Jeremiya 32 - Bhibhiliya Nya Guage

Jeremiya a ngu renga gipeto tigoni ga Anatoti

¹ Pfhumu Nungungulu a di rumela ga Jeremiya magana yaya, khuye: Khu mwaga nya likhumi nya gufume ga Zedhekiya, mufumeli wa Judha, owu khu mwaga gu enedzago likhumi na livbandre na miraru myaga nya gufume ga Nabhukodhonosori.

² Khu gikhati gyogyo Jerusalema gu di randredwe khu masotshwa ya Bhabhiloni; muprofeti Jeremiya a di khothedwe likupakupani nya nyumba ya mufumeli wa Judha.

³ Kholu Zedhekiya, mufumeli wa Judha, a di mu khothede na gu ganela, khuye: Khu ginani u profetago gukhuwe Pfhumu Nungungulu a ngu ganela kharati, khuye a na ningela lidhoropa leli mandzani ga mufumeli wa Bhabhiloni, gasi uye a li sasela;

⁴ gambe Zedhekiya, mufumeli wa Judha, kha na vbuluga mandzani ga Vakalidhiya, gambe kha na vbuluga gu ningedwa mandzani ga mufumeli wa Bhabhiloni, aholu a na ganela naye, khovbe ni khovbe, a wonana naye khu maho yaye;

⁵ uye a na dzega Zedhekiya a hongola naye Bhabhiloni, avbo a na gu ya khala kala Pfhumu Nungungulu a mu alakanya; kha nga edzi a ganedego gukhuye mwa gu wusani nyimbi ni Vakalidhiya kha mu na dugelela.

⁶ Khu guralo, Jeremiya a di ganela, khuye: Eni nyi di tiviswa khu Pfhumu Nungungulu, khuye:

⁷ Wona, a nata Hananeli, mwamana wa babedugwane wago Salumi, ata gu embela, khuye: Renga gipeto gyangu gi guromo tigoni ga Anatoti, kholu u na ni fanelo nya gu gi dzegise, gi ngu gu lumba gu gi renga.

⁸ Khu guralo, gu di girega kha nga idzo a ganedego khidzo Pfhumu Nungungulu; a dita Hananeli, mwamana wa babedugwane wangu, ata nyi vbweta pasoni nyi nga bani nyi khothedwe a ta nyi embela, khuye: Olu renga gipeto gyangu gi guromo Anatoti, tigoni ga Bhejami; kholu u na ni fanelo nya gu gi dzege ni gu gi dzegisa. Khavbo avbo, nyi di alakanya gukheni esi a diri magana ya Pfhumu Nungungulu.

⁹ Khu guralo, nyi di renga gipeto ga Hananeli, mwamana wa babedugwane wangu, a nga bani ari nagyo Anatoti; nyi mu livba pimo nya likhumi na livbandre na mivili mipimo nya parata.

¹⁰ Nyi di lova lidangalila nya wurengi nyi li sega nyi veta gitambo, li di tiyiswa khu dzifakazi nyi nga bani nyi dzi ranide nyi pima pimo nya parata vbagikalotunu.

¹¹ Nyi di dzega lidangalila nya wurengi, eli li tiyisidwego khu mathumelo nya nayo ni dzifanelo nya gurenge ni limbe nya wufakazi.

¹² Nyi di ma ningela yatshavbo ga Bharuki, mwamana wa Neriya, mwamana wa Mahaseya, mahoni ga mwamakhwathu Hananeli, mbeli ga dzifakazi dzi nga sayina malangalila nya wurengi ni mahoni ga Vajudha vatshavbo va nga bani varomo likupakupani nya lipaso.

¹³ Nyi di ninga nayo yoyu mbeli gwawe ga Bharuki, nyi mu embela, kheni:

¹⁴ Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Dzega mikhwepha yeyi yi ganelago khu wufakazi nya gurenge uwo wu vetidwego gitambo, ni uwo nyamba vetwa gitambo u yi pata u yi thela khalini nya libumba, u sega gasi yi kodze gu sayisega matshigu nya gulaphe.”

