuga khu Ghiligali a pila wutshigu watshavbo na gu gimbila.

¹⁰ Pfhumu Nungungulu a di va tadza khu hwanga mbeli ga va na Israyeli, va dwana navo va sasedwa khu va na Israyeli vbafuvbi ni Gibheyoni, va va lundra khu ndzila yiyago Bheti-Horoni, a va sasela kala Azeka ni Makedha.

¹¹ Avbo va nga bani va tutuma gu thava va na Israyeli, releloni wa Bheti-Horoni, Pfhumu Nungungulu a di va thesela maralala nya siwindri nya sikhongolo na si gu thega khu ndzadzini, kala Azeka; avo va ngafa khu gu thegedwa khu ndzadzi nya siwindri vangi ngudzu, guvbindra avo va nga songwa khu matshari khu va na Israyeli.

Lidambo ni ngima si ngu emiswa

¹² Litshigu Pfhumu Nungungulu a nga ningela Vaamori mandzani ga sanana sa Israyeli, Josuwa a di Embela Pfhumu Nungungulu vbakari ga vatshavbo va na Israyeli, khuye: “Uwe lidambo ema vbatshani ga Gibheyoni; ni uwe ngima, mikovani ya Ayijalomi.

¹³ Lidambo li di ema ni ngima nuwo wu di ema kala vathu va dzi phodzela ga valala vawe.” Ina esi kha sa lowa Libhukuni la uye a Lulamidego, gani? Lidambo li di ema vbatshani damboni li si vbiredzi gu pfola, gipandre nya litshigu rumba.

¹⁴ Gima li si gu manegi litshigu nya nga eli, khu gale, ambari khu hwane gwaye, kholu Pfhumu Nungungulu a di yingisa lito la muthu, kholu Pfhumu Nungungulu, a di dwanela va na Israyeli.

¹⁵ Josuwa a di bwelela, gumogo ni va na Israyeli vatshavbo lizumboni gwaye Giligali.

Josuwa a ngu mola vale nya livbandre vafumeli a va songa

¹⁶ Vafumeli vale nya livbandre va di tutuma vaya sihala phalani dhoropani ga Makedha.

¹⁷ Va diya tivisa Josuwa, khavo: “Vale nya livbandre vafumeli va manidwe na va sihade phalani ga Makedha.”

¹⁸ Josuwa a di va hakha, khuye: “Rwalani livbandre siwindri nya sikhongolo mu ya si handzega vbatshani nya liphala, mu vegani vama vbale gasi va li ghadhi.

¹⁹ Gasi enu mu nga garali, simamani gulundra valala vanu mu songa avo mu va manago; mu nga va digini va bele madhoropani gwawe; kholu Pfhumu Nungungulu wanu, a va ningede mandzani gwanu.”

²⁰ Avbo Josuwa gumogo ni va na Israyeli, va nga va palago ni gu va songetela kala va va mbembisa, vambe va nga vbulugago, va di tutuma va thavela madhoropani nya makhokhola,

²¹ vathu vatshavbo va di bwelela ga Josuwa lizumboni gwawe Makedha na va tangade, khu guralo, mwalo na moyo a nga bani na gu tiya gutula likana ga sanana sa Israyeli.

²² Khu hwane, Josuwa a di khuye: “Tulani liphala mu nyi resela vafumeli vovo nya livbandre va guromo momo.”

²³ Va di gira kharato, va dzega vafumeli vale nya livbandre va nga bani vari phalani; mufumeli wa Jerusalema, mufumeli wa Hebroni, mufumeli wa Jarimuti, mufumeli wa Lakisi ni mufumeli wa Egilomi.

²⁴ Avbo va nga resago vafumeli vale ga Josuwa, uye a di tombanisa va na Israyeli vatshavbo a embela vathangeli nya vathu nya nyimbi va nga mu bangaladzago, khuye: “Hidzimelani mu ta gandra vbatshani nya dzithamo dza vafumeli vava khu migondro yanu; avo va di hidzimela vata gandra migondro dzithamoni gwawe.”

²⁵ Khavbo avbo, Josuwa a di va embela, khuye: “Mu nga thavi, ambari gu khala hwanga; tiyani longo mu khale dzindrena. Khidzo kharati Pfhumu Nungungulu a na girago ga valala vatshavbo mu na dwanago navo.”

²⁶ Josuwa na ganede esi, a di ruma gukhuye va songwe va vbayegwe vbatshani nya livbandre misimbo, avbo va nga khalago kala vbasilambotunu.

