Jeremiya 40 - Bhibhiliya Nya Guage

Jeremiya a ngu khala ndrangani ga Gedhaliya

¹ Pfhumu Nungungulu a di ganela ni Jeremiya hwane nya gu Nebhuzaradhani, ndruna nya dzighadhi dza tigoni ga Rama na mu tshude khu pasoni, umo a mu manidego na hungidwe khu makhetshe vbakari nya vatshavbo va nga bani va vbagedwe khu Jerusalema ni Judha va yiswa Bhabhiloni.

² Ndruna nya dzighadhi yi di rana Jeremiya, yi mu embela, khiyo: “Pfhumu Nungungulu wago, thangide a ganela khu libango leli li na gu dugelelago wulanga wowu.

³ Uye Pfhumu Nungungulu a di gu resa, a tadzisa magana a ganedego. Si mu dugelede satshavbo sesi, kholu enu mu nga ghohela Pfhumu Nungungulu, mu si yingisi magana yaye.

⁴ Gasi olu eni, nya gu vbweta gu gu tshula makhetshe u hungidwego mawogoni gwago, wa gu dzina hongole hatshavbo Bhabhiloni, eni nyi na khala musayisi wago; aholu wa gumba dzina, tshala. Wona! Litigo latshavbo lomo mandzani gwago, u hongola ni evbini u gunago, u gira iso u si wonago nari sadi mbeli gwago.”

⁵ Jeremiya na si gu ningi phindrulo ndruna nya dzighadhi yi di engedza, khiyo: “Bwelela u ya khala ni Gedhaliya, mwamana wa Ayikamo, mwamana wa Safani, uye a vegidwego gu khala mwamangulu nya madhoropa ya Judha, khu mufumeli wa Bhabhiloni; u na khala gumogo naye vbakari nya vathu, avbo u na gunago guhongola indra.” A di mu dongisa dzimbuva ni simbe silo a mu diga a hongola.

⁶ Jeremiya a di khuga a hongola Misipa, ndrangani ga Gedhaliya, mwamana wa Ayikamo, aya khala naye gumogo ni va na gyawe va nga bani va tshade tigoni gwawe.

Gedhaliya a ngu khala mwamangulu wa Judha

⁷ Vathangeli vatshavbo nya nyimbi va nga bani va sihade mikovani gumogo ni vathu vawe, va dipwa gupwani mufumeli wa Bhabhiloni vegide Gedhaliya, mwamana wa Ayikamo gu khala mwamangulu nya litigo la Judha, a fuma vama ni vanyamayi, sanana ni vathu nya sisiwana sa tigoni va gu mwalo gilo, va nga tshalago ga avo va nga vbagedwa guya wugumbini ga Bhabhiloni.

⁸ Va dita wonana ni Gedhaliya dhoropani ga Misipa vathangeli vava: Ismayeli, mwamana wa Netaniya, Jowanani ni Jonatane, sanana sa Kareya, Seraya, mwamana wa Tanumeti, ni sanana sa Efayi, wa Netofati, ni Jazaniya, mwamana wa moyo nya Muhaka, gumogo ni vathu vaye.

⁹ Gedhaliya mwamana wa Ayikamo, mwamana wa Safani, a di sambanya mbeli gwawe gumogo ni ga vathu vawe, a ganela, khuye: “Mu nga thavi gu thumela Vakalidhiya, khalani tigoni momu mu dzi vega vbavbatshi ga mufumeli wa Bhabhiloni, mu na khadzisega gwadi.

¹⁰ Aholu, eni nyi na khala avba Misipa, gasi gu landrisa milayo nyi na gu rumedwago khu Vakalidhiya. Enu mu na henga vbinyu ni mihandro nya guvidzwe ni mafura mu ya si vegani sisangalani nya madhoropa mu khalago umo.”

¹¹ Khu guralo, Vajudha vatshavbo va nga bani vari tigoni ga Mowabhi, vbakari nya sanana sa Amoni ni Edhomi ni mambe mayigwana, na va pwide gupwani mufumeli wa Bhabhiloni tshide tigoni ga Judha gipandre nya vathu va na Israyeli, ni gu vega Gedhaliya, mwamana wa Ayikamo wa Safani, gu khala mwamangulu wa Judha;

¹² Vatshavbo va di khuga khu malangani va nga bani va phalalegede umo va wuya tigoni gwa Judha, vata dzi tshanganisa ni Gedhaliya dhoropani ga Misipa. Khavbo avbo, va di hengisa vbinyu ni mihandro nya yingi.

¹³ Jowanani, mwamana wa Kareya, ni vatshavbo va gimbidzisi nya nyimbi va nga bani na va sihade magabini, va di hongola ga Gedhaliya, dhoropani ga Misipa,

¹⁴ va ya mu embela, khavo: “Ina u ngu dziti nya gukhuwe Bhahalisi, mufumeli wa va na Amoni, rumede Ismayeli, mwamana wa Netaniya, gasi guta gu songa, gani?” Aholu Gedhaliya, mwamana wa Ayikamo, kha nga khodwa khiso.

¹⁵ Khu guralo, Jowanani, mwamana wa Kareya, a di dzega Gedhaliya dhoropani ga Misipa, aya ganela naye khu phuvbo, khuye: “Nyi dige nyiya songa Ismayeli, mwamana wa Netaniya, gasi mahungu yaya ma nga tidwi khu muthu, gasi uye a si gu songi. Khu ginani uye a vbwetago gu phalalegisa Vajudha vatshavbo va widego vata tshangana nago, ni gu fuvisa mitshaledwa yatshavbo ya Judha?”

¹⁶ Aholu Gedhaliya, mwamana wa Ayikamo, a di embela Jowanani, mwamana wa Kareya, khuye: “U nga giri silo nya nga isoso, kholu iso u ganelago khu mahungu ya Ismayeli, malipha.”