Joba 13 - Bhibhiliya Nya Guage

Joba a ngu tumba Nungungulu guvbindra dzipari dzaye

¹ “Maho yangu, ma si wone satshavbo sesi, nyi si wone khu maho yangu, dzindzeve dzangu dzi yingisa ni gu si pima.

² Iso mu sitigo, eni neni nyi ngu siti; kha mu nyi vbindri khu gilo.

³ Aholu nyi na ganela ni mune nya Tshivba Yatshavbo; nyi dzi vhikela mbeli ga Nungungulu.

⁴ Kholu enu mu valugi nya malipha, enu mwatshavbo mu dzinyanga nyamba phasa gilo!

⁵ Nari pwani mu ngu kodza gu degula mu si ganeli gilo, nyi di hadza gukheni mu na ni guti.

⁶ Yingisani nyi mi embelani iso si guromo monyoni gwangu, mu tule dzindzeve nyi mi ninga phindrulo nya malito ya kanani gwangu.

⁷ Ina mu na ganela guvivba khu lina la Nungungulu, gani? Mu khala dzifakazi dzaye nya malipha, gani?

⁸ Ina enu mu ngu kodza gu mu emelani, gani? Mu vhikela Nungungulu, gani?

⁹ Nari gukhwatshi a gu mi thethisa, mu di hadza gu vbuluga, gani? Mu nga kodza gu mu kanganyisa nga idzo mu kanganyisago khidzo vathu, gani?

¹⁰ Khu lisine Uye a na mi kawukani, mwa gu gira gihathela khu gisihaledza.

¹¹ Ina wugulu waye kha wu na mi thela hwanga, mu thuswa khu guthisa gwaye, gani?

¹² Mipimiso yanu yi vbevbugide yi fanana ni nguma, ni makhokhola yanu kha ma tiya ma gu fanana ni libumba.

¹³ Segani magana mbeli gwangu, nyi ganele eni. Nyi mwalo mahungu khu dugeledwa khu gevbini gilo.

¹⁴ Sa gu phasa ginani, ambari nya gu phara nyama yangu khu magwaha, ni gu fumbaredza hefemulo wangu khu mandza.

¹⁵ Ambari a gu nyi songa, nyi mwalo gimbe gitumbo; gambe mbeli gwaye, eni nyi na simamisa ni mavbanyelo yangu.

¹⁶ Nya gu gira esi, khiso si na gu nyi vbanyisago, kholu gimwalo gighohi gi na tiyago gu ema mbeli gwaye.

¹⁷ Yingisani gwadi magana yangu mu demba dzindzeve mupwe iso nyi mi embelago.

¹⁸ Eni nyi dzi vegisede gu dzi ganelela mahungu yangu, kholu nyi ngu dziti gukheni nyi mwalo nandru.

¹⁹ Khu mani a dzi kodzago gu dwana ni eni? A gu bani na romo, nyi na sega likana nyifa.

²⁰ Nya gu lomba basi silo sivili, kharato, kha nyi na gusihela khovbe yangu.

²¹ Dusa gyandza gyago vbatshani gwangu u si nyi thusedzeli gambe khu khorodza yago.

²² Nyi rane, eni nyi na gu ninga phindrulo, mwendro, gu nyi diga nyi ganela, Uwe, u nyi phindrula.

²³ Gasi singani sihoso ni sighoho nyi giridego? Nyi yeyedze iso nyi hosidego niso nyi ghohidego.

²⁴ Khu ginani u nyi sihelago khovbe yago, u nyi gira nga nala wago?

²⁵ Wa guvbweta gu thela hwanga lihagane leli, li vbuvbisidwego khu phuvbo, gani? Mwendro gu tutumisa mavivi nya gubange, gani?

²⁶ U nyi vetide khu silo nya guvbise ngudzu, u nyi tsayisa khu sighoho sa wudzahani gwangu.

²⁷ U thede giphili migondroni gwangu, u khevisela umo nyi gandrago umo, u vegela vbingano migondro yangu.

²⁸ Nya gu vbela kha nga gilo nya guhine, gi tshunganelago, ni mwendra wu hodzwago khu muhwa.”