¹⁵ Kholu Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Tigoni momu gu nga na gu rengwa dzinyumba, marembwe nya sivbila nayo nya vhinya.

Jeremiya a ngu lomba tshamuselo ga Nungungulu

¹⁶ Hwane nya gubani nyi rengide nyi ningela mikhwepha, Bharuki, mwamana wa Neriya, nyi di lombelela ga Pfhumu Nungungulu, kheni:

¹⁷ Oh! Uwe Pfhumu Nungungulu wangu, khuwe u giridego ndzadzini ni mafuni khu tshivba yago nya yikhongolo ni libogo lago nya guthawuluge; avbo gwago gimwalo gi si kodzegigo.

¹⁸ Uwe u ngu pwela wuhindzi mazanazana nya situgulwana, gambe u ngu tsayisa sanana khu kotani nya sighoho sa vavelegi; uwe Nungungulu u khongolo nuri ni tshivba, lina lago khuwe Pfhumu Nungungulu nya Tshivba Yatshavbo!

¹⁹ Uwe u khongolo khu dzindzila dzago nya gusamadzise, maho yago ma ngu wona gupima nya muthu ni muthu; gasi gu ninga tshatshazelo gukhedza khu mithumo yaye, gumogo ni handro nya mavbanyelo yaye.

²⁰ Uwe u giride siliwugiso ni sisamadziso tigoni ga Egipito, na muhuno u nga gu simama gu si gira tigoni momu ga Israyeli ni ga vathu vatshavbo; gambe u dzi girede lina nya wudhumo u gu nalo kala na muhuno.

²¹ Uwe u nga dusago vathu vago khu tigoni ga Egipito, khu sisamadziso ni siliwugiso, khu gyandza nya tshivba ni libogo lago nya gukhugege ngudzu li thavisago ni guthisa.

²² Uwe u va ningide litigo leli khu gitumbiso ni gisambanyo u giridego ni vababe vawe; litigo li gogago mahwe ni wulombe.

²³ Avo va bede umo va li dzega va li fuma, aholu avo kha va nga yingisa gilo lito lago, ambari gu landrisa ndzila nya nayo wago. Ga satshavbo esi u nga va rumago gu va gira, ni gimwegyo kha va gira. Khu guralo, u va resedego dzimhango dzatshavbo dzedzi.

²⁴ Wona nya gukhuwe dzitshivba nya dzinyimbi ya valala dzi emide gasi gu dhumela lidhoropa dzi li wandra; olu lidhoropa leli li na ningedwa mandzani ga Vakalidhiya, gasi va li sasela khu matshari, ndzala ni mitungu. Iso u si ganedego si ngu tadzisega, kha nga u si wonago.

²⁵ Ambari khu kharalo, uwe Pfhumu Nungungulu, u nyi embede, khuwe: Nyi na renge lithembwe khu dzitsapawu na nyi gu wonwa khu dzifakazi, ambari ulo lidhoropa leli li guromo vbafuvbi ni gu pfhungumudwa khu Vakalidhiya.

Phindrulo ya Pfhumu Nungungulu ni gu pfhungumudwa ga Jerusalema

²⁶ Pfhumu Nungungulu a di rumela ga Jeremiya magana yaya, khuye:

²⁷ “Wona nya gukhuwe Eni Pfhumu Nungungulu nya vathu vatshavbo; ina gyomo gilo nyi tandrwago khigyo gu gira, gani?”

²⁸ Khu guralo, Pfhumu Nungungulu a ngu ganela kharati, khuye: Nyi na ningela lidhoropa leli mandzani ga Vakalidhiya ni mandzani ga Nabhukodhonosori, mufumeli wa Bhabhiloni a li fumela.

²⁹ Vakalidhiya va saselago lidhoropa leli va na bela umo va li vbisa khu nilo, va na vbisa ni dzinyumba edzi va na Israyeli va nga wusa khidzo likhulo langu khu gu lita khu vbatshani nya sikoli va vbisa libani gasi gu girela dzimhamba Bhahali ni gu ninga miphaso nya wadwa vambe vanungungulu nya malipha.

