Joba 4 - Bhibhiliya Nya Guage

Joba a ngu kawukwa khu Elifazi

¹ Khavbo avbo, Elifazi, mutemane, a di hakha, khuye:

² “Ina ha gu zama gu gu phasa khu magana nya gukari, hi na bani hi gu swira, gani? Gasi khu mani, a na kodzago gumba ganela gilo?”

³ Kholu hi ngu dziti gukhethu u hevbudzide vathu nya vangi, ni gu tiyisela nya vangi va vbeledwego khu tshivba.

⁴ Magana yago ma wuside nya vangi, avo va nga bani va vbweta gutshunganela ni gutiyisela avo va rerekidego.

⁵ Gasi olu, uwe u tedwego khu libango, wa gu vbela tshivba, olu ma gu khuhago, wa guvbisega.

⁶ Ina khandri githawo u ningago Nungungulu gi gu ningago gitumbo, gani? Ni mithumo yago nya gululame, yi gu ningago gutumba, gani?

⁷ Alakanya gwadi esi: “Ina womo afago nyambana nandru, gani? U di nga wona va nya gululama va mbembiswa, gani?

⁸ Kholu eni nya gu wona gukheni, avo va limago mithumo nya guvivbe ni gu yala guvivba, khiyo mihandro va vbwerago.

⁹ Khu furugedzo basi nya phuvbo ya Nungungulu, va na mbembiswa; vafa khu phuvbo nya likhulo laye.

¹⁰ A ngu degudza bhongo nya dzinghala nya guthise, a gulela ni magwaha nya dzinghala nya dzihanyi.

¹¹ Nghala yi nafa khu ndzala, kholu yi mwalo gambe pfimba, si phalalega sanana sa dzinghala nya migadzi.

¹² Va dita nyi embela mahungu khu gisihaledza; dzindzeveni gwangu gupwala nembo yoyo.

¹³ Vbakari nya Wutshigu avbo vathu va ladego, nyi di wona dzindroro ni mihari-hari,

¹⁴ nyi tedwa khu hwanga ni guthuruga, nyi ndrendremela gu khuyugela marambo yangu yatshavbo.

¹⁵ Gu di vbindra liphuvbo khu vbafuvbi gwangu, li veta giwombo gyangu, ndzudzu wangu watshavbo wu di ema;

¹⁶ Li di emide mbeli gwangu, aholu kha nya pima gifananiso gyaye; githusa gi di ema mbeli gwangu higyo hwe; hugo kape, nyipwa lito nya gukari, khilo:

¹⁷ Ina muthu nya gufe, lulamide mbeli ga Nungungulu, gani? Ina muthu a ngu dzi kodza gululama guvbindra Muvangi waye, gani?

¹⁸ Nungungulu kha tumbi ambari sithumi saye, ambari ga sirumwa saye a ngu wona sihoso;

¹⁹ ahati ga avo va khalago dzinyumbani nya libumba, siseketelo sakone si manegelago umo nya kudzudzwane! Va gu tshitingwa nga siwungu

²⁰ Va na phwatisedwa gukhugela dzimindrudzile kala wutshiguwule; va mbembisa muphelo, nyamba khathaledwa khu muthu.

²¹ Va gu piledwa ngodzi yi tiyisago tshatsha wawe, vafa na va sa mana guti.”