Jeremiya 29 - Bhibhiliya Nya Guage

Jeremiya a ngu lovela vale va vbagedwego tigoni ga Bhabhiloni

¹ Aya khu magana nya lidangalila muprofeti Jeremiya a nga li rumelago ga mitshaledwa nya madhota, vaphasi nya mhamba, vaprofeti ni ga vathu vatshavbo va nga bani vari wugumbini, va nga vbagedwago khu Jerusalema khu Nabhukodhonosori a va yisa Bhabhiloni.

² Hwane nya gu bani va dugide khu Jerusalema, mufumeli Jekoniya, pfhumugadzi mayi waye, mithenwa, dzindruna dza Judha ni Jerusalema, vavati ni vabethi nya dzisimbi, na va gu vbagedwe va yiswa Bhabhiloni.

³ Lidangalila leli li rumedwe khu mandzani ga Elasa, mwamana wa Safani, ni Gemariya, mwamana wa Hilikiya, a gu avo va nga rumedwago khu Ezekhiya, mufumeli wa Judha, va li yisa ga Nabhukodhonosori, mufumeli wa Bhabhiloni, na li gu, khilo:

⁴ Pfhumu nya Tshivba Yatshavbo, Nungungulu wa Israyeli, a ngu ganela kharati, ga vatshavbo a va vbagedego khu Jerusalema a va yisa Bhabhiloni, khuye:

⁵ Vbahani dzinyumba mu khala umo, limani marembwe mu yala mu hodza mihandro yaye.

⁶ Dzegani vanyamayi mu velega sanana nya sikhwathana ni sagadzyana, lowodzani vanyamayi sanana sanu nya sikhwathana, ni gu lowodzisani sanana sanu nya sagadzyana, gasi si velege sanana nya sikhwathana ni sagadzyana; velegelanani iyoyo mu nga vbungugi.

⁷ Lidhoropa nyi mi yisidego umo kha nga dzikhumbi li suveleni makategwa, lombelelani khu ilo ga Pfhumu Nungungulu, kholu la gu katega, enu nenu mu na katega.

⁸ Kholu Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: Mu nga khanganyiswi khu vaprofeti vanu va guromo vbakari gwanu, ambari vafembi vanu, mu nga dzumeli gu sengwa khavo khu miloro mu yi lorago,

⁹ kholu avo va gu mi girela wuprofeti nya malipha khu lina langu; khandri eni nyi va rumedego, a ngu ganela Pfhumu Nungungulu.

¹⁰ Pfhumu Nungungulu a ngu ganela kharati, khuye: Avbo gu na tadzisegago myaga nya livbandre na mavili magumi, na mu fumedwe khu Vabhabhiloni, Eni nyi nata mi holelani gasi nyita gira gidzumeledzwano nyi giridego nanu, ni gu mi wuyisa nyaluphye wulanga wowu.

¹¹ Eni kheni nyi matigo gwadi makungo nyi gu navo khu enu, a ngu ganela Pfhumu Nungungulu; makungo yangu khya gu mi kategisa nasiri gu mi reselani dzimhango, makungo nya gu mi ningeni gitumbo ga matshigu ma nga gutago.

¹² Mwa gu nyi rana ni gu nyi khozela, eni nyi na mi yingisa.

¹³ Mwa gu nyi vbwetani khu monyo wanu watshavbo, mu na nyi mana.

¹⁴ Pfhumu Nungungulu a ngu ganela kharati, khuye: Nyi na dzi wonegisa vbakari gwanu nyi wuyisa dzikhumbi dzatshavbo ni vatshavbo va phalalegidego mayigoni ni malangani gwatshavbo nyi mi yisidego, a ngu ganela Pfhumu Nungungulu, nyi bwelo khavbo nyi mi wuyisa ga wulanga nyi mi khusidego khavbo mu ya wugumbitunu.

¹⁵ Kholu enu mu nga gu tiya mu ganela, khenu: “Pfhumu Nungungulu, na hiri Bhabhiloni, a hi wusede vaprofeti.”

¹⁶ Kholu Pfhumu Nungungulu a ngu ganela kharati mayelano khu mufumeli a khalago vbagikhalotunu nya wufumu wa Dhavhidhe ni ga vathu vatshavbo va vbanyago dhoropani, vandriyanu va ngamba hongola gumogo nanu wugumbitunu;

¹⁷ Pfhumu Nungungulu a ngu ganela kharati, khuye: Wonani nya gukhenu nyi na va rumela dzinyimbi, ndzala ni mitungu, nyi na va wona kha nga dzindzawa dzi hinidego, nyamba yela gu hodzwa khu muthu.

