Joba 11 - Bhibhiliya Nya Guage

Zofari a ngu ninga nandru Joba

¹ Zofari, Munahami, a di phindrula, khuye:

² “Ina magana nya gutale nya nga aya, ma ngu tandregwa gu phindrudwa, gani? Ina muthu nya guganele ngudzu, a na ni lisine, gani?

³ Ina mapongowongo yago kha ma na degudza vathu, gani? Ina u na hembulula vambe vathu, nyamba thedwa nuwe dzitshoni khu muthu, gani?

⁴ Uwe u embede Nungungulu, khuwe: Mavbanyelo yangu ma lulamide, nyi mwalo nandru mbeli gwago.

⁵ Oh! Naripwani Nungungulu a ngu tula likana laye, a gu ninga phindrulo,

⁶ a gu tulela misihalo nya guti, kholu mapimo yaye ma ngu samadzisa, dziti gwadi gukhuwe Pfhumu Nungungulu kha gu tsayisa khu gutala nya sighoho sago.

⁷ Ina u ngu yela guti sihalo wa Nungungulu ni guvbelela ga uye nya Tshivba Yatshavbo, gani?

⁸ Guti gwaye gu khugegide guvbindra ndzadzini bwelo khavbo gu eta guvbindra liphala nya vafi. Gasi uwe, ginani u no girago gasi gu pima silo sesi?

⁹ Guti gwaye gu navide guvbindra litigo, gu anamide guvbindra linene.

¹⁰ Uye a gu rumela gu modwa muthu, a mu yisa gulamudwatunu, khu mani a dzi kodzago gu mu himbedzela?

¹¹ Kholu Uye a ngu vati vathu va si phasigu gilo, a nguti ni mithumo yaye nya guvivbe, khu gu mu wona basi.

¹² Gipumbu gi na mana mapimo, litshigu buru nya likhabi yi na velegago muthu.

¹³ Wa gu dzi ningela gwaye khu monyo wago watshavbo, u khusedza mandza yago u lombelela gwaye;

¹⁴ wa gu dzudzuga hwindzo wuvivbi wa mandzani gwago, u si dzumeli gukhuwe guvivba gu bela tshatshani gwago,

¹⁵ wa gu thuma isoso, khovbe yago kha yi na khala dzitshoni, u na tiya nyamba thava gilo.

¹⁶ Uwe u na divaledwa khu wuvi u wu pwidego, u na wu alakanya basi, kha nga mati ma vbalagidego.

¹⁷ Guvbanya gwago gu na gira safa kha nga mihani; ambari gwa gu manega gidema, gu na wonegela kha nga wuronga.

¹⁸ U na tiya longo, kholu u na bani nuri ni gitumbo; u na khadzisega u lala ligovbe nya ladi.

¹⁹ U na lala ligovbe nyamba thuswa khu muthu; vathu nya vangi va na gu suvela makategwa.

²⁰ Aholu maho ya vathu nya guvivbedwe khu monyo, ma na mbembiswa, gima kha va na mana wuthavelo, gitumbo gyawe basi, khu guvbela hefemulo vafa.”