²⁷ Gupfolani nya lidambo, a di rumela gu va tshiswe khu vbamisimbotunu va rinywe phalani va nga bani va sihade umo. Va sega khu siwindri nya sikhongolo, si gu guromo vbale kala na muhuno.

Josuwa a ngu pala gambe livbandre na vavili vafumeli

²⁸ Khu litshigu lolo, Josuwa a di khozisa litigo la Makedha a va songa khu matshari, gumogo ni mufumeli wawe; a di sasela vatshavbo va nga bani vari umomo nyamba tshiya ni moyo. Mufumeli wa Makedha, a di mu gira kha nga idzo a nga girago mufumeli wa Jeriko.

²⁹ Khu hwane, Josuwa ni vatshavbo va na Israyeli, va di khuga khu Makedha, va hongola Libhina, vaya dwana navo.

³⁰ Pfhumu Nungungulu a di va ningela mandzani ga va na Israyeli, avo gumogo ni mufumeli wawe, gu sasedwa khu matshari lidhoropa gumogo ni vavbanyi waye, nyamba tshidwa ni moyo. Mufumeli wawe a di girwa kha nga idzo a nga girwago mufumeli wa Jeriko.

³¹ Khavbo avbo, Josuwa ni vatshavbo va na Israyeli, va di vbindra khu Libhina ni Lakisi, avbo va nga ya ghova avbo, va li dhumela.

³² Pfhumu Nungungulu, a di ningela lidhoropa la Lakisi mandzani ga na Israyeli, khu litshigu nya wuvili va di li wandra, va bwelo khavbo va sasela khu matshari vatshavbo va nga bani vari umomo, kha nga idzo va giridego lidhoropa la Libhina.

³³ Khavbo avbo, Howamu, mufumeli wa Gezeri, a di hongola aya phasedzela Lakisi; aholu Josuwa a di sasela gumogo ni vathu vaye nyamba tshala ni moyo.

³⁴ Josuwa gumogo ni va na Israyeli vatshavbo va di vbindra khu Lakisi va hongola Egilomi, va li randrela ni gu li dhumela.

³⁵ Khu litshigu lolo la limwedo, va di li wandra va li sasela khu matshari, va mbembisa vatshavbo, kha nga edzi va giridego lidhoropa la Lakisi.

³⁶ Khu hwane nya isoso, Josuwa gumogo ni vatshavbo va na Israyeli, va di khuga khu Egilomi vaya dhumela lidhoropa la Hebroni.

³⁷ Va di wandra lidhoropa la Hebroni ni mitalala yaye, va sasela khu matshari vathu vaye, gumogo ni mufumeli waye, nyamba tshiya ni moyo, kha nga idzo va giridego khidzo lidhoropa la Egilomi. Josuwa a di mbembisa lidhoropa, gumogo ni satshavbo si nga bani siri umo.

³⁸ Khavbo avbo, Josuwa ni vatshavbo va na Israyeli va di wugela Dhebhiri va li dhumela.

³⁹ A di dhumela lidhoropa ni mitalala yaye, gumogo ni mufumeli waye, a li sasela khu matshari, a li mbembisela muphelo gumogo ni satshavbo si nga bani siri umo. Kha nga idzo a giridego ga Hebroni ni ga Libhina gumogo ni vafumeli vawe, a di gira gambe kharato ga Dhebhiri ni ga mufumeli waye.

⁴⁰ Khu guralo, Josuwa a di sasela litigo latshavbo nya gipandre gya sigomoni khu Marandzi, Negebhi, panini ni releloni nya sigomo, gumogo ni vafumeli vaye vatshavbo, nyamba tshiya ni moyo, a mbembisa satshavbo si dagatago, kha nga idzo a leletedego khidzo Pfhumu Nungungulu wa Israyeli.

⁴¹ Josuwa a di khugela Kadhesi-Bharineya, a sasela kala Gaza; gumogo gambe ni litigo la Goseni kala Gibheyoni.

⁴² Josuwa a di khozisa vafumeli vatshavbo vava, a wandra mayigo yawe khu gumogo basi; kholu Pfhumu Nungungulu wa Israyeli a diri ni Israyeli.

⁴³ Khavbo avbo, Josuwa gumogo ni vatshavbo va na Israyeli, va di bwelela lizumboni gwawe tigoni ga Giligali.