Joba 35 - Bhibhiliya Nya Guage

Magana nya wuraru ya Eliyu

¹ Eliyu a di engedza gambe, khuye:

² “Ina wa gu alakanya gukhuwe si lulamide iso u ganelago nya gukhuwe: Gululama gwangu gu ngu vbindra ga Nungungulu, gani?

³ Kholu u ngu, khuwe: Nyi na wuyedwa khu ginani ni gu mana ginani, nyamba ghoha?

⁴ Eni nyi na gu ninga phindrulo, uwe gumogo ni dzipari dzago u gu nadzo.

⁵ Khusa maho u khedza damboni, u na wona idzo ma khusegidego khidzo mapfhi vbatshani gwago.

⁶ Wa gu ghoha, khandri wa gu hosela Nungungulu, gani? Ni sighoho sago sa gu engedzelana, gasi ginani gi na giregago gwaye?

⁷ Wa gu bani u lulamide, ginani u mu ningago, mwendro ginani a na hakhago khu mandzani gwago?

⁸ Wuvivbi wago wu ngu dzi kodza gu ghoha mumbe muthu nya nga uwe, ni wuwadi wago, wu ngu ninga giphaso ga vambe vathu.

⁹ Vathu va gu keta va lila khu gu taledwa khu sigaradzo, va lomba gu tshudziswa mandzani ga avo va gu ni tshivba.

¹⁰ Aholu mwalo a ganelago, khuye: Womo hayi Nungungulu mugiri wangu, oyu a ningago dzindzimo nya wuzundzo vbawutshigutunu,

¹¹ uye a hi ningago mapimo guvbindra sirengo sa mafuni; bwelo khavbo a hi ninga guti guvbindra sinyoni sa damboni.

¹² Va gu keta, aholu Uye kha va phindruli, khu kotani nya matshandza ya va nya guvivbedwa khu monyo.

¹³ Lisine kheli, Nungungulu kha yingisi milombelo yi si phasigu gilo, Nyadzitshivbe gima kha na yi khathalela.

¹⁴ Nya nga olu u nga ganelago khuwe khu mu woni, mahungu yago momo mbeli gwaye; khu guralo, mu lirele.

¹⁵ Gasi olu, kha nga likhulo laye li si gu khondrigo, ambari gumba khathala ngudzu khu gu dzi khusedza ga vathu,

¹⁶ uwe Joba, wa gu dzegela gutula likana lago, u ganela magana nyamba phasa gilo, u wungedzela magana nya wupumbu avbo gwaye.