Johane 15 - Bhibhiliya Nya Guage

Jesu khuye litshina nya uvha

¹ Jesu a di khuye: “Eni nyi litshina nya lisine nya miuvha, Babe wangu khu mulimi wakone.

² Ni levbini litamo li nyi lumbago, la gumba ninga mihandro, uye a na li pila; gasi lile li ningago mihandro, a ngu li thena, li fela gu ninga mihandro nya yingi.

³ Enu mu agideni khu kotani nya magana nyi mi hevbudzidego.

⁴ Khalani neni, eni neni nyi na khala nanu. Kha nga olu litamo li si kodzigo gu ninga mihandro longa, la gumba khugela vbatshinatunu nya miuvha, kharato nugo gu na girega gwanu, mwa gumba khala ni eni.

⁵ “Eni nyi litshina, gasi enu mu matamo; uye a gu ni eni, eni naye, khuye a ningago mihandro nya yingi; kholu nyambana eni gimwalo mu na girago.

⁶ Uye a si khaligo neni, a na vegwa phuvbo, a banga kha nga litamo; matamo nya nga ayoyo ma gu wungedzedwa ma gu vbiswa.

⁷ Mwa gu khala ni eni, ni gu landrisani magana yangu, satshavbo iso mu na lombago mu na ningwa.

⁸ Babe wangu a na dhumiswa mwa gu ninga mihandro nya yingi; khu kharato, mu na khala vapizane vangu.

Jesu a ngu ninga nayo nya wuphya vapizane vaye

⁹ “Eni nyi mi gode, kha nga idzo Babe a nyi godego khidzo; simamani lihaladzoni gwangu.

¹⁰ Mwa gu vegedza milayo yangu, mu na simama lihaladzoni gwangu, kha nga eni nyi simamago lihaladzoni ga Babe wangu, kholu nyi nga vegedza milayo yaye.

¹¹ “Nya gu mi embela esi, gasi litsako langu li khale gwanu, ni gunengela gwanu gu tadzisege.

¹² Nayo wangu khoyu: Haladzanani kha nga idzo nyi mi haladzidego khidzo.

¹³ Mwalo a gu ni lihaladzo nya likhongolo guvbindra wule a ningelago womi khu gufela dzipari dzaye.

¹⁴ Enu mu dzipari dzangu mwa gu girani iso nyi mi rumago.

¹⁵ Kha nyi mi rani gambe sithumi, kholu githumi kha gi siti iso si girwago khu pfhumu yaye; nya gu mi rana dzipari dzangu, kholu nyi mi tiviside satshavbo nyi nga si pwago ga Babe wangu.

¹⁶ Khandrenu mu nga nyi hathago, kheni nyi mi hathidego nyi mi rumela, gasi muya ninga mihandro nya yingi ni gu mihandro yanu yi simame. Khu kharato, ni gevbini mu na lombago ga Babe wangu khu lina langu, uye a na mi ningani

¹⁷ Khiso esi nyi mi rumago: Vbanyani khu lihaladzo.

Mazondra nya litigo

¹⁸ “Litigo la gu mi zondra, dzitini gukhenu li phede kheni li nyi zondra.

¹⁹ Nari pwani mwa gu lumba litigo, ilo na li mi gola, kha nga li golago vathu vaye; aholu, la gu mi nyenya, kholu kha mu lumbi litigo, ni gu eni nyi mi hathideni vbakari gwaye.

²⁰ Dundrugani magana nyi mi embedego, nya gukheni: Githumi khandri gikhongolo guvbindra pfhumu yaye. Kha nga va nga nyi sanisago, va na mi sanisa nenu; va gu bani va vegedzide milayo yangu, va na vegedza nayo magana yanu.

²¹ Va na mi gira satshavbo sesi, khu kotani nya lina langu, kholu kha va muti wule a nyi rumedego.

²² Nari pwani kha nya va tivisa, va diri mwalo nandru; gasi olu va mwalo divalelo.

²³ Uye a nyi vengago, a ngu venga Babe wangu.

²⁴ Nari pwani kha nya nga gira siliwugiso nya sikhongolo vbakari gwawe, iso nya gu gima si si gu girwi khu mumbe muthu, na vari mwalo nandru; gasi avo, na va si wone, va di simama gu nyi zondra eni ni Babe wangu.

²⁵ Esi si giregide gasi gu tadzisega magana ma nga lowago Nayo, nya gukhayo: ‘Va nyi vengide nyambana nandru.’

²⁶ “Aholu, a guta Muphasedzeli, a gu Liphuvbo nya Lisine nyi na mi rumelago khu ga Babe wangu, a nata nyi fakazela.

²⁷ A nenu mu na nyi fakazela, kholu mu diri ni eni gukhugela guhegulani.