Jeremiya 50 - Bhibhiliya Nya Guage

Gitiviso mayelano khu Bhabhiloni

¹ Aya khu magana Pfhumu Nungungulu a ma ganedego khu ga muprofeti Jeremiya mayelano khu Bhabhiloni ni litigo la Vakalidhiya a nga khuye:

² Huwelelani vbakari nya mayigo, mu ma pwadzela, ghwimbani ngavbya mu va embela, mu nga va siheli gilo, va embeleni, khenu: Bhabhiloni wandridwe; Bheli thedwe dzitshoni, Moridhaki nuye pandreledwe, va poyila sifananiso saye, va khungumulede vanungungulu vaye nya malipha.

³ Kholu, litigo li dugelago Wuronga, li nguta guta sasela litigo lawe, li na li vbindrugedza li khala marumbi; vathu ni sirengo sawe, vatshavbo va na tutuma va thava.

⁴ Khu matshigu yoyo ni gikhati gyogyo, a ngu ganela Pfhumu Nungungulu, va na Israyeli ni va na Judha va na tombana va wuya gumogo, na va gu lila va vbweta Pfhumu Nungungulu wawe.

⁵ Va na wudzisa ndzila yi hongolago Siyoni, siwombo sawe si na thonona iyo; va na dzi tshanganisa ga Pfhumu Nungungulu ga gidzumeledzwano nya gupindruge, gi na gumba divadwa gambe.

⁶ Vathu vangu va gu fanana ni dzinvuta dzi dzimedego; va ndreyisidwe khu vahavisi vawe, va dzimedzidwe sigomoni ni sigomwanani, va gu legalega basi, kha va nga gu guti ni phandroni gwawe.

⁷ Vatshavbo avo va va manago va gu va sasela; valala vawe na va gukhavo: Ethu hi mwalo nandru; kholu avo va ghohede Pfhumu Nungungulu gumogo ni wulanga nya wululamo, a gu Pfhumu Nungungulu, gitumbo gya vababe vawe.

⁸ Enu thavani vbakari ga Bhabhiloni, dugani khu tigoni ga Vakalidhiya, mu girani kha nga vanyamabhongwe va thangago mbeli nya tshambi.

⁹ Kholu wonani nya gukhenu eni nyi na resela Bhabhiloni mitsawa ni sidzemo sa mayigoni nya makhongolo si tago khu Wuronga, va nata wumba gikwata va dwana naye kala va mu pala; matshari yawe, ma na fanana ni ya ndrena yi gengedego ni limwedo kha li na wuya mahala.

¹⁰ Litigo la Kalidhiya li na phangwa; vaphangi vakone va na mana nya singi, a ngu ganela Pfhumu Nungungulu.

¹¹ Ambari mwa gu tsakani, mu ghiya enu mu phangago thomba yangu mu ndragandraga kha nga gimombyana gi tsakelago mwasi nya gunyuge, mu emba kha nga dzikavalu nya tshivba.

¹² Mayi wanu a na thedwa ngudzu dzitshoni, uye a mu velegidego a na tala khu dzitshoni, wonani nya gukhenu litigo lanu li na bani liri vbavbatshi nya mayigo yatshavbo, kholu li na vbindrugedza li khala giwula nya mafu nya gihala.

¹³ Khu kotani nya likhulo la Pfhumu Nungungulu, mwalo na moyo a na gu khalago umo, aholu li na bani liri marumbi nya guvbelele; ni vatshavbo va na vbindrago khu Bhabhiloni, va na samala ni gu womba ndrodzi, khu gu wona dzimhango dzatshavbo dzi na gu mu dugelelago.

¹⁴ Dzi dongiseleni enu mwatshavbo mu ghwimbago wulaho; randrelani lidhoropa la Bhabhiloni mu dwane nalo, va hekheni khu sighalala mu nga va tsetsi, kholu va ghohede Pfhumu Nungungulu.

¹⁵ Wombani pundru nya nyimbi, mu randreleni khu maphuvbo yatshavbo mu dwane naye! Uye a ngu thesa matshari a dzi ningela, makhokhola yawe ma ngu thega, ni mabhiyo yaye ma ngu khungumuga! Kholu oyu khu tsayiso wa Pfhumu Nungungulu; dzi phodzeleni kha nga idzo va mi giredego.

