Joba 34 - Bhibhiliya Nya Guage

Eliyu wari khuye Nungungulu lulamide

¹ Eliyu a di engedza a ganela, khuye:

² Enu va nya guti yingisani magana yangu, tulani dzindzeve mupwe enu mu gu ni mapimo.

³ Kholu ndzeve khiyo yi hathelago magana nya yadi, kha nga lidimi li lingago guhodza nya gwadi.

⁴ Hongoleni hi vbweta iso si lulamidego, gasi hi kodze gu hatha igyo nya gyadi.

⁵ Kholu Joba a di khuye: Nyi mwalo nandru, aholu Nungungulu kha nyi ningi fanelo yangu.

⁶ Ambari olu nyi lulamidego, nya gu ranwa muthu nya malipha; nyi manega ni gilondra nya likhoro, na nyiri mwalo nandru.

⁷ Khu mani muthu nya gufanana ni Joba; uye a selago ndrwadza khwatshi mati a selago?

⁸ Uye a longolokago ni sighohi, a hengelago gumogo ni va nya guvivbedwa khu myonyo?

⁹ Kholu ganede, khuye: Muthu a gu gola Nungungulu, gi mwalo a wuyedwago khigyo.

¹⁰ Khu kharato, nyi yingiseni enu vathu mu pwisisago; Nungungulu kha tshuki a gira ugo guvivbidego, mwendro Nyadzitshivbe gu gira sighoho.

¹¹ Kholu a gu bweledzela muthu mayelano ni mithumo yaye, a mu ninga maningano khu dzindzila dzaye.

¹² Lisine limwedo, kheli: Nungungulu gima kha giri guvivba, ambari Uye nya Tshivba Yatshavbo kha tshuki a hambana ni lisine.

¹³ Gasi khu mani a mu vegidego gu fumela mafu? Khu mani u mu vegidego gu khala musayisi nya litigo latshavbo?

¹⁴ Nari pwani Nungungulu a gu pimisa khu wurumba waye basi, a dzegela sivangwa satshavbo liphuvbo a si furugedzedego,

¹⁵ vatshavbo va di hadza gumbemba, ni muthu a di hadza gu bwelela a khala kudzudzwane.

¹⁶ Gasi olu, uwe Joba, wa gu bani nuri ni mapimo, demba ndzeve u yingisa magana yangu.

¹⁷ Ina uye a hambanago ni lisine, a ngu kodza gu fumela, gani? Ina uwe u na tiya gu rwega nandru Uye a lulamidego ni Tshivba Yatshavbo, gani?

¹⁸ Khu mani a na embelago mufumeli, khuye: “Khu phasi gilo,” ni ga vathangeli, khuye: “Enu mu sighohi!”

¹⁹ Nungungulu kha khedzi giyemo nya vathangeli, mwendro gu gola sitetema, a nyenya sisiwana, kholu vatshavbo sivangwa nya gugirwe khu mandza yaye.

²⁰ Khu githugedza, sa gufa; vbakari nya wutshigu, mayigo ma thuruga ma mwalalega, va nya tshivba va dzegwa, nyamba dzegwa khu mandza nya muthu.

²¹ Maho ya Nungungulu ma gu wona magimbilelo nya vathu; a khedza gambe ni migondro yawe yatshavbo.

²² Mwalo mwedzi mwendro gidema si yelago gutshira umo gu sihadego sighohi.

²³ Kholu Nungungulu kha vbweti gu vega matshigu nya gulaphe gulinga muthu, ni gu mu dzega a mu yisa gulamudwani mbeli gwaye.

²⁴ A gu fuvisa va nya dzitshivba nyamba wudzisa muthu, vbawulangatunu gwawe, a vega vambe.

²⁵ Kha nga a wonago mithumo yawe, khu wutshigu wumowo basi, a va sasela a va mbembisa.

²⁶ A va veta kha nga sighohi, na va gu wonwa khu vathu vatshavbo.

²⁷ Kholu va mu pfhuraredego, va ndreya dzindzilani gwaye dzatshavbo a dzi emisidego.

²⁸ Khu kharato, va giride gukhavo, huwa nya sisiwana yi vbohe mbeli ga Nungungulu, Uye pwide gulila ga vahamugi.

²⁹ Aholu, Uye a gu degula, khu mani a na mu rwegago nandru? A gu siha khovbe yaye, khu mani a na mu wonago? Khu guralo, Uye a ngu fuma vathu gumogo ni mayigo.

³⁰ Gasi nala a si kodzi gufuma ni gu riyela mazinga vathu.

³¹ Gasi a si manegi uye a embelago Nungungulu, khuye: “Nyi dayide, gima kha nyi na nga ghoha gambe.”

³² Nyi yeyedze esi nyi gumba si wona; nya gu bani nyi ghohide, kha nyi na engedza gambe.

³³ Ina Nungungulu a di hadza gu gu ninga tshatshazelo, olu uwe u si dzumelego nandru wago, gani? Khuwe wabune u na gu dzi hathela, nasiri eni; a gu bani ari kharato, nyi embele iso u sitigo.

³⁴ Vathu nya mapimo va na ganela kha nga eni, ni avo va gengedego va nyi yingisago, va na khavo:

³⁵ Joba a gu ganela iso nyamba siti, magana yaye kha ma pwali gwadi.

³⁶ Joba a ngu simamisa gu lingwa, khu kotani nya dziphindrulo dzaye nya gufanana ni muthu nyamba khodwa!

³⁷ Kholu gighoho gyaye gya gu engedzelana gu hi wugela, a khwakhwathela mandza yaye avbo gwathu a engedzela gu wugela Nungungulu khu magana yaye.