Jeremiya 35 - Bhibhiliya Nya Guage

Gutumbega ga va na Rekabhi

¹ Magana ya Pfhumu Nungungulu ma dzude ga Jeremiya, matshiguni ya Jowakimi, mwamana wa Josiya, mufumeli wa Judha, khayo:

² “Indra ga va na Rekabhi, u ya ganela navo, u va dzega uya navo Nyumbani ga Pfhumu Nungungulu, u ya bela navo ga muhubhe nya gukari, uya va ninga vbinyu va sela.”

³ Khu guralo, nyi di dzega Jazaniya, mwamana wa Jeremiya, mwamana wa Habhaziniya, vandriyaye, sanana saye satshavbo gumogo ni ndranga ya na Rekabhi.

⁴ Nyi di va yisa Nyumbani ga Pfhumu Nungungulu, muhubheni ga sanana sa Hanani, gyanana gya Jigadaliya, muthu wa Nungungulu, a khadego vbafuvbi ni wulanga nya manganagana, gu khadego khu vbatshani nya nyumba ya Maseya, mwamana wa Salumi, ghadhi ya vbanyangwatunu.

⁵ Nyi di vega vbafuvbi ga va na Rekabhi, mikanvu nya gutale khu vbinyu gumogo ni sikombe, nyi va embela, kheni: “Selani vbinyu.”

⁶ Aholu avo va di ganela, khavo: “Kha hi na sela wadwa, kholu babe wathu Jonadhabhi, mwamana wa Rekabhi, a hi layide, khuye: Mu nga tshuki mu sela vbinyu, enu ambari sanana sanu.

⁷ Bwelo khavbo, mu nga tshuki mu dzi vbahela dzinyumba, ni gulima mu nga limi, mu nga yali misimbo yi ningago mihandro nya vhinya; aholu vbanyani mitshatshani gikhati gyatshavbo, gasi mu kodze gu vbanya myaga nya yingi tigoni mu khalago nga valuveli.

⁸ Ethu hi di yingisa magana ya babe wathu Jonadhabhi, mwamana wa Rekabhi ni satshavbo iso a nga hi leletelago; khu magirelo yoyo, ethu ni vagadzi vathu, ni sanana sathu nya sikhwathana niso nya sagadzyana, kha ha sela vbinyu guvbanyani gwathu gwatshavbo.

⁹ Kha hi vbahi dzinyumba nya gu hi vbanyela umo, ni gu lima marembwe nya guyale dzimbewu.

¹⁰ Hi khade mitshatshani, khu gu yingisa ni gu gira satshavbo kha nga idzo hi nga leletedwago khidzo khu babe wathu Jonadhabhi.

¹¹ Aholu, avbo Nabhukodhonosori, mufumeli wa Bhabhiloni, a nga saselago litigo leli, hi di khethu: Hongoleni hi khuge hiya Jerusalema, gasi hi vbuluge gu sasedwa khu Vakalidhiya, ni Vaasiriya, khigyo gighelo hi manegago khigyo eno Jerusalema.”

¹² Khu guralo, Pfhumu Nungungulu a di embela Jeremiya, khuye:

¹³ “Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: Indra u ya embela va na Judha ni vatshavbo vavbanyi va Jerusalema, khuwe: Pfhumu Nungungulu a ngu ganela, khuye: Ina kamwe kha mu na dzumela gu hevbula, ni gu yingisa magana yangu, gani?

¹⁴ Magana ya Jonadhabhi, mwamana wa Rekabhi, a nga leletela sanana saye gu si si seli vbinyu, ma ngu landriswa, kholu kha va seli kala na muhuno. Avo vari khavo gu ngu yela gu yingisa milayo ya nyehe wawe, aholu eni nyi gu bwelebwele gu mi embelani, enu kha mu nyi yingisi.

¹⁵ Gukhugela gale nyi mi rumedeni sithumi sangu, vaprofeti, gasi si mi embela, khiso: Vbindrugedzani mu ndreya ndzilani nya guvivbe, mu gira mithumo ya yadi mu si landreli vambe vanungungulu gasi mu va khozela; khu kharato mu na simama gu khala ga litigo nyi mi ningidego enu ni vababe vanu; aholu enu mu di sega dzindzeve dzanu mu si dzumeli gu nyi yingisa.

¹⁶ Situgulwana sa Jonadhabhi, mwamana wa Rekabhi, sa gu landrisa sileletelo va ningidwego khu kokwe wawe, aholu vathu vava kha va nyi yingisi.”

¹⁷ Khu guralo, Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: “Nyi na resa ga va na Judha ni ga vatshavbo vavbanyi va Jerusalema libango nyi va tivisidego; kholu nyi va embede, aholu kha va nyi yingisa; nyi va ranide, kha va nyi hakha.”

¹⁸ Jeremiya a di embela esi ga linyumba la na Rekabhi, khuye: “Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: Enu mu ngu yingisani iso mu nga leletedwago khu kokwe wanu Jonadhabhi; gambe mu ngu si landrisani satshavbo iso a mi rumedego,

¹⁹ Pfhumu Nungungulu nya Tshivba Yatshavbo, Nungungulu wa Israyeli a ngu ganela kharati, khuye: Ndrani nya livelego la Jonadhabhi, mwamana wa Rekabhi, gima kha gu na hamugega muthu a na gu thumago mbeli gwangu matshigu yatshavbo.”