³⁰ Kholu va na Israyeli ni va na Judha, gukhugela wudzahani gwawe kha va kodza gu nyi girela silo nya sadi, aholu va di gira basi guvivba mbeli gwangu; va di nyi gorosa basi khu mithumo nya guvivbe nya gugirwe khu mandza yawe, a ngu ganela Pfhumu Nungungulu.

³¹ Kholu gukhugela litshigu li phedwego gu vbahwa lidhoropa leli kala na muhuno, va nyi goroside va wusa likhulo langu nya likhongolo, khu guralo, Eni nyi na li dusa mbeli gwangu.

³² Khu wuvivbi watshavbo wowu va wu giridego va na Israyeli ni va na Judha, va nyi wusede likhulo langu, avo gumogo ni vafumeli vawe, manganagana, vaphasi nya mhamba ni vaprofeti vawe, kha nga gambe ni vathu vatshavbo va Judha gumogo ni vavbanyi va Jerusalema.

³³ Ambari ulo nyi nga bani nyi va ninga sileletelo sangu, avo kha va dzumela gu nyi yingisa, va di nyi pfhurarela va bomba gu hevbudzwa.

³⁴ Va nyenyeziside nyumba yangu nya miphaso gu khozedwago umo lina langu, khu gu vega umo sifananiso nya vanungungulu vawe nya malipha.

³⁵ Va di emisa siluvelo nya guphasele Bhahali, kovani wa mwamana wa Hinomi, gasi gu ya vbisa iyoyo sanana sawe nya sikhwathana ni iso nya sagadzyana, va vbisela Moloki, iso Eni nyi ngamba va ruma ambari gu vbindra khu hungoni gwangu, va gira manyala nya nga ayoyo, gasi gu thela va na Judha mugighohoni.

³⁶ Gasi olu, Pfhumu Nungungulu wa Israyeli, a ngu ganela kharati mayelano khu lidhoropa leli mu ganelago khilo, khenu: Li ningedwe mandzani ga mufumeli wa Bhabhiloni, li sasedwa khu matshari, ndzala ni mitungu.

³⁷ Wonani nya gukhenu nyi na va tombanisa va wuya khu mayigoni gwatshavbo nyi va phalalegisedego umo khu kotani nya likhulo langu, likhulo ni giviti gyatshavbo; nyi na va wuyisa wulangani wowu vata vbanya khu gurula ni gukhadzisega.

³⁸ Avo va na khala vathu vangu, Eni nyi na bani nyiri Nungungulu wawe.

³⁹ Nyi na va gira va manega ni monyo moyo nya wadi ni gu gimbila khu ndzila mweyo, gasi va nyi ninga githawo gikhati gyatshavbo, gasi va vbanye gwadi avo gumogo ni livelego lawe.

⁴⁰ Nyi na gira navo gidzumeledzwano nyamba vbela, gambe kha nyi na diga gu va kategisa; nyi na thela myonyoni gwawe mapimo nya gu nyi ninge githawo gasi va si hambani ni Eni.

⁴¹ Eni nyi na nengela khavo, nyi na va kategisa ni gu va ninga wulanga wu tiyidego tigoni momu, khu monyo wangu watshavbo ni hefemulo wangu watshavbo.

⁴² Kholu Pfhumu Nungungulu, a ngu ganela kharati, khuye: Kha nga nyi giredego vathu vava dzimhango nya dzikhongolo, nyi na va resela gambe makategwa yatshavbo nyi va tumbisidego.

⁴³ Litigo leli mu gukhenu giwula, kha gu vbanyi vathu ambari sirengo; li ningedwe mandzani ga Vakalidhiya, gu na rengwa marembwe.

⁴⁴ Mu na renga marembwe khu dzitsapawu, mu lova malangalila nya gu renge khayo mu rana dzifakazi mu ta sayina tigoni momu ga Bhejami ni bambe ga Jerusalema, ni madhoropani ga na Judha, ni ya musigomoni, ni ya mikovani ni madhoropani ga Marandzi; kholu nyi na va wuyisa khu wugumbitunu vata khala tigoni gwawe; a ngu ganela Pfhumu Nungungulu.