Jeremiya 3 - Bhibhiliya Nya Guage

Gumba tumbega ga vathu

¹ Gu ngu ganedwa gupwani: “Mwama a gu hula mwangadzi waye, nyamayi yoyu aya dzegwa khu mumbe mwama, ina gu ngu kodzega gu bwelo khavbo ata hakhwa khuye nya guphele, gani? Ina kha na nga nyenyezisa litigo latshavbo, gani? Uwe u dzi ningedego ga sibhayi nya singi, ina uwe u ngu dzi kodza gu bwelelela gambe eno gwangu, gani?” A ngu wudzisa Pfhumu Nungungulu.

² Nga khusa maho yago u khedza sigomoni, mwendro womo uye u ngamba bhaya naye! U di va khedzisela khu dzindzilani kha nga idzo a girago Muarabhi giwulani. U nyenyeziside litigo khu wuphuphulu wago nya wungi.

³ Khu guralo, ndzadzi kha yiwi, ambari ni iyo nya nango kha yawa; aholu uwe u na ni khovbe nya wubhayi, u si khali dzitshoni.

⁴ Olu, wa gu lila avbo gwangu, khuwe: Baba wangu, uwe u diri pari ya wudzahani wangu, gani?

⁵ “U na vegedza likhulo laye gikhati gyatshavbo, gani? Mwendro u na mu sayisa gikhati gyatshavbo? Wona, u ganede esi khu likana basi, aholu u di simama gu ghoha.”

Vandruye vavili, Judha ni Israyeli

⁶ Pfhumu Nungungulu a di ganela gambe gikhatini gya mufumeli Josiya, khuye: U wonide iso a giridego Israyeli, muthu nyamba tumbega, gani? A di gwela sigomoni gwatshavbo nya gukhugege ni vbavbatshi nya misimbo nya gunyuge, a gira umo wuphuphulu waye watshavbo.

⁷ Nyi di alakanya gukheni hwane nya gu bani giride sighoho satshavbo sesi, mwendro saye a na wuya eno gwangu, aholu uye kha wuya ndriyaye nya mukanganyisi, Judha a si wone satshavbo sesi.

⁸ U mu wone Israyeli idzo nyi nga mu tutumisa khidzo khu kotani nya wuphuphulu a wu giridego, nyi mu ningide Mosi, khu kotani nya sighoho saye, nyi wonide gukheni ndriyaye Judha nyamba tumbega, a di gira nuye wuphuphulu nyamba thava gilo.

⁹ Khu gumba khathala gwaye, nyenyeziside litigo latshavbo, khu gu khozela sifananiso nya siwindri ni misimbo.

¹⁰ Ndriyaye Judha, nyamba tumbega, kha dzi kodza gu wuya gwangu khu monyo waye watshavbo, aholu a di nyi kanganyisa, a ngu ganela Pfhumu Nungungulu.

¹¹ Aholu Pfhumu Nungungulu a di nyi embela, khuye: “Israyeli ambari a ngamba tumbega, nandru waye wu vbevbugide guvbindra wa Judha a nga nyi kanganyisa.”

¹² Indra khu phuvbo ga Wuronga u ya huwelela magana yaya, khuwe: Pfhumu Nungungulu a ngu rana Israyeli, khuye: Wuya eno gwangu, ambari u ndreyidego. Kholu nyi na gu pwela wuhindzi, kha nyi na gu girela likhulo; a ngu ganela Pfhumu Nungungulu.

¹³ Gu vbwetega basi gu dzumela gighoho gyago, kholu khwa tumbega gilo ga Pfhumu Nungungulu wago, u di khozela vanungungulu va nya mayigo vbavbatshi nya misimbo nya gunyuge, gambe khwa yingisa gilo lito langu; a ngu ganela Pfhumu Nungungulu.

¹⁴ Wuyani gwangu enu sanana nya gukanyise, a ngu ganela Pfhumu Nungungulu; kholu eni kheni Pfhumu yanu, nyi na mi dzegani, moyo ni moyo khu madhoropani ni vavili-vavili khu lihundzu ni lihundzu nyi mi hetedza kala Siyoni.

¹⁵ Nyi na mi ningani vathangeli nyi pwanago navo, avo va na mi thangela khu guti ni wugengeli.

¹⁶ Pfhumu Nungungulu a ngu ganela, khuye: Mwa gu velegelana mu andra mu tadza litigo, khu matshigu yoyo, vathu kha va na nga ganela gambe khu Ngasa nya Gidzumeledzwano gya Pfhumu Nungungulu! Ambari gu yi dilela mwendro gu yi alakanya; kha va na khathala gambe khiyo mwendro gu gira yimbe.

¹⁷ Khu gikhati gyogyo, Jerusalema gu na ranwa Gikhalo nya wufumu wa Pfhumu Nungungulu; gu na ya tombana gwaye mayigo yatshavbo guya rungudza lina la Pfhumu Nungungulu, kha va na gira gambe iso si godwago khu gudzina nya myonyo yawe nya guvivbe.

¹⁸ Khu matshigu yoyo, Vajudha ni va na Israyeli, va na gimbila gumogo, na va guta khu tigoni ga Wuronga gasi gu hongola ga litigo nyi ningidego vababe vawe gu khala thomba yawe.

¹⁹ Pfhumu Nungungulu a ngu ganela kharati, khuye: Eni nyi diri ni makungo nya gukheni nyi na gu sayisa kha nga idzo nyi sayisago khidzo sanana sangu, nyi gu ninga litigo nya ladi ngudzu, litigo nya gumbure ngudzu guvbindra mambe mayigo. Aholu eni nyi di pimisa, kheni: Mu na nyi rana khenu Baba, gima kha mu na ndreya gambe mu nyi diga.

²⁰ Pfhumu Nungungulu a ngu ganela, khuye: “Libango lanu enu va na Israyeli, kholu mwa gu fanana ni nyamayi a gumba tumbega ga mwama waye, enu nenu kha mwa tumbegani gwangu.

²¹ Gupwala dzihuwa sigomoni nya gulaphe; gililo gya va na Israyeli va lombago gu divaledwa ni gu pwedwa wuhindzi; kholu va nga diga Pfhumu Nungungulu wawe, va landra yimbe ndzila.

²² Vbindrugedzani mu wuya eno gwangu enu sanananu nyamba tumbega, eni nyi na mi vbanyisa madwali nya gukanyise gwanu.” Avo va di hakha, khavo: Hi womo avba; kholu uwe khuwe Pfhumu Nungungulu wathu.

²³ Khu lisine, wukhozeli nya malipha wa musigomoni wu ngu kanganyisa; esi va si girago giwulani ligwaha basi; guvbanyiswa ga Israyeli gwa guta khu ga Pfhumu Nungungulu wanu.

²⁴ Gukhugela wananani gwathu, vanungungulu nya malipha va vbedzide gyuma gya vavelegi vathu, gukhugela dzinvuta ni mitshambi yawe gumogo ni sanana sawe nya sikhwathana ni esi nya sagadzyana.

²⁵ Dzitshoni dzi na khale lidawu lathu, hi fenengedzwa khu milandru yathu, ethu gumogo ni vababe vathu; kholu gukhugela wudzahani wathu kala na muhuno, ethu gumogo ni vababe vathu hi ghohede Pfhumu, Nungungulu wathu, gambe kha ha yingisa lito la Pfhumu Nungungulu wathu.