¹⁶ Fuvisani tigoni ga Bhabhiloni wule a yalago dzimbewu, ni wule a dzegago givbwero gikhatini nya guvbwere dzimbewu; valuveli vatshavbo va na khala hwanga, khu kotani nya nyimbi nya wusaseli, muthu ni muthu a na thavela ga va na gyawe moyo ni moyo a na thavela tigoni gwawe.

¹⁷ Israyeli a gu fanana ni nvuta yi dzimedego, yi sotwago khu dzinghala; nya guphele gu mu songa khu mufumeli wa Asiriya; khu guhegisa, Nabhukodhonosori, mufumeli wa Bhabhiloni, a di mu fanyeledzela marambo.

¹⁸ Khu guralo, a ngu ganela kharati Pfhumu Nungungulu nya Tshivba Yatshavbo, Nungungulu wa Israyeli, khuye: Wonani, nyi na tsayisa mufumeli wa Bhabhiloni ni litigo laye, kha nga idzo nyi tsayisidego khidzo mufumeli wa Asiriya.

¹⁹ Israyeli nyi na mu wuyisa nyaluphye tigoni gwaye. Va nata hava gigomoni gya Karimelo ni gigomoni gya Bhasani, va na khura sigomoni sa Efrayimi ni Gileyadhi.

²⁰ Khu matshigu yoyo ni gikhati gyogyo, a ngu ganela Pfhumu Nungungulu, va na vbweta wuvivbi wa Israyeli, va si wu mani, va vbweta sighoho sa Judha, va si si mani, kholu nyi na tsetselela vale nyi na gu va diga va vbanya.

Guthega ga Bhabhiloni ni guwusedzwa gwa Jerusalema

²¹ Duga ni gikwata nya nyimbi u ya dwanisa litigo la Meratayimi, gumogo ni vavbanyi va Pekodhi; va lundreni mu va sasela mu va mbembisela muphelo, a ngu ganela Pfhumu Nungungulu. Thuma satshavbo nyi gu rumidego.

²² Tigoni gwatshavbo gu pwala ligwaha nya nyimbi, gu ghohekela silo nya gutale.

²³ Nga wonani idzo gi fanyeledzedwego khidzo gikhokhotho gi nga bani gi pandrelela mayigo yatshavbo! Idzo Bhabhiloni a vbindrugedzidego khidzo a khala gilo nya gusamadzise vbakari nya mayigo!

²⁴ Nyi gu gogide khu ligoga, nyi gu mola nyamba dziti, uwe Bhabhiloni u manidwe, gambe u modwa kholu u di dwana ni Pfhumu Nungungulu.

²⁵ Pfhumu Nungungulu a di tula malanga a vegago matshari yaye, a ma dusa vbavbandze khu likhulo laye; kholu Mune Pfhumu Nungungulu nya Tshivba Yatshavbo a na ni thumo a vbwetago gu wu gira tigoni ga Vakalidhiya.

²⁶ Mu rangeni khu maphuvbo yatshavbo nya mahegiso nya litigo, mu tula sisangala saye, mu dusela silo saye satshavbo si khala dzinyandra, mu pfhungumula litigo laye latshavbo nyamba mu tshiyela ni moyo.

²⁷ Songani khu matshari dzimombe dzaye dzatshavbo ni dzindrena dzaye; vatshavbo va na yiswe gusongwatunu; libango avbo gwawe! Kholu li vbohide litshigu ni gikhati nya tsayiso wawe.

²⁸ Gu pwala malito nya avo va nga thava ni gu vbuluga khu tigoni ga Bhabhiloni gasi gu ya huwelela gigomoni gya Siyoni guphodza ga Pfhumu Nungungulu wathu, a dzi phodzela ga avo va vbisidego nyumba yaye.

Gighoho nya matshandza

²⁹ Rambani vatshavbo va kodzago gu khwandra siholoma; va na hekhe litigo la Bhabhiloni, va li randrela gu si dugi ni wa gu duga. Va bweledzeleni gukhedza khu mithumo yawe, satshavbo a mi giredego mu gireleni nuye kharalo; kholu a dzi khusedzide a wugela Pfhumu Nungungulu, Gihathwa gya Israyeli.

³⁰ Khu guralo, madzaha yawe ma na mbambamela vbakari nya dzindzila dzawe, ni masotshwa yawe ma na mbembiswa litshigu lolo, a ngu ganela Pfhumu Nungungulu.

