Jeremiya 49 - Bhibhiliya Nya Guage

Gitiviso mayelano khu va na Amoni

¹ Mayelano khu va na Amoni. Pfhumu Nungungulu a ngu ganela kharati, khuye: Ina kamwe uwe Israyeli, u mwalo sanana, gani? U mwalo avo va na gu tshalago va hodza thomba yago, gani? Khu ginani Malikani a fumedego Gadhi, ni gu vathu vaye va khala madhoropani gwago?

² Khu guralo, Pfhumu Nungungulu a ngu ganela khuye, ma nguta matshigu, nyi na womba huwa nya nyimbi, nyi dwana ni lidhoropa la Rabha, tsindza wa va na Amoni; ilo li na vbindrugedza li khala matala nya marumbi, mitalala yawe yi na dagarela khu nilo. Khavbo avbo, Israyeli a na hodza thomba ya vale va hodzidego thomba yaye, a ngu ganela Pfhumu Nungungulu.

³ Womba huwa uwe Hesibhoni, Wombani huwa enu vanyamahegyane va Rabha! Ambalani silendra mu lila! Dzundrulugelani eno ni eno, kholu Malikani a na vbagedwa a yiswa wugumbini gumogo ni vaphasi vaye nya mhamba ni dzindruna dzaye.

⁴ Nyamahegyane nyamba yingisa, khu ginani u dzi zundza khu mikova yago nya gunone, u tumba dzithomba dzago u ganela, khuwe: Khu mani a na gu nyi dhumelago?

⁵ Wona nya gukhuwe nyi na gu resela libango, li na gutago khu ga vaakelane vago li ta mu phalalegisa, a ngu ganela Mune Pfhumu Nungungulu nya Tshivba Yatshavbo, muthu ni muthu a na dzega ndzila yaye; mwalo a na gu tombanisa avo va thavago.

⁶ Aholu, khu hwane nya esi, nyi na wuyisa sanana sa Amoni, si yisidwego wugumbitunu, a ngu ganela Pfhumu Nungungulu.

Gitiviso mayelano ni va na Edhomi

⁷ Khu kotani ga Edhomi. Pfhumu Nungungulu nya Tshivba Yatshavbo, a ngu ganela kharati, khuye: “Ina kamwe, gu mwalo gambe guti tigoni ga Temani, gani? Ina va nya mapimo kha va nga gu ninga gambe wusingalagadzi, gani? Guti gwawe gu fuvide, gani?

⁸ Enu mu vbanyago tigoni ga Dhedhani, thavani mu wuya mu ta sihala mavbalani nya guete, kholu nyi ngu hadza gu mbembisa Esawu, gikhati gyaye nya gu mu tsayise gi vbohide.

⁹ Ina wa gu vbohedwa khu vavbweri nya dziuvha, kha va na nga gu tshiyela dziuvha dzi dugwana, gani? Ahati wa gu vbohedwa khu dzimbafa vbawutshigutunu, kha dzi nata dzega basi iso va eneledwago khiso, gani?

¹⁰ Kholu nyi tshulede dzitshalu Esawu, nyi tugula umo a sihalago umo, kha na nga nyi sihalela gambe nyi na sasela livelego laye, vandriyaye gumogo ni vaakelane vaye, uye gima kha na nga pwala gambe.

¹¹ Diga sigulungu sago; kholu eni nyi na si sayisa si vbanya, ni dzinoni dzago nidzo dzi na tumbe eni.”

¹² Kholu Pfhumu Nungungulu a ngu ganela kharati, khuye: “Vale va nga bani va si yeli gu sela gikombe gegi, gu vbwetega va gi sela, ahati uwe u na vbuluga u si gi seli, gani? Ahihi! Uwe nuwe kamwe u yede gu gi sela.”

¹³ Kholu, eni mune kamwe nyi sambanyide khu lina langu, a ngu ganela Pfhumu Nungungulu, Lidhoropa la Bhozira, li na vbindrugedza li khala gilo nya guthise, li na khala marumbi ni gihegiso, vbakari nya vathu vatshavbo, ni madhoropa yaye yatshavbo ma na khala nari marumbi kala gupindruga.

Sighoho ni tsayiso wa Edhomi

¹⁴ Nyi pwide mahungu na ma guta khu ga Pfhumu Nungungulu; rumede mwango ga mayigo a ma embela, khuye: “Tshanganani, mu mu wugela, hongoleni hi ya mu dwanisa!”

¹⁵ Kholu wona nya gukhuwe nyi gu giride nuri gyanana vbakari nya mayigo, u hembuludwa vbakari nya vathu vatshavbo.

¹⁶ Matshandza ni gu dzi khusedza nya monyo wago si gu kanganyiside, uwe u vbanyago dziphagoni nya siwindri, u khalago vbatshani nya sigomo, ambari wa gu vbaha gihaga gyago vbatshani ngudzu kha nga lighama, Eni nyi na gu reledza vbavbatshi; khu Pfhumu Nungungulu a ganelago.

¹⁷ Kharati, Edhomi a na khala gilo nya gusamadzise; vatshavbo va na vbindrago khu mule va na liwuga bwelo khavbo va womba ndrodzi khu kotani nya dzimbanga dzaye dzatshavbo.

¹⁸ Gu na girega kha nga gu pfhungumudwa ga Sodhoma ni Ghomora, a ngu ganela Pfhumu Nungungulu; madhoropa ya vaakelane, mwalo ni moyo a na gu ya vbaha mule ambari ni uye nya guye luvela umo.

