Joba 22 - Bhibhiliya Nya Guage

Magana ya Elifazi

¹ Elifazi, Mutemane, a di hakha, khuye:

² “Ina muthu a na ni giphaso ga Nungungulu, gani? Ambari uye a gengedego a ngu phasega khu guti gwaye, gani?

³ Mwendro Nungungulu nya Tshivba Yatshavbo a ngu tsakiswa khu kotani nya gululame gwago, gani? Mwendro bhindzu muni a yi manago khu dzindzila dzago nya gululame, na?

⁴ A gu gu tsayisa khu kotani nya gukhodwe gwago, mwendro a gu gu lamula?

⁵ Khandri khu kotani nya mithumo yago nya guwegele yi yi gu yingi ngudzu, ni gu andra nya sighoho sago, gani?

⁶ U livbiside vandriyago na va sa gu ghohela gilo, u tshulela dzitshalu sisiwana.

⁷ Khwa ninga khokho nya mati uye a nga bani a gupwa lidora a sela, u hiya guhodza uye apwago ndzala.

⁸ Aholu u di ninga wulanga muthu nya gitetema, a khala umo muthu a zundzegago ga vatshavbo.

⁹ U bweledzide dzinoni na dziri mwalo gilo, u vbedza tshivba mandza nya sigulungu.

¹⁰ Khu guralo, u randredwe khu milaphwi, u thegedwa khu libango nya guthise.

¹¹ U fenengedzidwe khu gidema nyamba wona gilo, u langaladzwa khu mati nya talo.

¹² Ina Nungungulu mwalo vbatshani ndzadzini, gani? Nga wona dzinyeledzi nya dzikhongolo vbatshani yeyi. Idzo dzi khusegidego khidzo!

¹³ Gambe u ngu ganela, khuwe: A guti ginani Nungungulu khu silo sesi? Ina a ngu kodza gu ndraga mapfhi nya gusivbale ata lamula mahungu, gani?

¹⁴ Mapfhi makhuvi ma mu fenengedzago, gasi hi si mu woni, Uye a gu gimbila gimbila ndrengelengeni gwa ndzadzini.

¹⁵ Uwe wa gu vbweta gulandrisela dzindzila dza gale, umo gu gimbidego khumo vathu nya sighohi, gani?

¹⁶ Avo va dusidwe omu na gi si gu vbohi gikhati gyawe; avo, giseketelo gyawe gi nga kukulutwago khu ndrambi nya mati.

¹⁷ Avo va di gu embela Nungungulu, khavo: Khuga avbo gwathu. Ginani a yelago gu hi girela Uye nya Tshivba Yatshavbo?

¹⁸ Khuye a nga bani na gu tadza dzinyumba dzawe khu dzithomba, aholu makungo ya va nya guvivbedwa khu monyo, ma na khale hwindzo ni eni.

¹⁹ Va nya gululama va di si wona va nengela, ni avo va gu mwalo nandru va di va tsorodzela,

²⁰ khavo: Khu lisine valala vathu va mbembisidwe, thomba yawe yatshavbo yi dagarede khu nilo.

²¹ Gasi olu, dzi tshanganise ni Nungungulu, u kodze gu mana gurula gwaye, khu kharati, u na vbanya nu tangade.

²² Dzumela a gu hevbudza milayo ya kanani gwaye, u vegedza monyoni gwago magana yaye.

²³ Wa gu vbindrugedza u khodwa ga Uye a gu ni Tshivba Yatshavbo, a nata gu wusedza. Aholu gu vbweta u dusa satshavbo nya guvivbe tshatshani gwago.

²⁴ Khavbo avbo, u na wungedzela ndralama kha nga kudzudzwane, ni ndralama ya Ofiri, kha nga siwindri sa tsongoni.

²⁵ Uye nya Tshivba Yatshavbo, a na bani nari Uye ndralama yago ni parata yago nya gutale.

²⁶ Khavbo u na manago gutsaka ga Uye nya Tshivba Yatshavbo, u bwelo khavbo u khusedza khovbe yago u khedza Nungungulu khu gitumbo.

²⁷ U na lombelela avbo gwaye, Uye a na gu hakha, kharato u na tadzisa gisambanyo gyago.

²⁸ Wa gu vbweta gu gira gilo nya gukari, gi na gu dugela gwadi, dzindzilani gwago, u na wona safa nya wenengedzo.

²⁹ Wa gu hembuludwa, uwe u na khuwe: Nyi khusedze! Kholu Nungungulu a gu vbanyisa avo va dzi nogisago.

³⁰ Uye a na vbanyisa ni uye a manegago nari ni nandru, uye a na vbulugiswa khu gululama nya mandza yago.”