Jeremiya 31 - Bhibhiliya Nya Guage

Guhegisa nya wugumbi

¹ Khu gikhati gile, a ngu ganela Pfhumu Nungungulu, khuye: “Eni nyi na khala Nungungulu nya mahundzu yatshavbo ya na Israyeli, gasi avo va na khala vathu vangu.”

² Pfhumu Nungungulu a ngu ganela kharati, khuye: Vathu va vbulugidego gu songwa khu matshari va manide wuhigo giwulani. Eni nyi naya ninga guhefemula Israyeli.

³ Pfhumu Nungungulu a dzi wonegiside khu matshigu ma vbindridego, a ganela, khuye: “Eni nyi gu gode khu lihaladzo li si vbeligo; khu kotani nya wuwadi wangu nyi gu ndrindredzede.”

⁴ Eni nyi na gu vbahedza nyaluphye, uwe likendzi la Israyeli! U na wusedzwa! U bwelo khavbo u mburisedwa khu dzingoma dzago, u duga ni dzindzimo u ya hana ni avo va tsakago.

⁵ Gambe u na yala mivhinya musigomwanani sa Samariya; uye a na yalago a na hodza mihandro yakone.

⁶ Kholu, li na vboha litshigu dzighadhi dzi na gu laledzago khu musigomoni sa Efrayimi, khidzo: “Khugani mu eme! Hi gwela Siyoni, mbeli ga Pfhumu Nungungulu wathu.”

⁷ Kholu Pfhumu Nungungulu a ngu ganela kharati, khuye: “Embelelani mu womba mikulungwane khu kotani ya Jakobe, huwelelani ga uye a gu muthangeli nya mayigo; mu embelela dzindzimo nya wuzundzo, khenu: Vbulugisa vathu vago Pfhumu Nungungulu, a gu mitshaledwa ya Israyeli.”

⁸ Wonani gukhenu, nyi na va wuyisa khu tigoni ga Wuronga, nyi va tombanisa va duga mahegiso nya litigo; nyi na va wuyisa gumogo ni sikhumu, va nya guhasa, vanyamayi nya dzimimba ni vale va lumwago.

⁹ Va na wuya na va gu lila, nyi na va hetedza na nyi gu va bavbula marongo, nyi na va yisa mitsongoni nya mati khu ndzila nya gululame, mwalo a na tshunganelago; kholu Eni nyi womo kha nga babe wa Israyeli, ni Efrayimi khuye matiwula yangu.

¹⁰ Enu mayigo, yingisani magana ya Pfhumu Nungungulu, ma pwadzeni ga mayigo ya sidwani ga hwindzo, mu ganela, khenu: Wule a phalalegisidego vathu va Israyeli, a na va tombanisa ni gu va hetedza, kha nga muhavisi a tshanganisago tshambi waye.

¹¹ Kholu Pfhumu Nungungulu dzegiside Jakobe ni gu mu vbulugisa mandzani ga wule a nga bani ari ni tshivba guvbindra uye.

¹² Va na wuya na va gu womba mikulungwane nya gutsake kala gigomoni gya Siyoni, va tsakela dzithomba va ningidwego khu Pfhumu Nungungulu a gu edzi: Tirigu, wadwa, mafura, dzinvuta ni simombyana; hefemulo wawe wu na khala kha nga lithembwe li theledzedwago mati, gima kha va na nga vbela gambe tshivba.

¹³ Vanyamahegyane va na hana dzingoma khu gutsaka, gumogo ni madzaha ni sikhosane; nyi na vbindrugedza gulila gwawe khu litsako, gambe nyi na va tangadzisa; nyi vbindrugedza gutshaniseka gwawe khu gunengela.

¹⁴ Vaphasi nya mhamba nyi na va khurisa khu guhodza nya gunone, ni vathu vangu va khura khu silo sangu nya sadi; a ngu ganela Pfhumu Nungungulu.

¹⁵ Pfhumu Nungungulu a ngu ganela kharati, khuye: “Gu pwade huwa nya gililo ni wuvi tigoni ga Rama, khu Rakeli a nga bani a gu lila sanana saye, a gu bomba gu tangadziswa, kholu sanana saye si vbede hiso bhi.

¹⁶ Pfhumu Nungungulu a ngu ganela kharati, khuye: Bavbula marongo u diga gu lila! Kholu gutshanisekani gwago u na mana tshatshazelo; a ngu ganela Pfhumu Nungungulu, sanana sago si na wuya khu tigoni ga valala vago.

¹⁷ Pfhumu Nungungulu a ngu ganela, khuye: Uwe u ngari ni gitumbo ga matshigu ma nga gutago, kholu sanana sago si na wuya tigoni gwawe.

¹⁸ Nyi dipwa gwadi miketo ya na Efrayimi, khavo: Uwe u nyi tsayiside u nyi kwamula gu fanana ni gimombyana gi si gu oloveligo kanga; olu nyi vbindrugedze nyi kodze gu wuya iyo gwago, kholu uwe, khuwe Pfhumu Nungungulu wangu.

¹⁹ Hwane nya gu bani nyi ghohide, nyi dzi layide, gikhati nyi nga pimisa, nyi di tshanisa givili gyangu; nyi ngu pwa dzitshoni ni wuvi, kholu nyi rwade gighoho gya wudzahani gwangu.”

²⁰ Ina kamwe Efrayimi khandri uye gyanana gyangu nya gigodwa, gani? Gyanana gi godwago khu monyo wangu, gikhati nya gingi mapimo yangu kha ma digi gu mu alakanya; ni monyo wangu wa gu salala mbeli gwaye, khu guralo, nyi na mu pwela wuhindzi; a ngu ganela Pfhumu Nungungulu.

