Jeremiya 9 - Bhibhiliya Nya Guage

Manyala mapimoni ya Vajudha

¹ Nari gupwani hungo wangu wu di vbindrugedzide wu khala nambo nya mati, ni maho yangu ma khala gifefe nya marongo! Khavbo avbo, nyi di hadza gu lila wutshigu ni mihani khu kotani nya gusongwe ga nyamahegyane wa vathu vangu.

² Nari pwani ga Nungungulu nya gu mana wulanga giwulani, gasi, nyi kodza gu hambana ni vathu vangu nyi ya khala hwindzo navo, kholu avo vatshavbo sibhayi, gambe tsawa nya vakanganyisi!

³ Va gu peta lidimi li fanana ni wulaho wu ghwimbidwego, gasi gu ganela malipha; va gu dzi tiyisa tigoni, aholu khandri khu lisine, kholu va gu tsakela guvivba, kha va khathali khu Eni; a ngu ganela Pfhumu Nungungulu.

⁴ Moyo ni moyo a na dzi wonele ga pari yaye, gambe a nga tumbi valongo vaye; kholu valongo vatshavbo gi mwalo va girago, vbavbandze nya gu zame gu kanganyisa basi, ni dzipari dzatshavbo nidzo dza gu gira milembo basi.

⁵ Maganani gwawe gu mwalo lisine, va gu kanganyisana khu gyawe, avo va di hevbudza lidimi lawe gu ganela malipha; va olovede gu gira guvivba, kha va kodzi gu dzi laya.

⁶ Va gu vbanya vbakari nya guvivbe; khu kotani nya isoso, kha va khathali khu Eni; a ngu ganela Pfhumu Nungungulu.

⁷ Khu guralo, Pfhumu Nungungulu nya Tshivba Yatshavbo, a ngu ganela kharati, khuye: “Wonani, nyi na va nyiviligisa niloni gasi gu va linga; kholu ma mwalo mambe magirelo nyi yelago gu gira khu kotani ya nyamahegyane wa vathu vangu?”

⁸ Malimi yawe sighalala si songago, khu kanani gwawe gu duga basi magana nya guvivbe; muthu ni muthu a gu dzi gira muthu nya gurule ga muthu kwawe, aholu khu monyoni gwaye a gu mu riyela milaphwi.

⁹ Pfhumu Nungungulu a ngu ganela, khuye: “Ina kha nyi na va tsayisa khu kotani nya sihoso sesi, gani? Ina kha nyi na dzi phodzela ga litigo nya gufanane ni eli, gani?

Gililo khu kotani ya Siyoni

¹⁰ Nyi na lila khu kotani nya sigomo ni gu womba huwa ni gu embelela dzindzimo nya gililo khu kotani nya wuhaviselo wa giwulani; kholu malanga yaya ma dagarede khu luvbya, olu mwalo ni moyo a vbindrago gambe khumo; mule kha gu nga gu pwala gambe ligwaha nya mitshambi; ambari sinyoni sa damboni gumogo ni sirengo si phalalegide.

¹¹ Jerusalema nyi na gu gira gu khala siwungela nya siwindri, gu khala liphala nya migehe; ni madhoropa ya Judha ma na khala giwula nyamba khadwa khu muthu.

¹² Khu mani muthu nya gugengele a yelago gu siti silo sesi? Khu mani a layidwego khu Pfhumu Nungungulu, gasi a tshamusela khuye magana yaye? Khu ginani litigo li mbembidego ni gu dagarela kha nga giwula, avbo nya gu mwalo ni muthu a vbindrago khumo?

¹³ Pfhumu Nungungulu a di phindrula, khuye: Kholu va hambanidego ni nayo nyi va ningidego, va si yingisi lito langu ni gu wu landrisa.

¹⁴ Va di landra gulemela nya myonyo yawe, va landrisela sifananiso sa Bhahali, gukhedza khedzi va hevbudzidwego khidzo khu vavelegi vawe.”

¹⁵ Khu guralo, Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Wonani, nyi na hodzisa vathu vangu guhodza nya guvave, nyi bwelo khavbo nyi va sedza mati nya wuhungu nya gusonge.

¹⁶ Nyi na va phalalegisa ni mayigo, avo va si matigo, ambari ni vavelegi vawe va ngamba mati, nyi na ya va vbedza khu matshari kala havo bhi.”

¹⁷ Pfhumu Nungungulu nya Tshivba Yatshavbo a ngu ganela kharati, khuye: “Yingisani esi: Ranani vamalile, avo va kodzago gu saluka; vata ni vanyamayi nya gugengele va gitigo gililo.

¹⁸ Va na vbiredze, vata hi embelela ndzimo nya gililo, gasi gu thega marongo khu dzikhovbeni gwathu, ni dzitshi dzathu dzi tala khu mati.”

¹⁹ Kholu gu ngu pwala lito nya gililo li dugago khu Siyoni, khilo: “Yowe, yowe! Libango lathu hi mbembisidwe! Hi tade khu dzitshoni, kholu hi ngu duswa tigoni gwathu, va hafumude dzinyumba dzathu!”

²⁰ Enu vanyamayi yingisani magana ya Pfhumu Nungungulu, tulani dzindzeve dzanu dzi yingise magana ma dugago khu kanani gwaye; hevbudzani gililo sanana sanu nya sagadzyana; moyo ni moyo a na hevbudze mata waye ndzimo nya gililo.

²¹ Kholu lufu li litide li bela khu sihogo nya dzinyumba dzathu, li ya bela ni dzinyumbani nya wufumu; li sasede sanana dzindzilani ni madzaha malangani nya mitendrela nya madhoropa.

²² Va embele, khuwe: Pfhumu Nungungulu a ngu ganela kharati, khuye: “Sirumbi nya vathu si na mbambamela kha nga gitoromu gi thedwago marembweni, si mbambamede kha nga dzinyandra nya mavbila ya muvbweri, nyamba kodzwa gu roledwa khu muthu.”

Guti Nungungulu wudhumo nya muthu

²³ Pfhumu Nungungulu a ngu ganela kharati, khuye: “Gigengeli gi nga dzi zundzi khu gugengela gwaye, ni wule a gu ndrena a nga dzi zundzi khu wundrena waye, ambari oyu a fumidego a nga dzi zundzi khu gufuma gwaye;

²⁴ gasi uye a vbwetago gu dzi zundza, a na dzi zundze khesi: A ngu yela gu nyiti ni gukhuye eni kheni Pfhumu Nungungulu nyi girago wuhindzi, ni gu lamula khu gululama omu mafuni; kholu khiso si nyi nengedzisago; a ngu ganela Pfhumu Nungungulu.

²⁵ Pfhumu Nungungulu a ngu ganela, khuye, ma na vboha matshigu nyi na gu tsayisago satshavbo sithiva gumogo ni vale nyamba hana wugwera:

²⁶ Egipito, Judha, Edhomi ni sanana sa Amoni, ni va na Mowabhi, ni vatshavbo va vbahidego giwulani, avo va gayidwego ndzudzu dzibambe gwawe; kholu avo mafumbu nyamba hana wugwera, ni nyumba yatshavbo ya na Israyeli, myonyoni gwawe kha va hana wugwera.”