Johane 12 - Bhibhiliya Nya Guage

Jesu a ngu todzwa mafura khu Mariya

¹ Na gu nga tshade livbandre na limwedo matshigu, gasi guhodzwa Phasika, Jesu a diya Bhetaniya, iyo a nga bani a gu vbanyela iyo Lazaro, wule a nga mu wusago khu gufani.

² Va di mu girela guhodza. Lazaro a di romo nuye vbamezatunu ni Jesu, gasi Marta a diri uye muphameli wakone.

³ Khavbo avbo, Mariya, a di dzega gigasi nya mafura nya gunungele ngudzu, ayo ma nga bani ma gu rengwa khu dzitsapawu nya dzingi, a todza migondro ya Jesu, bwelo khavbo a yi bavbulela khu ndzudzu waye; nyumbani gwatshavbo gu di nungela mafura yale.

⁴ Judha Sikarioti, moyo nya vapizane vaye, wule a nga bani a gu vbweta gu mu ningela, a di khuye:

⁵ “Khu ginani ma ngamba rengiswa mafura yaya khu mazana mararu nya dzitsapawu nya parata, gasi guphasa sisiwana?”

⁶ Khandri a di ganela kharati khu gu thela kota khu sisiwana, aholu, khu kotani nya wuvafa waye, kholu, a diri uye muphari nya gikhwama, a di gutala guba iso si nga bani si gu thedwa umo.

⁷ Jesu a di khuye: “Mu digeni. Uye a ma vegedzide gasi gu nyi tola litshigu nya gudzingwe gwangu.

⁸ Sisiwana mu na bani muri naso kala gupindruga; gasi eni kha nyi na khala nanu gikhati gyatshavbo.”

⁹ Vajudha nya vangi, na va dzitide gukhavo Jesu womo vbale, va di mu yela, nasiri khu kotani yaye basi, aholu ni guya wona Lazaro, wule a nga mu wusago khu gufani.

¹⁰ Vakhongolo nya vaphasi nya mhamba va di hunga gikungo nya gusonge nuye Lazaro.

¹¹ Kholu, khu kotani yaye, Vajudha nya vangi va di gu pambuga ga vahevbudzi vawe, va gu khodwa ga Jesu.

Jesu a ngu bela Jerusalema

¹² Gandra ni dzimindru, vatshavbo va nga bani va dzude buzotunu, na va pwide nya gupwani Jesu a ngu vbweta gu vboha Jerusalema,

¹³ va di dzega matamo nya migindru, va mu khinga, na va gu emba, khu lito limwedo, khavo: “Hosana! A na rungudzwe uye atago khu lina la Pfhumu! A na rungudzwe Pfhumu ya na Israyeli!”

¹⁴ Jesu, na mane giburwana, a di gi khilela, kha nga guganela nya Milowo yi gu, khiyo:

¹⁵ “U nga thavi, nyamahegyane wa Siyoni. Khu mu woni mufumeli wago; wule atago na khilede giburwana!”

¹⁶ Guhegulani, vapizane vaye kha va nga wuti tshamuselo nya satshavbo sesi, aholu gikhati Jesu a nga dhumiswago, va di dundruga gukhavo esi si lovidwe na si gu mu lumba, gumogo ni gu wona gukhavo khiso si nga tadzisega gwaye.

¹⁷ Gidzemo gi nga mu wonago na gu rana Lazaro thowoni, gumogo ni gu mu wusa khu gufani, gi di ya tivisa mahungu yoyo.

¹⁸ Gidzemo nya vathu nya vangi gi di mu khinga, kotani gi ngapwago gupwani khuye a nga girago giliwugiso gile.

¹⁹ Vafarisi va di embeledzelana, khavo: “Mu ngu wonani nya gukhenu gimwalo gilo nya gugire! Vathu vatshavbo va gu landra uye.”

Vagreki va guvbweta gu wona Jesu

²⁰ Vbakari nya vale va ngaya Jerusalema gasi guya khozela litshigu lile nya buzo, va diromo navo Vagreki.

²¹ Va diya ga Filipi, givelegwa gya Bhetisayidha gwa Galileya, vaya mu lomba, khavo: “Hi di guvbweta gu wona Jesu.”

²² Filipi a diya embela Andreya; khavbo avbo, Andreya ni Filipi va diya tivisa Jesu.

²³ Uye a di va hakha, khuye: “Gi vbohide gikhati nya gudhumiswe Mwamana wa Muthu.

²⁴ Khu lisine, nyi ngu mi embelani, kheni: Mbewu nya tirigu ya gu thega mafuni yi sifi, yi na khala yonga basi; aholu ya gufa, yi na ninga mihandro nya yingi.

²⁵ Uye a dzi garadzago ngudzu khu gu sayisa womi waye, a na dzimeledwa khuwo; aholu, uye a nyenyago womi waye a ngu wu vegedza, gasi guya wu mana guvbanyani nya gupindruge.

