Joba 41 - Bhibhiliya Nya Guage

Guganela khu mahungu nya ngona

¹ Ina u na kodza gu mola ngona khu gilowo, bwelo khavbo u yi hunga lidimi laye khu ngodzi, gani?

² Ina u ngu kodza gu thela ngodzi thonvuni gwaye, mwendro gu yi pola gigundru gyaye u thela lisindra, gani?

³ Ina, yi nga lila avbo gwago yi lomba gu divaledwa, mwendro gu ganela nago khu magana nya guvbevbuge, gani?

⁴ Ina, yi nga gira nago gidzumeledzwano, gasi yi gu thumela kala gupindruga, gani?

⁵ Ina, u ngu kodza guhagana nayo, kha nga ginyoni, mwendro gu yi hungelela gasi yi tsakisa sanana sago nya sagadzyana, gani?

⁶ Ina, vathu va na gira bhindzu khiyo, va kabanisela va nya wugwewo, gani?

⁷ Ina, u nga khodza gu fenengedza lidowo laye khu silowo, mwendro gu tadza hungo waye khu silowo sa vatshevi, gani?

⁸ Nga linga gu handzega mandza yago vbatshani gwaye, u dwana naye, u na dzi laya u si engedzi gambe.

⁹ Uye a yi khuthago, khuye a na dwana nayo a yi pala, a gu dzi pemba; ni uye a yi wonago basi a gu vbela tshivba.

¹⁰ Mwalo muthu a yi tiyelago gu yi khutha, aholu, khu mani wule a kodzago gu dzi khusedza mbeli gwangu?

¹¹ Khu mani a phedego khuye a nyi ninga gilogyo, gasi nyi kodza neni gu mu bweledzela? Kholu satshavbo si guromo vbavbatshi nya lidambo, sa gu lumba Eni.

¹² Kha nyi na diga gu ganela khu mahungu nya sivbango saye, ambari khu tshivba yaye, ni wumburi nya makhalelo yaye.

¹³ Khu mani a kodzago gu yi tshula lidowo; mwendro gu yi hamisa likana?

¹⁴ Khu mani uye a kodzago gu yi tula likana, olu magwaha yaye ma thisago, na?

¹⁵ Magwaru yaye khayo wumburi waye, ma namarelanide ma tiya nga khwatshi ma di lemwa;

¹⁶ ligwaru ni ligwaru li namarede ga likwawe, nya gu gumba kodza guvbindra ni phuvbo khu vbakari.

¹⁷ Ma patane limwedo ni limwedo vbatshani ga likwawe, avbo ma si dzi kodzigo gutsapuruga.

¹⁸ Ya gu watshimula, gu duga dzitshahe nya gungangamele, maho yaye nga Wuronga nya guge.

¹⁹ Khu kanani gwaye, gu duga malavbelavbe, gu piriga ni dzitshahe nya nilo.

²⁰ Khu dzithonvuni gwaye, gu tuviga wutshi, nya gukhwatshi khali yi vilago, mwendro dzitshava dzi khondrago.

²¹ Ya gu hefemula, ya gu khondrisa magala; khu kanani gwaye, gu duga malavbelavbe.

²² Tshivba yaye yomo thamoni gwaye, ni wevbini a yi wonago a gu tedwa khu hwanga.

²³ Misivba nya nyama yaye yi patane gumogo, yi namarelane kha yi gimbiligimbili.

²⁴ Monyo waye wu tiyide nga giwindri, gu tiya gwaye, kha nga libwe nya gutshindre.

²⁵ Ya gu khuga yi ema gwa gu ndrendremela dzindrena, va pilega hwambo, va thava gusasedwa khiyo.

²⁶ Ambari wa gu yi paya khu litshari iyo kha yipwi gilo, ambari khu wulaho mwendro khu sighalala.

²⁷ Iyo ya gu wona simbi kha nga mwasi, sugu, yi wu wona nga simbo nya guhine.

²⁸ Iyo kha yi tutumiswi khu gighalala; ni siwindri nya fijiga, ya gu si wona nga mafu.

²⁹ Sighomba ya gu si wona nga dzitshava, ya gu hegiswa khu gupwa wungelengendze nya matshari.

³⁰ Vbavbatshi nya girumbu gyaye, momo magwaru nya guvbire; ya gu khwirira maragani, kha nga gilo nya guvbule.

³¹ Ya gu vhilusa mitsongo gukhwatshi khali yi vilago, yi gira linene gukhwatshi khali nya mafura.

³² Avbo yi vbindrago khavbo gu tshala tseneno nya gungangamele, ni mati nya linene ma aga nga dzinvi nya gikhosane.

³³ Mafuni gimwalo gilo gi fananago naye, kholu yi giridwe gasi yi si khali hwanga,

³⁴ Ya gu khedza yi yeyisa satshavbo si khusegidego, iyo pfhumu nya sirengo satshavbo nya wurena.”