Jeremiya 2 - Bhibhiliya Nya Guage

Gumba tumbega ga Israyeli

¹ Magana ya Pfhumu Nungungulu ma dita gwangu mata khayo:

² Indra u ya ganela dzindzeveni ga Jerusalema, magana yaya, khuwe: Pfhumu Nungungulu a ngu ganela kharati, khuye: Nyi ngu alakanya gutumbega gwago na wu ngari lidzaha, nu ngari khundzwa, u di gu nyi haladza, ni edzi u nga bani u gu nyi landrela khidzo giwulani, ga litigo nya gihala nyamba yadwa gilo.

³ Gikhati gyogyo Israyeli a diri vathu va phasedwego Nungungulu gambe a diri mihandro nya guhegule nya guvbwere gwaye, vatshavbo va nga bani va mi sasela, va di gu dzi vangela nandru, va thegedwa khu libango; a ngu ganela Pfhumu Nungungulu.

⁴ Yingisani magana ya Pfhumu Nungungulu enu sanana sa Jakobe, ni enu mwatshavbo mu lumbago nyumba ya Israyeli.

⁵ Pfhumu Nungungulu a ngu ganela kharati, khuye: “Gasi guvivba muni va gu wonidego vababe vanu avbo gwangu, gu kala va hambana ni eni, va ya namarela ga sifananiso nyamba phasa gilo, va vbindrugedza va khala maphuphulu?”

⁶ Nyamba wudzisa, gukhavo: “Womo hayi Pfhumu Nungungulu a hi dusidego khu tigoni ga Egipito, uye a nga hi gimbidzisago giwulani, litigo nya gihala, nya gutale khu mavbala ni gidema nya guthise ni dzimhango; litigo nyamba gimbidwa ni gu khadwa khu muthu?”

⁷ Nyi mi vbohiside ga litigo nya gunone gasi mu hodze mihandro yaye ni silo saye nya sadi; aholu na mu bede umo, mu di li nyenyezisa mu ghohetela ni thomba yangu.

⁸ Vaphasi nya mhamba kha va wudzisa gilo, khavo: Womo hayi Pfhumu Nungungulu? Vahevbudzi nya nayo kha va khathala khu eni, vathangeli va di nyi wugela, vaprofeti va di profeta khu lina la Bhahali, va landrisela vanungungulu nyamba phasa gilo.

⁹ Khu guralo, nyi nga na gu mi thethisa gumogo ni situgulwana sanu; a ngu ganela Pfhumu Nungungulu.

¹⁰ Nga tshatugani mu hongole gidwani gya Kipire mu ya wona; rumelani vathu va hongola Kedhari va ya wona, vata mu tshamusela gwadi, mwendro gu di nga dugelela nya gufanane ni esi.

¹¹ Ina lomo litigo li nga vbindrugedzago vanungungulu vawe, gani? Ambari vanungungulu vawe a gu siri vanungungulu nya lisine, gani? Aholu vathu vangu va digide wudhumo wawe, va khozela vanungungulu va si phasigo gilo.

¹² Samalani khiso enu ndzadzini! Thavani mu gu ndrendremela; a ngu ganela Pfhumu Nungungulu.

¹³ Kholu vathu vangu va nyi ghohede guvili, khesi: “Va hambanide ni eni nyi gu gifefe nya mati ma vbanyago, vaya dzi kembela milambo nya malufa nyamba tshengeledza mati.”

¹⁴ Ina vathu vangu va na Israyeli dzikhumbi nya gurengwe, mwendro dzikhumbi nya guvelegwe ndrangani, gani? Khu ginani valala vaye va mu phangago?

¹⁵ Singhalana si di bhonga vbakari gwawe, na si gu ngurura khu lito nya gukhugege; va vbisa madhoropa yawe, litigo lawe li khala marumbi nyamba khadwa khu muthu.

¹⁶ Ambari ni vathu va tigoni ga Menfisi ni va Tafenisi va mi pandride phandza hungoni.

¹⁷ Ina satshavbo sesi, khandri si di gu dugelela kholu u nga hambana ni Pfhumu Nungungulu wago, a nga bani a gu gimbidzisa khu ndzila, gani?

¹⁸ Gasi olu, ga gu phasa ginani gu tutuma u bwelela Egipito, u ya sela mati nya tsongo wa Nilo? Gwa gu phasa ginani gu tutuma u hongola Asiriya, gasi u ya sela mati nya tsongo wa Ewufrate?

¹⁹ U na tshaniseka khu kotani nya wuvivbi wago, u tsayiswa khu gumba tumbega gwago; khavbo avbo, u na wona ni gu dziti gukhuwe gu hambana ni Pfhumu Nungungulu wago, gilo nya guvivbe, gi pwisago wuvi; a ngu ganela Pfhumu Nungungulu nya Tshivba Yatshavbo.