¹⁸ Nyi na va lundra khu dzinyimbi, ndzala ni mitungu; va na khala gilo nya guthavise ni gihegiso ga mifumo yatshavbo ya mafuni; vavbindri nya ndzila va na kutsunga mihungo va va hega, ga yatshavbo mayigo nyi na gu bani nyi va phalalegisede umo.

¹⁹ Pfhumu Nungungulu a ngu ganela, khuye: Nyi di va rumela sithumi sangu vaprofeti gikhati gyatshavbo, aholu, avo kha va yingisa magana yangu.

²⁰ Gasi enu, mu vbagedwego khu Jerusalema, mu yiswa wugumbitunu, Bhabhiloni, yingisani magana ya Pfhumu Nungungulu.

²¹ Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati khu kotani ya Akabi, mwamana wa Kolaya, ni Zedhekiya, mwamana wa Maseya, khuye: Vathu vovo va dzi girago vaprofeti va ganela malipha khu lina langu; nyi na va ningela mandzani ga Nabhukodhonosori, mufumeli wa Bhabhiloni, a va songa na mu gu va wona.

²² Gu na dzegwa avbo gwawe magana nya givalo nya dzikhumbi dza Judha dzi guromo Bhabhiloni, khavo: “Pfhumu Nungungulu a na gu gire nga Zedhekiya ni Akabi, avo va nga vbiswa khu nilo na va guvbanya khu mufumeli wa Bhabhiloni;

²³ kholu va nga girago silo nya gulolele ga va na Israyeli, va bhaya ni vagadzi va vaakelane vawe ni gu dzi gira vaprofeti vangu, va ganela khu lina langu nari malipha, na nya sa va ruma gilo; satshavbo soso nyi ngu siti, gambe kheni fakazi yakone.” A ngu ganela Pfhumu Nungungulu.

²⁴ Gasi Simaya wa Neyelami, u na mu embela, khuwe:

²⁵ Pfhumu nya Tshivba Yatshavbo, Nungungulu wa Israyeli, a ngu ganela kharati, khuye: Kha nga olu u rumedego lidangalila khu lina lago, ga vathu vatshavbo va guromo Jerusalema, ni ga Sofoniya, mwamana wa muphasi nya mhamba Maseya, ni ga vatshavbo vaphasi nya mhamba, khuwe:

²⁶ Pfhumu Nungungulu a gu giride muphasi nya mhamba wulangani ga muphasi nya mhamba Joyadha, gasi u khala muthangeli wa Nyumbani gwa Pfhumu Nungungulu, gasi muthu watshavbo a handrugago a dzi gira muprofeti, u mu hunga khu makhetshe ni dzitshinga, u mu thela pasoni.

²⁷ Gasi olu, ginani gi gu giridego u ngamba kawuka Jeremiya, Muanatoti, oyu a profetago vbakari gwanu?

²⁸ Kholu ni eno Bhabhiloni a hi lovede a ganela, khuye: “Wugumbi wanu wu na vbedza matshigu nya gulaphe; khu guralo, dzi vbaheleni dzinyumba mu khalani umo; mu lima marembwe mu hodza mihandro yaye.”

²⁹ Muphasi nya mhamba Sofoniya, a di hevbula lidangalila leli li pwidwa khu muprofeti Jeremiya.

³⁰ Khu guralo, Pfhumu Nungungulu, a di ganela ni muprofeti Jeremiya, khuye:

³¹ Rumela gu embedwa vatshavbo va vbagedwego mayelano khu Simaya, Muneyemi, khuwe: Kha nga olu Simaya, a nga dzi gira muprofeti avbo gwanu, mu khodwa gwaye khu malipha na sa rumwa kheni,

³² Pfhumu Nungungulu a ngu ganela kharati, khuye: Simaya Muneyemi nyi na mu tsayisa gumogo ni livelego laye; mwalo ni moyo nya gitugulwana gyaye a na gu khalago tigoni momu, avo gima kha va na wona makategwa nyi na gu girelago vathu vangu, uye ganede magana nya gu vale Pfhumu Nungungulu. A ngu ganela Pfhumu Nungungulu.