Jona 2 - Bhibhiliya Nya Guage

Nombelo wa Jona ndrani nya ndzandzi

¹ Jona a di lombelela ga Pfhumu Nungungulu waye, nari ndrani nya ndzandzi.

² A ganela, khuye: “Wuvini gwangu, nyi lide ga Pfhumu Nungungulu; uye a nyi ninga phindrulo; khu phalani nya vafi, nyi lide gasi gu mana giphaso, uwe u pwide huwa yangu.

³ Kholu uwe u nyi rinyide guetani, monyoni nya linene, milondrwa nya mati yi nyi randrede; mavimbi yago yatshavbo, ma vbindride khu vbatshani gwangu.

⁴ Eni nyi di ganela, kheni: Nyi dzudzugidwe mahoni gwago, khu guralo, nyi na wuya gambe nyaluphye, nyita wona nyumba yago nya gukatege.

⁵ Mati ma nyi fenengedzide kala gu vboha hefemuloni gwangu, liphala nya vafi li nyi randrede, ni mahata ya matini ma nyi dzongeledzede hungoni gwangu.

⁶ Nyi relede kala guya vboha dzitshinani nya sigomo; nyi relela kala mafuni, migonyo nya litigo yi di nyi khothela kala gupindruga. Aholu khu thowoni nya vafi, u di vbulugisa womi wangu, uwe Pfhumu Nungungulu wangu!

⁷ Avbo hefemulo wangu wu nga bani wu tshimega, nyi di alakanya Pfhumu Nungungulu; nombelo wangu wu di gwela kala iyo gwago, nyumbani gwago nya gukatege.

⁸ Vale va khodwago khu sifananiso nyamba phasa gilo, va gu kanyisa wuhindzi wago.

⁹ Aholu, eni khu ndzimo yangu nya gubonge, nyi na gu girela miphaso; gisambanyo gyangu nyi na gi landrisa; guvbanyisa gwa guta khu ga Pfhumu Nungungulu.”

¹⁰ Pfhumu Nungungulu a di ruma ndzandzi, iyo yi ya gosa Jona mafuni funguni.