Joba 29 - Bhibhiliya Nya Guage

Joba a ngu alakanya matshigu nya gutsake mavbindridego

¹ Joba a di simama a ganela, khuye:

² “Nari gupwani nyi ngu khala kha nga idzo nyi nga bani nyi romo khidzo migima yi vbindridego, kha nga matshiguni Nungungulu a nga bani a nyi sayisa!

³ Gikhati mwenge waye wu nga bani wu wenga hungoni gwangu, ni gikhati nyi nga bani nyi gimbidziswa khu mwenge waye gidemani!

⁴ Kha nga idzo nyi nga bani nyi romo khidzo matshiguni nya wudzaha wangu, avbo Nungungulu a nga bani nari pari yangu, a vhikela tshatsha wangu!

⁵ Avbo nya Dzitshivbe a nga bani na gu khala ni eni, nyi randredwa khu sanana sangu.

⁶ Gikhati nyi nga bani nyi gu handza migondro yangu khu mahwe, khu siwindrini gu di goga mitsongo nya mafura nya gutale.

⁷ Nya gu khuga nyi hongola nyangwani nya lidhoropa, nyi diya khala vbagikhalotunu gwangu tendrelani nya gutale vathu.

⁸ Madzaha ma gu nyi wona, ma di ndreya ndzilani; ni vakhongolo va gu nyi wona va di khuga va ema khu githawo;

⁹ Manganagana ma di diga gu ganela, va sega magana yawe khu mandza, va si ganeli;

¹⁰ Vathangeli va di degula, malimi yawe ma tsharamela.

¹¹ Avo va nga bani va nyi yingisa, va di nyi wona na nyi kategide, ni maho ma nga bani ma gu nyi wona, ma di gira wufakazi khu eni,

¹² kholu eni nyi di gu tshudzisa sisiwana, si nga bani si gu lila, ni gu phasa sigulungu si gu mwalo vaphasedzeli.

¹³ Gikategiso gya oyu a nga bani nari vbafuvbi ni gufa gi dita avbo gwangu, nyi tsakisa monyo nya noni.

¹⁴ Nyi di ambala gululama, gu khala gifenengelo gyangu.

¹⁵ Eni nyi diri maho nya gikhumu ni mawundru ya gilima.

¹⁶ Nyi diri babe nya sisiwana, nyi lamula mahungu ya muthu nyamba muti khu nongameto.

¹⁷ Nyi di pandra sihaya sa va nya guvivbedwa khu myonyo, nyi dusa khu magwahani gwaye iso va si fundridego.

¹⁸ Nyi di gu ganela, kheni: Nyi na fela gihagani gwangu, gasi nyi engedzela matshigu yangu ma tala nga mafu.

¹⁹ Mikhamba yangu yi na nava kala matini, matamo yangu ma thegedwa khu thondrwane wutshigu watshavbo.

²⁰ Wuzundzo wangu wu na simama na wuri wuphya, ni wulaho wangu wu na tiya mandzani gwangu.

²¹ Avo va nga bani va gu nyi yingisa, va di khala khu githawo va lirela gupwa wusingalagadzi wangu.

²² Hwane nya gu bani nyi ganede, mwalo a nga bani a ganedza, magana yangu ma di salalegisa myonyo yawe.

²³ Va di gu nyi lirela khwatshi nyi ndzadzi, va sela magana yangu kha nga uye a selago ndzadzi nya guhegule.

²⁴ Nya gu va hegela, avo va di kanakana; gutshulega ga khovbeni gwangu, va di si kodzi gu gu dusa.

²⁵ Eni nyi diri muthangeli wawe, nyi va yeyedza ndzila, nyi fanana ni mufumeli vbakari nya masotshwa, mwendro mutangadzisi nya avo va lilago.”