Joba 14 - Bhibhiliya Nya Guage

Joba a ngu ganela khu gurola nya matshigu nya muthu

¹ “Muthu a velegidwego khu nyamayi, matshigu yaye ma rode, na ma tade khu sigaradzo.

² A gu rumbuga gu fanana ni genge, bwelo khavbo a wu na, a mwalalega gu fanana ni mwedzi, a si wonegi gambe;

³ Ina khuye muthu nya nga oyu u tulago maho yago u mu khedza, u na nyi dzega u nyi yisa phathani nyi ya lamudwa nago, gani?

⁴ Ina khu mani a dzi kodzago gu dusa gilo nya guage, ga gilo nyamba aga, na? Khu lisine mwalo!

⁵ Matshigu nya muthu ma pimidwe u sayede tengo nya migima yaye, u mu vegede vbingano uye a gumba wu kodza gu wu ndraga.

⁶ Khu guralo, dusa maho yago mbeli gwaye, gasi u mu ninga gikhati nya guhefemule, gu fanana ni githumi, gi tsakago khu gu khumuka, khu thumoni.

⁷ Gyomo gitumbo ga simbo, kholu, ambari wa gu pidwa matamo yaye, wu ngu simama wu thunga, a manega ni mahagane nya gunyuge.

⁸ Ambari mikhamba yaye ya gu hina mafuni, ni tshina yaye yifa vbavbatshi,

⁹ simbo wowu wa gupwa mati, wu na wuga wu thunga matamo kha nga simbo nya wuphya.

¹⁰ Gasi muthu a gufa a vbeledwa khu tshivba, gu duga hefemulo waye, gasi a guya hayi?

¹¹ Kha nga mati nya yiphwa ma vbwago, ni mati nya mitsongo ma bangago,

¹² kharato nugo muthu a ngu lala a si wugi, ndzadzini gu si manegi gambe, uye kha na khendzuga, ambari gu wuga khu ligovbeni gwaye.

¹³ Naripwani u ngu kodza gu nyi siha phalani nya vafi, u nyi sihadza umo kala livbela likhulo lago, u di hadza gu vega gikhati nya gu nyi alakanye khigyo!

¹⁴ Naripwani muthu a gufa, a ngu dzi kodza guwuga a vbanya gambe, nyi di hadza gu tiyisela sigaradzoni gwangu gwatshavbo kala nyi wona gutshudziswa gwangu.

¹⁵ Wa gu nyi rana, nyi di hadza gu gu hakha; u di hadza gutsaka khu thumo nya mandza yago,

¹⁶ gambe u di vbweta gu saya magandrelo yangu, u si khedzi khu sighoho sangu.

¹⁷ U di hadza gu thela guvivba gwangu sakuni u sona, u siha umo sighoho sangu.

¹⁸ Kha nga gigomo gi khungumugago gi vbela, ni giwindri gi wumbulugago khu wulanga waye,

¹⁹ kha nga mati nya mitsongo ma ghubhulago siwindri, ni ndrambi yi kukulutago mafu, wa gu vbedza kharato gitumbo gya muthu.

²⁰ Uwe wa gumupfhungumula, u va fuvisa nyamba wonega gambe, u vbindrugedza giyemo gyaye u mu diga a hongola.

²¹ Gani si ngu zundzwa sanana saye, uye kha dziti; ambari sa gu tshaniswa, uye kha si woni.

²² A napwa basi guvbisa milini gwaye, uye mune, a lilela hefemulo waye.”