Israyeli nyamayi nyamba tumbega

²⁰ Gukhugela gale, nyi fanyide kanga wago, nyi kavilela dzitshinga dzi nga bani dzi gu hungide, uwe u di ganela, khuwe: “Gima kha nyi na ghoha gambe aholu u di noga musigomoni satshavbo nya gulaphe, ni vbavbatshi nya misimbo yatshavbo nya gunyuge, u gira wuphuphulu.”

²¹ Eni kamwe nyi gu hathide kha nga simbo nya wadi nya vhinya nyi gu yala kha nga mbewu nya wuzundzo; khu ginani olu u nga dzi vbindrugedza u khala simbo nya limbe lifumbu nyamba phasa gilo?

²² Ambari mwa gu hamba khu levbini lifumbu nya sabawu, noda nya sighoho sanu kha yi na futega; A ngu ganela Pfhumu Nungungulu.

²³ U na ganela kharini gukhuwe: Eni kha nya dzi nyenyezisa; ambari gu khozela vanungungulu nya Vabhahali? Nga alakanya idzo u nyi ghohedego khidzo kovani, nga khedza iso u giridego; wa gu tutumatutuma gu fanana ni ngameriya nya mbiri yi vbwetago matune,

²⁴ wa gu fanana ni buru nya likhabi yi olovelago gu khala giwulani; yi fembedzelago liphuvbo lidorani gwaye, iyo ya gu ningedza, ya gu vbweta matune, ya gu phela gu tutuma kha yi bweledzwi khu muthu. Matune kha dzi garadzi khu gu yi vbweta, kholu ya gu vbohedwa, ya gu dzi ningela yabune.

²⁵ Thela kota khu ngondro wago gasi wu si tshulegedwi khu gilato, ni ngolo wago wu si bangi khu lidora. Aholu, uwe wari, khuwe: “Kha gu phasi gilo; kholu nyi manide vambe vanungungulu nya valombo, khavo nyi yelago gu va landra.”

²⁶ Kha nga mbafa ya gu manwa, yi khalago dzitshoni, gu na gira nugo kharato ga linyumba la Israyeli; avo gumogo ni vafumeli vawe, vathangeli, vaphasi nya mhamba ni vaprofeti vawe.

²⁷ Avo va manago simbo, khavo: “Uwe khuwe melegi wangu; mu embela giwindri, khenu: Uwe khuwe u nga hi gira; kholu mu di nyi pfhurarela mu si nyi khedzi; aholu khu gikhati nya wuvi mu ngu nyi alakanya, khenu: Khuga u eme u hi vbanyise.”

²⁸ Gasi vomo hayi vanungungulu u dzi giredego? Va gu bani vari ni tshivba nga va diga va eme, hi wona mwendro va ngu kodza gu gu vbanyisa matshigu u pwago wuvi; kholu vanungungulu vago uwe Judha vangi, kha nga madhoropa yago.

²⁹ Khu ginani mu phikhizanago ni eni? Enu mwatshavbo mu nyi digide a ngu ganela Pfhumu Nungungulu.

³⁰ Nyi tsayiside mahala vathu vago, kholu kha va dzumela gu kawukwa kheni; matshari yanu ma mbembiside vaprofeti vanu kha nga nghala yi vbadzulelago.

³¹ Enu melana yoyu! Yingisani magana ya Pfhumu Nungungulu. Ina kamwe eni nyi khade giwula ga va na Israyeli, gani? Mwendro litigo nya gidema nya guthise, gani? Khu ginani vathu vangu va gukhavo: Ethu hi tshulegide! Gima kha hi na bwelela gambe avbo gwago?

³² Ina yomo mbiri yi divaledwago khu dziphera nya gu dzi mburisele, mwendro khundzwa yi divaledwago khu keka waye, gani? Aholu vathu vangu va nyi divade, khu gipandre nya matshigu nyambana tengo.

³³ Wa gu vbweta ndzila nya lihaladzo khu gugengela! Kholu ambari vanyamayi nya maphuphulu u va hevbudzide mavbanyelo yago nyamba si yadi.

³⁴ Mudzitshokani nya dzingandzu dzago gwa gu manega ni novba nya sisiwana esi si gu mwalo nandru, avo u ngamba va mana na va gu phanga. Ambari khu satshavbo soso,

³⁵ u nga guganela, khuwe: “Nyi mwalo nandru! Likhulo lago li vbindride avbo gwangu.” Aholu nyi na gu lamula kholu u ganedego, khuwe: “Kha nya ghoha gilo!”

³⁶ Khu ginani u vbiredzelago gu diga ndzila nya mavbanyelo yago? Dziti nya gukhuwe Vagipiti va na gu thela dzitshoni, kha nga idzo u giridwego khidzo khu Vaasiriya.

³⁷ U na wuya khiyoyo u na rwade mawogo hungoni, kholu Pfhumu Nungungulu kha va vbweti avo u va tumbago, gima khu na dugelela khu gu phaswa khavo.