²¹ Vegani mitseneno ni misimbo nya gu layedze ndzila, khedzani gwadi mu gimbila khiyo. Li ngu wuya likendzi la Israyeli, li wuyela madhoropani gwaye.

²² Kala lini nu nga gu legalega, uwe nyamahegyane nyamba yingisa? Wona nya gukhuwe Pfhumu Nungungulu vegide gilo nya giphya tigoni, nyamayi nyamba tumbega a na dzi vbwetela mwama.

²³ Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: “La gu vboha litshigu nyi na kategisago litigo la Judha gumogo ni madhoropa yaye, avo va na ganela gambe magana yaya, khavo: Pfhumu Nungungulu a na gu kategise, uwe ndranga nya gululame, uwe gigomo nya gukatege!”

²⁴ Malangani momo va na vbaha va na Judha ni madhoropa yaye yatshavbo, gumogo gambe ni valimi ni avo va havisago mitshambi, va na mana gukhadzisega.

²⁵ Kholu nyi na rudzisa mihefemulo yi garadego ni gu ninga tshivba iyo yi khuvegidego.

²⁶ Khu guralo, nyi di khendzuga nyi wona, ligovbe langu li di nyi tsakiside ngudzu.

²⁷ Pfhumu Nungungulu a ngu ganela kharati, khuye: “Wonani, ma na vboha matshigu nyi na gu yalago ndrangani ga Israyeli ni ga Judha mbewu nya vathu ni mbewu nya sirengo.”

²⁸ Pfhumu Nungungulu a ngu ganela, khuye: “Kha nga gikhati gi vbindridego nyi nga va khedza gasi gu va sigula ni gu va khungumula, ni gu va thesa, ni gu va tshanisa; nyi na va khedza gambe kharato gasi gu va vbaha ni gu va yala.”

²⁹ Khu matshigu yoyo kha va na ganela gambe, khavo: Vababe va hodzide dziuvha nya dzimbihu, aholu magwaha ya ethu sanana ma ngu khuyugela.

³⁰ Aholu, moyo ni moyo, a nafa khu kotani nya gighoho gyaye, ni gu muthu a gu hodza dziuvha nya dzimbihu, uye kamwe a na tshaniseka khu guvbisa magwaha yaye.

Gutiyiswa nya gidzumeledzwano nya giphya ga va na Israyeli

³¹ Pfhumu Nungungulu a ngu ganela kharati, khuye: “Wonani, ma nguta matshigu, nyi na tiyisago gidzumeledzwano nya giphya ni ndranga ya Israyeli ni ya Judha.”

³² Aholu gi na hambana ni gile nyi giridego ni vababe vawe, litshigu nyi va pharidego khu libogo gasi gu va dusa tigoni ga Egipito; aholu avo va digide gidzumeledzwano gyangu, khu guralo, eni nyi di hambana navo; a ngu ganela Pfhumu Nungungulu.

³³ Kholu egi khigyo gidzumeledzwano nyi na gu girago ni ndranga ya Israyeli hwane nya matshigu yale, nyi na lova nayo wangu myonyoni gwawe nyi wu vega mapimoni gwawe; Eni nyi na khala Nungungulu wawe, avo va na khala vathu vangu; a ngu ganela Pfhumu Nungungulu.

³⁴ Mwalo ni moyo a na gu hevbudzago muakelane mwendro ndriyaye, khuye: “Hevbula guti Pfhumu Nungungulu.” Kholu vatshavbo va na bani va nyiti, gukhugela vakhongolo kala sanana, kholu nyi na bani nyi tsetselede guvivba ni sighoho sawe, gima kha nyi na nga si alakanya gambe.

³⁵ Pfhumu Nungungulu a ngu ganela kharati, khuye: Uye a rumago lidambo li wenengedza mihani, ngima ni dzinyeledzi si wenengedza wutshigu, a kutsungago mavimbi nya linene; lina laye khuye Pfhumu Nungungulu nya Tshivba Yatshavbo.

³⁶ Pfhumu Nungungulu a ngu ganela, khuye: “Milayo yeyi ya gu fuva mbeli gwangu, khavbo nugo lihundzu la na Israyeli li na fuvago li si khali gambe litigo mbeli gwangu kala gupindruga.”

³⁷ Pfhumu Nungungulu a ngu ganela kharati, khuye: “Mwa gu kodzani gupima wugulu wa vbatshani ndzadzini ni gu wona mahegiso nya litigo omu vbavbatshi, khavbo neni nyi na gu hambanago ni situgulwana sa Israyeli, khu satshavbo va giridego,” khu Pfhumu Nungungulu a ganelago isoso.

³⁸ Pfhumu Nungungulu a ngu ganela, khuye: Wonani, ma nguta matshigu, lidhoropa leli li na vbahedzwago nyaluphye, li vbahedwa Pfhumu Nungungulu, gukhugela Likhokhola la Hananeli kala Nyangwa nya Gutshangane.

³⁹ Ngodzi nya gupime yi na ladzwa guya mbeli, kala gigomoni gya Garebhi, yi dzundruluga guya Gowa.

⁴⁰ Kova watshavbo wu dzudzugedwago sirumbi ni nguma, ni marembwe yatshavbo ni gitsongwana gya Kedhroni, kala matshanganoni nya Nyangwa nya Dzikavalu guya Khugadambo, gu na phasedwa Pfhumu Nungungulu. Gima kha wu na sasedwa mwendro gu khungumudwa kala gupindruga.