¹⁹ Wonani nya gukhenu nyi nata kha nga nghala, yi dugago khu sipoponi sa Joridhani yi relela panini nya mahawo nya gunyuge; kholu, khu githugedza nyi na mu phalalegisa tigoni gwaye; khu wevbini uye nyi mu hathidego, nyi mu emisidego ga isoso? Khu mani a fananago ni Eni? Khu mani a na gu nyi wudzisago? Khu mani muhavisi a na tiyelago gu dwana ni Eni?

²⁰ Khu guralo, upwani makungo ya Pfhumu Nungungulu a ma hungidego khu kotani ya Edhomi, ni mipimiso a gu nayo khu vathu va Temani; khu lisine avo nya vadugwane nya tshambi va na kukulutwa, ni wuhaviseloni gu na ghohetedwa nyamba manega mwasi khu kotani gwawe.

²¹ Mafu ma di tsekatseka khu gudzuma nya guthege gwaye; ni lito nya huwa yawe li di pwala kala Yiphwa nya Gufuvile.

²² Wonani nala a tago khu gu vbuvba kha nga lighama, ata mbaka vbatshani ga Bhozira; khu litshigu lolo, myonyo nya dzindrena dza Edhomi yi na fanana ni monyo wa nyamayi a lumwago.

Gitiviso mayelano khu Dhamasiko

²³ Mayelano khu Dhamasiko. Hamati ni Aripadhi va thedwe dzitshoni, kholu va pwide magana nya guvivbe, myonyo yawe yi tade khu rerema, ya gu vila kha nga mavimbi ya linene, nyamba rudziswa khu muthu.

²⁴ Dhamasiko pilegide hwambo, a khuga a tutuma na gu ndrendremela, a di modwa khu hwanga ni guvbisega monyo kha nga nyamayi a lumwago.

²⁵ Khu ginani va li giridego marumbi lidhoropa leli nya gumbure ni ndruma nya gutsakise monyo wangu?

²⁶ Khu guralo, madzaha yaye, ma na mbambamela dzindzilani; ni masotshwa yatshavbo ma na mbembiswa nayo ga litshigu lolo, a ngu ganela Pfhumu Nungungulu nya Tshivba Yatshavbo.

²⁷ Nyi na khondrisa nilo, nyi vbisedzela libhiyo la Dhamasiko, uwo wu na dagaredzisago ni dzinyumba nya wufumu dza Bheni-Hadhadhi.

Gitiviso mayelano khu Arabhiya

²⁸ Mayelano khu Kedhari gumogo ni mifumo ya Hazori, eyi Nabhukodhonosori, mufumeli wa Bhabhiloni a mi sasedego, Pfhumu Nungungulu a ngu ganela kharati, khuye: “Khugani mu eme, mu ya dwana ni va na Kedhari, mu mbembisa ni vathu va Khugadambo.

²⁹ Phangani mitshatsha yawe ni mitshambi yawe, ni myendra nya makhuvi yawe gumogo ni sombo sawe satshavbo, mu phanga gambe ni dzingameriya dzawe; va theleni hwanga khu maphuvbo yatshavbo!

³⁰ Thavani khu guvbiredza mu ya sihala mavbalani nya guete ya hwindzo, enu vavbanyi va Hazori, a ngu ganela Pfhumu Nungungulu, kholu Nabhukodhonosori, mufumeli wa Bhabhiloni, hungide makungo khu kotani yanu, gambe a dzi emisede gu mi sasela.”

³¹ Khugani mu eme, indrani mu ya dwana ni litigo li guromo gurulani, li vbanyago khu gu dzi tumba a ngu ganela Pfhumu Nungungulu; li gu mwalo malimba, ambari sikwinyaro, li khadego tendrelani nyamba tshirwa khu gilo.

³² Phangani dzingameriya dzawe ni mitshambi yawe nya gutale; vathu vava nya guvidwe lihandla nyi na va phalalegisa malangani gwatshavbo, va na mana gutshaniseka, nyi na va resela dzimhango khu maphuvbo yatshavbo, a ngu ganela Pfhumu Nungungulu.

³³ Lidhoropa la Hazori li na vbindrugedza li khala liphala nya migehe, gikhati gyatshavbo li na bani liri marumbi; mwalo a na vbahago umo, ambari gu khadwa khu vathu.

Gitiviso mayelano khu va na Elamo

³⁴ Pfhumu Nungungulu a di embela magana yaya ga muprofeti Jeremiya, mayelano khu Elamo, guphelani nya gufume ga Zedhekiya, mufumeli wa Judha, khuye:

³⁵ Pfhumu Nungungulu nya Tshivba Yatshavbo, a ngu ganela kharati, khuye: Wona, nyi na fanyeledzela wulaho wa Elamo, uwo a tiyago khuwo nyimbitunu.

³⁶ Khu dzikhona dza dzina dza damboni nyi na rumela Elamo dziphuvbo dzina, nyi na va phalalegisa ga maphuvbo yatshavbo yoyo; gu mwalo litigo gu na gumba bela valuveli.

³⁷ Va na Elamo nyi na va gira va ndrendremela mbeli ga valala vawe ni mbeli ga vale va vbwetago gu va songa, nyi na gugumugisa likhulo langu, nyi na va resela dzimhango a ngu ganela Pfhumu Nungungulu. Va na Elamo nyi na va gira va tedwa khu mhango; nyi na gugumugisa likhulo langu, va na songwa khu matshari, kala va fuviswa.

³⁸ Nyi na emisa gikhalo gyangu nya wufumu tigoni gwa Elamo; nyi rumela gu songwa mufumeli gumogo ni vathangeli waye, a ngu ganela Pfhumu Nungungulu.

³⁹ “Khu matshigu nya guhegise, nyi na wuyisa vale va vbagedwego va Elamo, a ngu ganela Pfhumu Nungungulu.”