Joba 30 - Bhibhiliya Nya Guage

Joba a ngupwa wuvi khu libango li mu thegedego

¹ Muhuno nya gu khala gihegiso ga vathu nya vadugwana guvbindra eni, vale vababe vawe khu gale va nga bani vari mwalo fanelo nya gugimbile ni dzimbwa dzi nga bani dzi ghula tshambi wangu.

² Bhindzu muni hi na yi manago khu mandzani gwawe, avo tshivba yawe yi vbedego khu gu gumba?

³ Va wondride khu wusiwana ni ndzala; va galagasela mugiwulani nya gihala, umo gu vbidego khu gale gu ghoheka.

⁴ Va gu hava nganga ni mahagane nya misimbo, mikhamba yakone yi khala guhodza gwawe.

⁵ Va gu tutumiswa vbakari nya vathu, va huwetwa kha nga idzo va huwetago khidzo mbafa.

⁶ Va gu khala miseleni nyambana mati nya mikova nya guthise; mavbalani ni dziphagoni nya siwindri.

⁷ Va gu keta vbakari nya magabi; va sihala vbavbatshi nya sirangalabwa.

⁸ Avo sanana sa vamadhadhavale, va gumba sayedwa gilo, va tutumisidwe tigoni.

⁹ Aholu eni olu nyi ndzimo yawe, nyi vbindrugedzide nyi khala givalo gwawe.

¹⁰ Va gu swireka kheni, va khuga vbafuvbi gwangu, kha va khathali khu gu nyi hetshela khovbeni.

¹¹ Kholu Nungungulu tshude ngodzi nya wulaho wangu, a nyi tsayisa; olu va tshude matomu mbeli gwangu.

¹² Va nya guhandruga va gu ema khu nyamudye gwangu va nyi reda, na va dongisede mazinga nya gu nyi tshunganise nyi thega.

¹³ Va fuvisa ndzila yangu, va engedzela gusaniseka gwangu nyi si mani ni muthu nya gu nyi phase.

¹⁴ Va gu nyi tela gukhwatshi va di duga khu gihogo nya gikhongolo va podego vbalibhiyotunu, va vbindra khu vbakari nya marumbi va nyi tela.

¹⁵ Nyi thegedwe khu dzimhango nya guthise, wuzundzo wangu wu vbuvbisidwe khu phuvbo, makhalelo yangu nya yadi ma mwalalegide kha nga lipfhi.

¹⁶ Olu hefemulo wangu wa gu vbalagela ndrani gwangu, nyi modwe khu matshigu nya gusaniseke.

¹⁷ Vbawutshigutunu marambo yangu ma gu pandrela, ginyalo gi nyi songago kha gi nyi ningi gurula.

¹⁸ Ngandzu yangu yi pferugide khu tshivba nya ngumbe yangu, yi nyi namarelago gu fanana ni ngolo nya ngandzu yangu.

¹⁹ A nyi rinyide maragani, nyi pfangana ni kudzudzwane ni nguma.

²⁰ Nya gu lila iyo gwago uwe Nungungulu; aholu khu nyi hakhi, nya gu ema mbeli gwago, aholu uwe wa gu nyi khedza basi.

²¹ Uwe u vbindrugedzide u khala muthu nya dzihanyi avbo gwangu, U nyi tsayisa khu tshivba nya gyandza gyago.

²² Wa gu nyi khusa nyi vbuvbiswa khu phuvbo, yi nyi yisa hwindzo, nyi vbuvbiswa khu gipupwane.

²³ Nyi ngu dziti gukheni U ngu nyi yisa lufutunu. Wulanga wu dongisedwego vathu vatshavbo va vbanyago.

²⁴ Lisine kheli, mwalo a thawuludzago mandza ga muthu a thegidego, avbo uye gutshanisekani gwaye a lombago gu phaswa.

²⁵ Ina kha nya lila khu wule a tshanisekago, gani? Kha nya pwela gisiro gisiwana, gani?

²⁶ Nyi di gu khevisela silo nya sadi, gambe nyi dugeledwa khu dzimhango, nyi di gu lirela wenengedzo, gu dita gidema.

²⁷ Monyo wangu wa gu vbisa nyamba hefemula, matshigu nya sigaradzo ma nyi tede khu githugedza.

²⁸ Nya gu gimbila gidemani nyamba wona safa nya lidambo, nyi ema vbakari nya tshangano, nyi lomba gu phasedzedwa.

²⁹ Nyi khade ndruye nya migehe, ni pari nya dzimbowa.

³⁰ Tshonge yangu yi vbide yi ngu surugela marambo yangu ma vbide khu gudwala.

³¹ Gitendre gyangu gi vbindrugedzide gi khala ndzimo nya gililo, ni sengele wangu wu khala lito la avo va lilago.