Joba 12 - Bhibhiliya Nya Guage

Joba a ngu ninga phindrulo Zofari

¹ Joba a di hakha, khuye:

² “Lisine, enu mu vathu, aholu mu nafa gumogo ni guti gwanu.

³ Aholu eni neni nyi na ni mapimo nya nga yanu; kha nyiri gyanana avbo gwanu. Khu mani a hangwago khu silo nya nga esi?

⁴ Eni nyi di khala gihegiso ga dzipari dzangu, avbo eni nyi nga lombelela ga Nungungulu, Uye a nyi ninga phindrulo; muthu nya lisine ni gululama nyi di khala gihegiso.

⁵ Vathu va khadzisegidego va gu hega avo va tshunganelago va thega.

⁶ Mitshatsha nya dzimbafa ya gu khadzisega, ni vale va valago Nungungulu, va gu khala na va tiyide; Nungungulu a gu va ninga satshavbo mandzani gwawe.

⁷ Gasi olu, uwe wudzisa sirengo, iso si na gu hevbudza, ni sinyoni sa damboni si na gu ninga lisine,

⁸ mwendro gu ganela ni mafu, ayo ma na gu hevbudza; ni dzindzandzi dza linene dzi na gu embela mahungu.

⁹ Khu mani a si pimigo gilo khu satshavbo silo sesi, gukhuye khu Pfhumu Nungungulu a si giridego khu mandza yaye, na?

¹⁰ Mandzani gwaye yomo mihefemulo nya sivangwa satshavbo si vbanyago, ni maphuvbo nya vathu vatshavbo.

¹¹ Gasi ndzeve khandriyo yi hathelago malito, kha nga lidimi li lingago guhodza, gani?

¹² Guti gu na ni vale va gumbidego. Guvbanya matshigu nya gulaphe gu ngu ninga gupimisa.

¹³ Nungungulu khuye a gu na ni guti ni tshivba, khuye a layago vathu bwelo khavbo a va ninga mapimo.

¹⁴ Iso Uye a si pfhungumulago, kha si vbahedzwi khu muthu, ni uye a mu khothelago, kha kodzi gu tuledwa khu muthu.

¹⁵ A gumba wisa ndzadzi, mafu ma gu banga, a gu tulela ndzadzi, litigo la gu taledwa.

¹⁶ Tshivba ni guti somo avbo gwaye, ga uye a sengwago ni wule a sengago, vatshavbo vomo mandzani gwaye.

¹⁷ A ngu phanga madhota, a ma dusa vbagikhalotunu gwawe, valamuli a va gira sipumbu.

¹⁸ A ngu phalalegisa tshivba nya vafumeli, a va hunga giwunu khu makhetshe.

¹⁹ A ngu dusa vaphasi nya mhamba wulangani wawe, a vbwasamisa sitetema.

²⁰ Vatshumayeli kha va ngu gu mana magana nya guganele, a ngu vbungula mapimo ga sikhosane.

²¹ A ngu thela dzitshoni vathangeli, a vbedza tshivba nya sitetema.

²² Khuye a tugulago iso si guromo guetani nya gidema, si wonega safani nya mihani.

²³ Khuye a andrisago mayigo, bwelo khavbo a ma mbembisa; a phalalegisa, bwelo khavbo a ma tshanganisa.

²⁴ Khuye a dusago mapimo ga vafumeli va mafuni, a va dzimedza va legalega giwulani nyambana ndzila.

²⁵ Va gu gimbila na va guphiphithela gidemani, nyamba wona wenengedzo, a va gira va dhedhereka va thega nga vathu nya guleve.”