Jeremiya 7 - Bhibhiliya Nya Guage

Nyumba ya Nungungulu kha yi vhikeli va nya guvivbedwe khu monyo

¹ Lito la Pfhumu Nungungulu li dita ga Jeremiya khu magirelo yaya, khilo:

² Indra ema nyangwani nya Nyumba ya Pfhumu Nungungulu, u ya huwelela avbo magana yaya, khuwe: Upwani magana ya Pfhumu Nungungulu enu va na Judha ni enu mwatshavbo mu belago khu dzinyangwa dzedzi gasi guya khozela Pfhumu Nungungulu;

³ Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Lulamisani dzindzila dzanu, mu diga mavbanyelo yanu nyambasi yadi, gasi nyi kodze gu mi vega mu vbanye wulanga wowu.

⁴ Mu nga dzi kanganyisi khu gu ganelani, khenu: Eyi khu Nyumba ya Pfhumu Nungungulu, eyi khu Nyumba ya Pfhumu Nungungulu, eyi khu Nyumba ya Pfhumu Nungungulu. Khiyo eyi.

⁵ Aholu, phelani khu gu ndreya ndzilani gwanu ni mithumoni gwanu nya guvivbe, mwa gu lamulani khu gululama vbakari gwanu, ni ga vaakelane vanu;

⁶ mu si tshanisi muluveli, khulungu ni dzinoni, ambari gu vbaladza novba wu gu mwalo nandru ga wulanga wowu, ni gu khozela vambe vanungungulu ava va mi wuselago libango.

⁷ Khu guralo, nyi na mi girani mu khala ga wulanga wowu, tigoni momu nyi ningidego vababe vanu, gukhugela matshiguni ya gale kala gupindruga.

⁸ Aholu enu mwa gu dzi kanganyisani mwabune khu gu landrisa magana ma si phasigo gilo.

⁹ Mu nguba, mu songa vathu, mu gira wubhayi ni gu sambanya malipha, mu vbisela libani Bhahali, ni gu khozela vambe vanungungulu mu si vatigo.

¹⁰ Khu hwane nya ugo, mu nguta emani mbeli gwangu, nyumbani momu yi ranwago khu lina langu mu ganela, khenu: Hi vbanyisidwe! Khu hwane mu nga gu simama gu girani manyala yatshavbo yaya?

¹¹ Gasi nyumbani momu, li khozedwago umo lina langu, mahoni gwanu mwa gu li wona nari liphala nya gusihale umo dzimbafa, gani? Khalani na mu gu dziti nya gukhenu eni nyi si wone isoso, a ngu ganela Pfhumu Nungungulu.

¹² Gasi olu, nga hongolani ga wulanga wangu gu nga bani guri dhoropani ga Silo, avbo guhegulani gu nga bani gu khala avbo lina langu, mu ya wona iso nyi li giridego khu kotani nya sighoho sa vathu vangu, va na Israyeli.

¹³ Kha nga olu mu giridego silo satshavbo sesi, a ngu ganela Pfhumu Nungungulu, khuye: Dzinyondro nya dzingi na nyi gu mi kawukani, mu tshikani dzindzeve mu si nyi yingisi, nyi mi ranide mu si nyi hakhi,

¹⁴ nyumbani momu li khozedwago umo lina langu, umo mu vegidego umo gitumbo gyanu, wulanga nyi mi ningidego enu ni vababe vanu, nyi na wu gira kha nga idzo nyi giridego lidhoropa la Silo.

¹⁵ Nyi na mi dusani mbeli gwangu mu ya hwindzo ni eni, kha nga idzo nyi lundridego khidzo vandriyanu, livelego latshavbo la Efrayimi.

¹⁶ Gasi olu, uwe Jeremiya, u nga lombeleli khu vathu vava, u nga nyi reseli gambe gililo mwendro nombelo khu kotani nya vathu vava, ne u nga dzi garadzi, kholu eni kha nyi na gu yingisa.

¹⁷ Ina khu si woni iso va gimbilago va gira madhoropani ya na Judha ni dzindzilani ga Jerusalema, gani?