²⁶ Uye a vbwetago gu nyi thumela, a na nyi landre; ni avbo nyi na gu manegago, gi na bani giromo nigyo githumi gyangu. Uye a na nyi thumelago, a na rungudzwa khu Babe wangu.

Jesu a ngu ganela khu mafelo yaye

²⁷ “Olu hefemulo wangu womo gutshanisekani. Nyi na kheni ginani? Baba, nyi vbulugise ga gikhati gegi nya sitshaniso? Olu a gu iso nyi nga si telago, ke!

²⁸ Baba, dhumisa lina lago!” Khavbo avbo, li dita lito khu Ndzadzini, khilo: “Gale na nyi li dhumiside, gambe nyi nga na gu li dhumisa.”

²⁹ Gidzemo gi nga bani giromo vbale, na gi pwide lito leli, gi di, khigyo: “Ndzadzi yi dzumago.” Vambe va di khavo: “Girumwa gya Nungungulu gi nga ganelago naye.”

³⁰ Jesu a di khuye: “Lito leli kha la pwala khu kotani yangu, aholu khu kotani yanu.

³¹ Olu gi vbohide gikhati nya gulamudwe litigo leli; ni gututumiswa mufumeli waye.

³² Gasi eni, gikhati nyi na khusedzwago vbatshani, nyi na ndrindra vathu vatshavbo vata gwangu.”

³³ A di ganela esi na guvbweta gu yeyedza mafelo yaye.

³⁴ Gidzemo gi di mu hakha, khigyo: “Nayo wu ngu hi hevbudza nya gukhuwo Kristo a na vbanya kala gupindruga. Khu ginani u gukhuwe Mwamana wa Muthu a na ni fanelo nya gu khusedzwe? Khu mani Mwamana yoyo wa Muthu?”

³⁵ Khavbo avbo, Jesu a di va embela, khuye: “Gikhati gegi mu ngari ni guwonegela; gimbilani na mu ngari ni guwonegela gasi mu si manwi khu gidema. Uye a gimbilago gidemani kha guti umo a yago.

³⁶ Na mu ngari ni guwonegela, khodwani guwonegelani, gasi mufela gu khala sanana nya guwonegele.” Jesu, na ganede esi, a di khuga, a gu mwalalega vbakari gwawe.

Gumba khodwa nya Vajudha

³⁷ Ambari ulo a nga gira siliwugiso nya singi mahoni gwawe, gima kha va khodwa gwaye,

³⁸ gasi gu tadzisega magana ya muprofeti Isaya, nya gukhayo: “Pfhumu, khu mani a khodwago khu magana yathu? Tshivba yaye Pfhumu a yi wonegiside ga mani?”

³⁹ Iso si nga va gira va si khodwi, khu magana a nga ganela gambe Isaya, khuye:

⁴⁰ “A di va sega maho, a gu bangisa myonyo yawe, gasi va si woni khu maho, ni gumba pima khu myonyo yawe, gufela gu va si vbindrugedzi mavbanyelo, nyi va vbanyisa.”

⁴¹ Isaya ganede esi kholu a di tuledwe gu wona gidhumo gya Jesu.

⁴² Ambari ni vathangeli nya Vajudha va di gu khodwa ga Jesu; aholu, va di gira khu gisihaledza, khu hwanga nya Vafarisi, gasi va si tutumiswi nyumbani nya nombelo.

⁴³ Kholu va di gola ngudzu gu dhumiswa khu vathu guvbindra gu dhumiswa khu Nungungulu.

Uye a khodwago ga Jesu a ngu khodwa ga Nungungulu Babe

⁴⁴ Jesu a di khusedza lito, khuye: “Uye a khodwago gwangu, khandri gwangu khodwago, a ngu khodwa ga wule a nyi rumedego.

⁴⁵ Ni wevbini a nyi wonago, a ngu wona uye a nga nyi rumelago.

⁴⁶ Eni nyi dzude tigoni kha nga wenengedzo gasi muthu watshavbo a khodwago gwangu a si khali gidemani.

⁴⁷ Uye apwago magana yangu, a si ma vegisi, khandreni nyi na mu lamulago, kholu kha nya tela guta lamula litigo, aholu guta li vbanyisa.

⁴⁸ Uye a nyi dangago ni gumba hakha magana yangu, a na ni mulamuli waye. Magana nyi hevbudzidego khayo ma na mu lamulago litshigu nya guhegise.

⁴⁹ Kholu esi nyi nga ganela khandri nyi di si khugela. Babe a nga nyi rumelago khuye a nga nyi embela iso si vbwetegago gu ganela ni guhevbudza.

⁵⁰ Eni nyi ngu dziti gukheni nayo waye guvbanya nya gupindruge. Khu kharato, esi nyi ganelago, nya gu landrisa magana ya Babe wangu.”