Jeremiya 47 - Bhibhiliya Nya GuageGitiviso ga Vafilisitiya ( Isaya 14:28-32 ; Ezekiyeli 25:15-17 ; Amosi 1:6-8 ) 1 Aya khu magana Pfhumu Nungungulu a ma tivisidego ga muprofeti Jeremiya, khu kotani ya Vafilisitiya, Faro nasi gu saseli lidhoropa la Gaza. 2 Pfhumu Nungungulu a ngu ganela kharati, khuye: “Wonani nya gukhenu mati ma khugago khu Wuronga, ma gu goga nga tsongo wu tutumago, wu langaladza litigo latshavbo ni satshavbo si guromo umo, ma na taledwa madhoropa ni vavbanyi vaye. Vathu va na womba dzihuwa, ni vatshavbo vavbanyi va mafuni va na lila, 3 khu kotani nya sikingo nya samba nya dzikavalu, ni ligwaha nya gututume nya dzikareta ni gudzuma nya dzirodha dzaye. Vavelegi kha va na wuya guta dzega sanana sawe, kholu mawogo yawe ma na rereka; 4 kholu litshigu nya gumbembiswe Vafilisitiya vatshavbo li vbohide, li segela ni ndzila madhoropa ya Tiro ni Sidhoni, ni mayigo yatshavbo ma tshadego ma mu phasedzelago. Pfhumu Nungungulu a na mbembisa Vafilisitiya va tshadego gidwani gya Kafitori. 5 Vavbanyi va dhoropani ga Gaza va gayide ndzudzu, Asikalomi mwalo lito, mbembide gumogo ni mitshaledwa ya kovani gwaye. Kala lini nu ngu dzi hendrelela givili gyago? 6 Yowe! U na degula lini Uwe Litshari la Pfhumu Nungungulu? Bwelela u ya dzi tshomega gikhwesoni gwago, u hegisa gu songa. 7 U na degula kharini, olu Pfhumu Nungungulu a gu leletedego, gu ya sasela Asikalomi gumogo ni vathu va vbanyago bambe nya linene?” |
A Bíblia em Gitonga © Bible Society in Mozambique, 2014.
Bible Society of Mozambique