¹⁸ Sanana sa gu funya dzikhuni, vavelegi va vasa nilo, vanyamayi va suga wuguvbi gasi gu gira sibaba nya gulumbe nungungulu nya nyamayi a ranwago pwani Pfhumugadzi ya Ndzadzini. Gu diga nya isoso, va guya ningela miningelo nya wadwa ga vambe vanungungulu, va fela gu nyi gorosa va nyi wusela likhulo.

¹⁹ Ina va gu pwisa eni wuvi, gani? A ngu ganela Pfhumu Nungungulu, va gu dzi pwisa vabune wuvi, va dzi thela dzitshoni dzikhovbeni gwawe.

²⁰ Khu guralo, Pfhumu Nungungulu a ngu ganela kharati, khuye: “Wonani nya gukhenu giviti ni likhulo langu, si na vbalagela wulanga wowu, vbatshani nya vathu, vbatshani nya sirengo, vbatshani nya misimbo ya khabini ni mihandro ya mafuni; li na khondra nyamba tshimega gambe.”

²¹ Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Patani miningelo yanu nya guvbiswe ni dzimhamba dzanu mu hodza nyama yakone enu mwabune.

²² Kholu gukhugela litshigu nyi dusidego vababe vanu khu tigoni ga Egipito, gima kha nya va embela gilo ambari gu va leletela gilo khu mahungu nya miphaso nya guvbiswe ni dzimhamba.

²³ Aholu, nyi di va laya, kheni: Dembani ndzeve mu yingisa lito langu, eni nyi na khala Nungungulu wanu, enu mu khala vathu vangu; gimbilani khu ndzila nyi na gu mi nonedzago, gasi si mu dugela gwadi.

²⁴ Kholu kha va yingisa, ambari gu neredza dzindzeve, aholu va di gimbila khu dzindzila nya gutidwe khu myonyo yawe nya guvivbe; va bwelelela hwane wulanga nya guye mbeli.

²⁵ Gukhugela litshigu va nga dugago khilo vababe vanu khu tigoni ga Egipito, kala muhuno, khu litshigu ni litshigu nyi mi rumede sithumi sangu nya vaprofeti.

²⁶ Aholu kha mwa nga nyi yingisa, ambari gu nyi ninga githawo; mu di bangisa mihungo yanu, mu gira guvivba nya guvbindre ugo ga va vababe vanu.

²⁷ Aholu, uwe Jeremiya, va embele magana yaya, avo kha va na gu yingisa; u na va rana aholu kha va na gu hakha.

²⁸ U na va embela esi, khuwe: Litigo leli, kha li yingisi lito la Pfhumu Nungungulu wawe, ambari gu dzumela gu kawukwa; lisine li fuvide myonyoni gwawe.

Judha digidwe khu Nungungulu

²⁹ Vbalulani ndzudzu wa hungoni gwanu mu dzudzuga hwindzo; wombani huwa ni gu lila musigomoni nya gulaphe, kholu Pfhumu Nungungulu hambanide ni gitugulwana gegi gi wusidego likhulo laye, a gi diga.

³⁰ Kholu va na Judha va giride iso si vivbidego mbeli gwangu. A ngu ganela Pfhumu Nungungulu; va giride manyala nyumbani gu khozedwago umo lina langu va gu nyenyezisa.

³¹ Va vbahide malanga nya gulaphe nya gukhozele umo tigoni ga Tofeti, kovani ga mwamana wa Hinomi, gasi guya vbisela umo sanana sawe nya sikhwathana nesi nya sagadzyana khu nilo; silo nyi ngamba va ruma ambari gu si alakanya monyoni gwangu.

³² Khu guralo, Pfhumu Nungungulu a ngu ganela, khuye: Ma nguta matshigu va na gumba rana gambe Tofeti, ambari kova wa mwamana wa Hinomi, aholu wu na ranwa kova nya Gusasele; kholu sirumbi si na dzingwa Tofeti khu gu hamugega gambe wulanga nya gu dzinge avbo.

³³ Sirumbi sa vathu vava, si na rothedwa khu sinyoni sa damboni ni gu hodzwa khu sirengo sa mafuni; mwalo ni moyo a na si gusago.

³⁴ Nyi na degudza madhoropani ya Judha ni dzindzilani dza Jerusalema, malito nya gutsake ni malito nya mihagano, malito ya mudzegi ni uye a dzegwago; kholu litigo li na bani liri giwula.