³¹ Wona nya gukhuwe eni nyi dzi emisede gu dwana nago, uwe nyamatshandza wewe, a ngu ganela Pfhumu Nungungulu nya Tshivba Yatshavbo, kholu, li vbohide litshigu ni gikhati nya tsayiso wago:

³² Matshandza yago ma na gu tshunganisa u thega nyamba mana wago nya gu gu wuse. “Nyi na khondrisa nilo madhoropani gwago, si dagarela satshavbo si guromo umo.”

Pfhumu Nungungulu mudzegisi wa Israyeli

³³ A ngu ganela kharati Pfhumu Nungungulu nya Tshivba Yatshavbo, khuye: “Va na Israyeli gumogo ni va na Judha vomo gutshanisekani; vatshavbo avo va nga va vbagelago va va yisa wugumbini, kha va dzumeli gu va tshula.

³⁴ Aholu uye a gu Mutshudzisi wawe a na ni tshivba, lina laye khu Pfhumu Nungungulu nya Tshivba Yatshavbo. A na ema navo a va vhikela gasi litigo lawe li mana gurula, a ndrendremedzisa vatshavbo vavbanyi va Bhabhiloni.

³⁵ Vakalidhiya va na sasedwa khu matshari, a ngu ganela Pfhumu Nungungulu, ni vatshavbo vavbanyi va Bhabhiloni, vathangeli ni vagengeli vawe.

³⁶ Va na songwa khu matshari vatshavbo vaprofeti vawe nya malipha, gasi va hambanega mapimo, ma sasela gambe ni dzindrena dzawe gasi dzi vbele tshivba.

³⁷ Matshari ma na sasela dzikavalu, gumogo ni dzikareta dzawe ni ga valuveli vatshavbo va guromo vbakari gwawe, gasi va khala gukhwatshi vanyamayi! Matshari ma na sasela gambe dzithomba dzawe, dzi phangwa dzatshavbo.

³⁸ Gu na manega gambe lihani, li vbwisa mitsongo yawe yi khala gihala nyambana mati! Kholu tigoni gwawe gu tade khu vanungungulu nya sifananiso si hambanisago mapimo nya vathu vawe.

³⁹ Khu guralo, Bhabhiloni gu na bani guri wulanga nya gukhale sirengo sa giwulani ni vanyadugwi, ni dzimbowa dzi na khala umo, kha gu na khadwa gambe khu muthu, gu na khala giwula kala gupindruga.

⁴⁰ Kha nga avbo Nungungulu a vbindrugedzidego khidzo Sodhoma ni Ghomora ni madhoropa ya vbafuvbyana mule, a ngu ganela Pfhumu Nungungulu, kharato nugo gu mwalo muthu a na khalago mule.

⁴¹ Wonani, va nguta vathu va dugelago khu phuvbo ga Wuronga; litigo nya likhongolo, ni vafumeli nya vangi nya tshivba, va na dugelela khu mahegiso nya litigo;

⁴² na va dongide wulaho ni sighalala; na vari ni gigaha nyamba tsetsa muthu, ligwaha lawe li na fanana ni gudzuma nya linene, va na khilela dzikavalu va fola khu dhiliza gasi guta dwana nago, uwe lidhoropa la Bhabhiloni.

⁴³ Avbo mufumeli wa Bhabhiloni, a nga pwago ndruma yawe, a di pilega hwambo a vbela tshivba, a tedwa khu rerema, a vbisega kha nga nyamayi a lumwago.

⁴⁴ Wonani nya gukhenu a nata kha nga nghala yi dugelago sipoponi sa Joridhani, yi bela wuhaviseloni nya mwasi nya gunyuge. Khidzo kharato, nyi na va phalalegisa tigoni momu, nyi vega uye nyi mu golago; kholu, gasi khu mani a fananago ni Eni? Gambe khu mani a yelago gu nyi wudzisa iso nyi girago? Khu mani a gu muhavisi a dzi kodzago gu dwana ni Eni?

⁴⁵ Khu guralo, yingisani iso Pfhumu Nungungulu a hungidego, ni makungo a fungidego khu Bhabhiloni, gumogo ni iso a vbwetago gu gira mayelano khu litigo la Vakalidhiya; khu lisine ni mitshambi yawe nya yidugwane yi na kukulutwa, ni wuhaviseloni gwawe gu na khala giwula.

⁴⁶ Mafu ma na ndrendremela khu ligwaha nya gu wandrwe Bhabhiloni, dzihuwa dzawe dzi na pwala khala ga mambe mayigo.”