Jeremiya 41 - Bhibhiliya Nya Guage

Gu songwa ga Gedhaliya

¹ Khu ngima nya livbandre na wuvili, Ismayeli, mwamana wa Netaniya, mwamana wa Elisama, wa nyumbani nya wufumu, a nga bani ari moyo nya ndruna ya mufumeli, na gu bangaladzwa khu likhumi vama, va di hongola Misipa va ya wonana ni Gedhaliya, mwamana wa Ayikamo, va diya hodza naye gumogo.

² Ismayeli, mwamana wa Netaniya, gumogo ni likhumi vama va nga bani va mu bangaladza, va di khuga va songa Gedhaliya, mwamana wa Ayikamo, mwamana wa Safani, khu litshari, va songa wule a nga vegwago khu mufumeli wa Bhabhiloni gu khala mwamangulu nya litigo.

³ Ismayeli a di songa gambe Vajudha vatshavbo va nga bani na vari ni Gedhaliya Dhoropani ga Misipa, gumogo gambe ni masotshwa nya Vakalidhiya, va nga bani na vari iyoyo.

⁴ Khu litshigu li landrelago, hwane nya gu bani na songidwe Gedhaliya, na si si gu tidwi khu muthu,

⁵ gu dzude khu madhoropani ya Sikemi, Silo ni Samariya, livbandre na mararu magumi vama na va vidwe siledzo, na va pferulede dzingandzu dzawe ni gu dzi hendrelela sivili sawe, va resa Nyumbani ga Pfhumu Nungungulu, miningelo nya dzimbewu ni libani.

⁶ Ismayeli, mwamana wa Netaniya, a di khuga khu Misipa a va khinga na gu lila, avbo a nga tshangana navo a di va embela, khuye: “Belani khu gurula ndrangani ga Gedhaliya, mwamana wa Ayikamo.”

⁷ Avbo va nga belago vbakari nya lidhoropa, Ismayeli, mwamana wa Netaniya, gumogo ni vama a nga bani nari navo, va di va songa va va rinya namboni.

⁸ Vbakari nya vama vale, gu manegide likhumi nya avo va nga lomba ga Ismayeli, khavo: “U nga hi songi, kholu, hi na ni tirigu, mala, mafura ni wulombe, hi sihidego khabini.” Khu guralo, kha va songwa gilo, va di digwa gumogo ni vakwawe.

⁹ Nambo yoyu Ismayeli a negidego umo sirumbi nya vathu vava a va songidego, khu kotani ya Gedhaliya, khuwo wu nga bani na wu kembidwe khu mufumeli Asa, gasi gu dzi vhikela ga Bhahasa, mufumeli wa Israyeli; khuwo wa wumowo Ismayeli, mwamana wa Netaniya a nga wu tadzago khu sirumbi.

¹⁰ Ismayeli a di vbagela yatshavbo mitshaledwa yi nga bani yi gu tshade Misipa, vanyamahegyane va mufumeli, ni vathu vatshavbo va nga bani va tshade Misipa, avo Nebhuzaradhani, ndruna nya dzighadhi, a nga bani a va vegide mandzani ga Gedhaliya, mwamana wa Ayikamo, a va vbagela aya navo tigoni ga na Amoni.

¹¹ Avbo Jowanani, wa Kareya, gumogo ni dzindruna dzaye nya nyimbi, va ngapwago wusaseli watshavbo wowu wu nga girwago khu Ismayeli, mwamana wa Netaniya,

¹² va di tombana vatshavbo va dzega masotshwa yawe va hongola guya dwana ni Ismayeli, mwamana wa Netaniya; vaya mu mana vbafuvbi ni litsiva nya likhongolo la Gibheyoni.

¹³ Vathu vatshavbo va nga bani va modwe khu Ismayeli, avbo va nga wonago Jowanani, mwamana wa Kareya gumogo ni vathangeli nya nyimbi a nga bani nari navo, va di tala khu gutsaka.

¹⁴ Ni vathu vatshavbo va nga modwago khu Ismayeli Misipa, va di mu thava va ya dzi tshanganisa ga Jowanani, mwamana wa Kareya.

¹⁵ Aholu Ismayeli, mwamana wa Netaniya, a dzi vbulugiside mandzani ga Jowanani, a tutuma nari ni livbandre na vararu vama a thavela tigoni ga na Amoni.

¹⁶ Khavbo avbo, Jowanani, mwamana wa Kareya, gumogo ni dzindruna dzaye dzatshavbo nya nyimbi a nga bani nari nadzo, ni vathu vatshavbo a nga va tshudzisago mandzani ga Ismayeli, mwamana Netaniya, gukhugela dhoropani ga Misipa, hwane nya gu bani na songide Gedhaliya, mwamana wa Ayikamo, va nga bani vari vama nya dzindrena nya nyimbi, vanyamayi ni sanana, ni mithenwa va nga bani va bweledzidwe khu Gibheyoni.

¹⁷ Va di thava va ya khala Giruti-Kimani, gu khalago vbafuvbi ni Bhetlehema, gasi va vbindra vaya Egipito,

¹⁸ khu kotani nya guthave Vakalidhiya, kholu Ismayeli, mwamana wa Netaniya a nga songago Gedhaliya, mwamana wa Ayikamo, uye a nga ningwago ndronga nya wufumu khu mufumeli wa Bhabhiloni, gu khala mwamangulu nya litigo la Judha.